دقسة حريف

#دقسة_حريف.. . . .
العبد لله اتخرج وبقى يدقش يمين شمال عشان يلقط حق العرس .. علماً بانو في علاقة مع زميلتو في الدراسة. . وهي من النوع الشفقان خشمها ما بسكت دقيقه انققق انققق اليوم كلو معذباو تلفونات ندمتو علي اليوم الاتكلم معاها لكن بعد ده كلو بحبها وبريدها وهي كمان بتحبو وبتريدو.. .
العبدلله تمت 5 خمسة سنة من هو اتخرج ما خلى شغله ما اشتغلها يشيل ويلم في القريشات.. ومحبوبتو كل يوم طالعه ليو بكلام غير.. -واي يا هناي فلانه ما عرسوها. -وانت يا كافي البلا بغم ما قلتها.. -ماشفت يا هناي ساره صحبتي عرسوها امبارح ..
وب علي لكن ماشفت العرس موباااالغه نفسيات دمار اريتو كان عرسي... -حتجي تخطبني متين ؟! القطر ما صفر وجلحاتك زحفت.. - هسه يهون عليك يقولو علي بايره؟! -عاد صحباتي يقولو علي شنو؟! .
وتشيل وترسل ليو في صور الاعراس.. اللبس كيف
ماتعرف هندي علي حبشي علي ديك رومي
والصاله دي قصتها قصه.. والحفلات مدوره أسبوع كامل
تحلف تقول أسبوع المهندس.. وتستمر في النقه والعرس والخارجيات.. والعبدلله ماسك نفسو و شغال ليها ربنا يتم علي خير عقبالنا ويطمن فيها.. وهي بعد كل صوره تشوفها لعرسان حالتها العرسيه تزيد زياده.. والعبدلله عرف انو القصه مخستكه وصور اعراس المليارديرات ديل حتحيب ليو الهوا و الكفوه.. .
يومو القرر يخطبها ساق اهلو ومشي لبيتهم بعد ما دخل الييت واعمامك الكبار قعدو وقالو قولة الخير وطالبين يد بنتك .. ابو البت كورك يا بكري يا بكري .. الناس استغربو بكري ده منو ؟
بعد شويه بكري جا مارق من الصالون لابس عبايه وشايل ورق وهيبتو شيخ شيخ.. بكري سلم وقعد .. .
ابو البت قال:  بس نعقد طوالي.. . .
ابو العبدلله عاين ليو كده وقال ليو في اضانو:
عاد ما دقست يا ولدي. .
تمت. . .
كسره : العبدلله ما زال يزحف ويركض في الارض عشان يعمل العرس حسب مواصفات ومقاييس مرتو و اهلها. .
كسره تانيه : توبه توبه لاريد لا غرام لا خطوبه عقد بس :D .
.
#محمد_طارق_زول_درويش