وانا راكب في الحافلة

#وانا_راكب_في_الحافلة . .
ركبو قدامي عرسان اتنين وشكلهم كده عرسو قريب .. الشي اللفت نظري انهم  صغار .. المهم من قعدو هم ساكتين مافي واحد فتح خشمو.. الود يقبل علي مرتو يعاين ليها ويبتسم 😍 ويقبل علي الشباك .. وهي برضو تقبل تعاين ليو وتبتسم 😍 وتقبل منو تاني.. وانا ورا بعاين ليهم الاتنين و ببتسم 😊
.
الحب النبيل زااااتو ♥ . .
اللهم أرزقني وكل من قال آمين زوجة صالحة تجعلني أبتسم و أضحك و أكتكت كمان 😁
. .
امييييين
.
.
#وانا_راكب_في_الحافلة
.
لي زمن ما كتبت تحت الهاش تاق ده صح ؟!!
المهم جيت اركب الحافلة فقام عمك كده واقف وراي قال لي ياخ ما شايفني واقف قدامك ؟
رديت ليو معليش بس انت الكنت وراي.. وركبت وهو ركب في المقعد الوراي طوالي قام لفتني وقعد يضحك قال لي بهظر معاك ..
ضحكت وقلت ليو مامشكله وانا أصلا نازل قريب..
قال لي انا زاتي نازل قريب وقريب شديد .
فعلاً المسافة القالها قريبه..
قال لي مفروض امشي برجلي صح ؟
قلت ليو اي كدراي كده بتصل.
ومن هنا بدا الحوار
عمك: لكن انا قدرك مرتين
الوقت داك نط السواق قال ليو انت قدرو أربعة مرات يااخ هههه
عمك لا لا ياخ مرة ونص كمان
السواق :  يازول لو ماخايف احرجك كان قلت 5 مرات هههه
و ضحك كل من في الحافلة
وعمك : سألني انت مواليد كم يا ابني ؟؟
انا : مواليد 97  ومعاها ابتسامة عريييضه كده
قعد يضحك قال لي ياخي في عمرك ده انا معرس وعندي تلاته اولاد..
قام جا قريب علي قال صراحة كده انت مواليد كم؟ انا بخت ليك  90
قلت ليو 92 والله
عمك: يازول بديك 90
انا :  يفتح الله
عمك : ويستر الله
ضحك كده وجاني تاني
وقال : عندي ولدي في سنك كده مواليد 90 بحنس فيو عشان يعرس لكن هو ماداير
قال لي يا ابوي العرس ده مستقبل مظلم.
قمت انا قاطعتو : فعلاً الحكاية بقت صعبة
عمك : اي والله صعبة شديد لكن نفسنا نشوف شفعهم.. و اصلا كده كده مضلمه
انا : الله يديك العافيه ان شاءالله تشوفهم و ربنا يعين.. عمك طق طق ونزل..
.
.
يلا ده حالياً حال كل الابهات نفسهم يفرحو باولادهم و يشوفو جنا جناهم..
و الحكاية بقت صعبة و في نفس الوقت هم راجيننا عشان نشيل عنهم ونخفف منهم..
.
غايتو الله يدي العافيه. .
.
.
#وانا_راكب_في_الحافلة. .
. . .
و في نص شارع المك نمر والزحمه فيها عدم رحمة.. سمعت صوت زول بكورك الكلام ما واضح لحدي ما قرب وكان لابس جلابيه مبرقعة زي حقت الدراويش .. و كان بدعي بأعلى صوتو (يالله فرج الضيق..فرج يا فراج .. يالله فرج الضيق)
و الغريب انو هو مبتسم كأنو ماعندو هم غير الدعاء.. ومستمع انو بدعى لربنا.. و الزول ده بجي كل يوم بالصباح في نفس المكان .. وبكرر نفس الدعاء لا بزيد لا بنقص..
.
.
اقشعر بدني من المنظر ده و حزنت  وفي نفسي بقول "عليك عاين الدنيا دي تافهة كيف حتى المجانين حاسين ب ظلمها"
فما بالك نحن النصاح ديل ! !
ساكتين وماسكين خشمنا عندنا ! !
ف ياريت نكتر من الدعوات
و ندعو الله أن يصلح حالنا وحال البلاد..
. .
يا الله فرج الضيق
فرج يا فراج.
.
اميين.
.
.
#وانا_راكب_في_الحافلة !!
.
لفت انتباهي في زجاج الحافلة الأمامي  استيكرات (ملصقات) لصور رؤساء السودان بعد الاستقلال. . ابتداء :
-الزعيم الأزهري. -إبراهيم عبود. -جعفر نميرى. .
.
بقيت اركز في الصور وتمنيت اني أكون من جيل ذلك الزمن وأشهد انجازاتهم..
.
لاحظت لملامح وجه كل فرد منهم علي حدى. .ارتسمت عليهم البشاشة، والهدوء.
لاحظت أيضاً لنظراتهم و اعينهم قد ملئت ثقه و حده.. تدل علي الشخصية القوية التي يمتلكوها..
لاحظت أيضاً لوضعية الرأس. .فقد كان كل واحد منهم مرفوع الرأس دلالة على الافتخار بأنه رئيس للشعب العظيم الشعب السوداني. . وكذلك رضاء بالنفس بما قاموا به حتي ولو كان بالشئ البسيط..
جعلتني هذه الصور اتذكر حديث اجدادي وحديث كل من عاش في ذلك الحين. .
و كل منهم يقول كلام بصورة مختلفة يوصف بها ذلك الزمن الجميل. . الا انهم اشتركوا في المضمون والدلالة. .
زمن الخير
زمن طيب النفس
زمن الامان
زمن البساطة
زمن القناعة
والراحة النفسية. .
كل هذه الصفات والقصص التي قد مرت بي جعلتني ابتسم و جعلتني أشعر بطمأنينة في فترة شرودي هذه. .
.
.
ورجعت تاني للواقع المسخن ده.
والحمدلله علي كل حال. .
.
.
#محمد_طارق_زول_درويش