فلنتفكر

#فلنتفكر.. . .
لكل شخص منا أحلام و أهداف يود أن يحققها.. و دولة يود أن يزورها.. وكثير منا يحلم بهذه الأحلام و هذه الأماكن.. و البعض الآخر يتخيلها في كثير من الأحيان.. وقد يتخيل انه ولد في تلك الدولة و ترعرع فيها منذ نعومة أظافره و هذا شئ جميل. . .
فمثلاً انا أتمنى ان ازور روما و إسبانيا و تركيا و كثير من الأحيان أتخيل انني أمريكي أو صيني .. فهو مجرد تخيل .. هذه مخيلتي اتخيل ما اشاء :D .
و اكيد انتو بتقرو في كلامي العربي الفوق ده وسرحتو وفيكم الاتخيل نفسو حبشي وفيكم الاتخيل نفسو مصري وفيكم الاتخيل نفسو رابط عقال في نصو اقصد راسو و ... الخ.
لكن قبل ما تتخيل او تسرح او تنداح لازم تتأكد من الآتي جيداً "وختو تحتها خطين" : .
1-  قبل ان تسرح تأكد انك لست في المواصلات لانو عادي وانت في عز السرحه الكمساري يطقطق ليك  او السواق يفرمل فجاة تقوم تخبط رأسك بالكرسي القدامك وترجع للواقع المرير.
2- ما تكون قاعد مع اصحابك لانو لو واحد فيهم اتكلم معاك و لقاك خارج نطاق التغطية حتجيك بنيه من حيث لا تحتسب.. وده غير العربي الحيصرفو فيك.
3- ما تكون في محاضرة أو إجتماع أو ما شابه ذلك فعادي ممكن ترفع عيونك وتلقى المحاضر او المدير واقف فوق راسك ويقول ليك "اخر حاجة قلتها شنو ؟!" وسيك سيك معلق فيك.
4- ما تكون نايم لا بالعصر لا بالليل..بالعصر وانت ضاربك الهوا وفاتح خشمك يجيك اخوك الصغير ويكورك  ويضربك عشان يصحيك للغدا اصحى! اصحى! اصحى! قوم الفطور. . تصحى مخلوع لمن يحيرك زاتو o.O .. بالليل تجي تعبان
هلكان
حالتك حالة
الفيك كملت
بس تخت راسك في المخده وتشغل شريط الحلم تبعك.. تجيك بعوضة تفحط في اضانك و تشيل و تفحط وانت تشيل و تهش فيها كلب ما بهشو كده.. تنسى البعوضة
تستوي خلاص
عيونك وقعت
بقيت شايف عشرة عشرة
فجاة !
يجوك كديستين يتشاكلو تحت سريرك.. والحرب النازية تقوم.. بعد مصالحات و هدنة وتنازلات يمشو يخلوك.. ترقد تنوم تواصل الحلمه كده الصبح يأذن. .
تقوم تصلي وتنسى اي شي و تبدأ تحلم انك داير تنوم :D
و يعاود الحلم دورته :3 . .
.
.
محمد طارق | زول درويش.