تخيل الشتاء

بمناسبة البرد الظريف ده والتلج الجاي علينا في السكه ده. .
كدي نتخيل
نتخيل انو الثلج نزل علينا
اي زي شغل الافلام داك
السماء بتنقط ثلج !!
والأجواء كلها بقت ابيض في أبيض
والشوارع اتقفلت
والناس اجزت
و اي زول لمه حطبو و طلحو عليو
و وولعو الدفايات
و اشعلوا النيران :D
ولبسو تقيل واي واحد مردف 3 بناطلين و 5 فنلات و طاقتين في الراس و 7 شرابات ده غير السيوتر و القفازات..
و اي عيلة اتلمت حول المدفئة و عملو شاي مسخن بوخو طالع
و قعدو اتونسو
و ضحكو و
نسو التلج المدور برا..
وبعد ساعات تتوقف تساقط الثلوج..
والناس تطلع الشوارع فرحانه
و تلعب بالتلج
و الشفع يعملو ركشة من الثلج
و فيهم البعمل بيت من الثلج
و المراهقين يعملو حرب كرات الثلج
و سك سك و غميضه وام 15 و كمبلت
و الشباب يرقدو في الثلج ويعملو حركة الفراشه ديك الواحد يفرفر بيدينو و كرعينو..
و يتزلجو في الشوارع و البلاعات تتجمد والخيران تتقفل
و يعملو حلبة تزلج في الميدان
واي واحد يربط ليو سيخه تحت جزمتو و يقومو يفحطو في الحلبة
و النيل يبقى حلبة تزلج كبيرة زي حقت مول عفراء والتماسيح الفي البلد دي تنشف و تبقى تماثيل
تتخته في شارع النيل و ياحبذا لو ختوها في مدخل شارع القصر !
واعمامك الكبار يقعدو ينظرو " هسه التلج ده لو نزل قروش
ولا نزل دهب ولا نزل سمك ما كان اخير " !!

والناس تنسى الجانب السلبي من الجو ده
و تركز مع الحاجات الحلوة دي..
.
.
كدي نتخيل !!
.
.
محمد طارق | زول درويش.