عربة النفايات

#عربة_النفايات
.
حيث أقيم حالياً في الفترة بين 12-11 مساء بتجي عربية النفايات يومياً في التوقيت ده .. اول شي قدام كل بيت في سلة نفايات كبيرة بتوضع فيها نفايات البيت .. فشنو بتجي العربية فيها نفرين ورا وواحد سايق بتقيف العربيه بنزلو النفرين واحد بجر السله بشبكها برافعه في العربيه والتاني بتحكم في الرافعه دي ويقلبو النفايات في العربيه ينزلو السلة. . و يمشو للبيت التاني..بكل سرعة وبدون جوطه وبدون ترك اي ادله خلفهم ..
.
حيث كنت أقيم سابقاً .. بتجي العربيه يومين في الأسبوع و تاني بقت يوم واحد في الأسبوع و تالت بقت كل أسبوعين ومرات ما بجو زاتو الا تحرق نفاياتك قبلها..
اها مافي حاجه اسمها سله وما عارف شنو داك. .
في اكياس
شوالات
جرادل
اي إناء غير صالح
مكسور 
مافيو يد
المهم حاجه تتخت فيها الوساخه..
اها بتتردم جمب البيت كده لمن يعشش فيها الضبان..
يلا نجي نشوف لمن العربيه تجي. .
اها البيت كلو يقوم يتجارا !
طلعو الوساخه الشارع !
ده صوت العربيه !
في الشارع تتوقف العربيه
وينزل منها كمية من عمال النظافه و ينتشروا في الشارع زي قوات الدعم السريع
تحركوا ! تحركوا !
كف كرف !
خمو الاكاايس وجدعوها في العربيه
ونصها اتكشح في الارض والنص التاني خلوهو محل الوساخه كانت قاعده ..
و فو فو بتاع العربيه فحط
اها تلقى حجه ساكه العربيه
دقيقه يا ولدي
اجدع لي الشوال ده .. وحاتك اشتريتو امس !
و يجي شافع جاري من هناك شايل ليو كم كيس !
اقييف يا معلم
اقييييف !!
ويكورك لحدي ما يجدع الاكياس في العربيه !
ويدنقر ياخد ليو نفس طويل !
وبعدها يعم الهدوء بالمكان !
وترجع الحياة كما كانت
مليئة بأصوات الركشات
حتي يأتي يوم الوساخه في الأسبوع الجاي !
.
.
محمد طارق | زول درويش.