#إنتيك.
.
.
الشعب السوداني معروف بالتراث حقو و عاداتو و تقاليدو..
و من ضمن الأشياء المعروف بيها انو هذا الشعب لا يقتنع بما يسمى بمدة صلاحية الإستعمال. .
شعب محافظ لدرجة انو مفروض يكون في كل حلة متحف خاص بيهم ..
يعني عادي ممكن الواحد يلبس بنطلون لحدي ما يتهرد و بعد ما يتهرد يعملو شورت"ردا"
او الشبب يلبسو لحدي ما سيرو ينقطع و بعداك يعمل عملية جراحية سريعة يقد السير من تحت بمسمار و يواصل لبسو..
الجزمة يلبسها لحدي ما ارضيتها تتشرط و يمشي سوق أمدرمان يغير الأرضية و يديها اورنيش و يلبسها زي السلام عليكم. .
إعادة تدوير في اي شئ..
علب اللبن تستخدم للسكر والبهارات. .
وفي أحيان أخري تستخدم ك حصالة للقروش .. واي زول ما كان عندو حصالة ب علبة اللبن نص عمرو ضاع :D
اللساتك المقدوده تستعمل مقعد ل طشت الغسيل.. وفي أحيان اخري تتعمل مزهريات..
وفي أحيان اخري يلبعو بها الشفع بما يعرف ب "الترتار"
الهدوم القديمة تستخدم لمسح الارضيات والعفش..
وفي أحيان اخري تستخدم لحجز الفيران و الضبوب في جحورهم ..
علب الصلصة تستخدم ك كبابي موية توضع في الازيار..
و في أحيان اخري تستخدم في صناعة عربات الحديد ليستمتع الشفع باللعب بها ♥ ..
غايتو كانت مصدر دخل لي وانا صغير لكن تقولو شنو السوق وقف ..
.
يعني ماشاءالل تبارك الله عيني بارده علينا :)
حتي رأس البيت بيستخدم ك مخزن للكرور جد والله !!
ومن الأشياء الكانت بتتعمل ليها إعادة تدوير
و هي واحدة من الأشياء المؤثرة في حياتنا اليومية
و هي السبب في انو نصف الشعب السوداني
يجيو قضروف
و ارتجاج في الدماغ
و صداع نصفي
ووجع ضهر مستديم
و أحيانا بواسير
وآلام في الركب و المفاصل
وهي أيضاً سبب في تعكير المزاج اليومي
و أيضا في عدم إحترام الوقت. . ..
هي الحافلات العامة
و بالأخص النوع المعروف ب " أبو القدح "
و في نوع تاني تعرف ب " مريم الشجاعة "
و تختلف المسميات..
يلا الحافلات دي انتجوها من زمن حفرو البحر و ليوم الليلة
ما زالت تزحف علي أرضيات شوارعنا المحفرة و كلها دقداق..
فشنوو مفروض يعملو ليها متحف كبييير في نص السوق العربي..
و يعملو ليها يوم سوداني تكرم فيها..
و يوجب حرقها و اعدامها في ميدان الخليفة ..
مع السجن المؤبد لما تبقى منها..
الحكاية ما مضمونه والله عادي يحرقوها بهنا بكره تلقاها شايلة فردة في السلمة ..
عادي جدا
كلو وارد
كلو صيني..
.
مامعقول لكن !!
.
و قالوا ليك الظريفة الإنجليز قريبات دي قالو عاوزين يجيبو القطر الاول من اوائل القطارات المصنوعة ايام الاستعمار من الهند..مشو الهند قالو ليهم دا من زمان ودوهو السودان..جو السودان على اساس انو حيلقوهو مركون وماف زول حيكون شغال بيهو..فلما وصلو اتفاجأو!!!..
بالقطر راااااااااشي وشغال..جك جك جك جك....
.
.
محمد طارق | زول درويش.
ليست هناك تعليقات:
إرسال تعليق