مارك توين

#مارك_توين
قال :"بعد عشرين عاما , ستندم على الأشياء التي لم تقم بها في حياتك أكثر من الأشياء التي قمت بها لذا أسقط الحواجز وأبحر بعيداً عن الميناء الآمن" .
.
بلغتنا كده الزول ده قاصد شنو؟!!
مثلاً
-تكون سايق عربية وتجي تفحط جمب القصر الجمهوري. .
- تلعب كشتينه في نص السوق العربي عز النهار. .
-تجي متلب من برج الاتصالات باعتبار انو أطول شي عندنا ولمن تقرب افتح قميصك باعتبارو المظلة حتلقى نفسك متكل جمب ست شاي. .
-تلبس برمودا وتخش بيها الجامعه لكن ما أظن الحرس يخليك تخش أسأل مجرب :D ..
- أرجع بيتكم كدراي من أبعد سوق ليك وشيل معاك شنطة ومويه نظام سفاري وكده ..
- لو عندك ركشة اقطع بيها الكبري ..
- امشي الشغل بالعجلة ..
- جرب تاكل طحنية بالبيض ..
- أتصور سيلفي مع الحرس الجمهوري ..
- غني نشيد العلم بأعلى صوت فوق كبري الحرية من غير ما تقول في سرك نحن جند الفول جند العدس او نشتري الجبنه باغلى ثمن ..
- اعزم حبيباتك السبعة
في وقت واحد
وفي مكان واحد
وفي تربيزه وحده ^_^ ..
- خلص ليك إجراء رسمي حكومي واحد واااحد بس من غير ما تسب او تجيب خارجيات .. دي زكرتني لعبة "حكم قرقوش" تفتح خشمك تسمع لب في ضهرك .. ايام والله !!
- سك ليك كلب .  ليه دايماً الكلاب بتسكنا مفروض نحن نسكها ..
- جرب تصل اهلك كلهم بشرط انك تكون بتعرفهم فرداً فرداً .. دي براها محتاجه 20 سنة إضافية ..
- جرب تقول لامك او ابوك او اخوك او اختك "انا بحبك" ..
.
والحاجات دي كتيره لا تحصى ولا تعد بس دي أمثلة بسيطه ..
.
.
تحذير : لاتجرب هذه الأشياء في المنزل اول المدرسة أو شارع حلتكم.. هذه الأشياء قام بتنفيذها لا أحد لذلك النتيجة غير مضمونه وشكراً . .
.
محمد طارق | زول درويش.