لسه الدنيا بخيرها..

من العلامات البتدل علي انو لسه الدنيا بخيرها...
.
وجود اشخاص يكتبون للفتيات علي الحائط :
" شكراً على قبول الصداقة و اتمنى التواصل يدوم "
بالاضافة الى صورة ورود و حديقه وبحر وما بعرف شنو داك!
.
و القوية عندما يكتب :
" قبولك لطلب صداقتي ان دل يدل على تواضعك "
.
يدلدل اضنينك ديل!
.
#لسه_الدنيا_بخيرها
😂😂😂😂
.
.
من العلامات البتدل علي انو لسه الدنيا بخيرها...
.
وجود فتيات يقمن بتصوير ارجلهن
ايديهن
اصابعهن
عيونهن
نخرتهن
سنونهن
كل علي حدى، و يضعنها صورة شخصية!!
و لوهلة تظن أنك في حساب تاجر اعضاء
👀👃👂👄👅✋
.
و القوية عندما تشاهد التعليقات :

" ياسلاااام ماشاء الله نخرتك فيها شي يحير! 😍  "
.
.
فيها مخاطه يا مخاخيط انت وهي!!
.
#لسه_الدنيا_بخيرها
😂😂😂😂
.
.

من العلامات البتدل علي انو لسه الدنيا بخيرها..
.
.
وجود شاب او رجل يقوم بتربية ظفر الاصبع الصغير (الخنصر ) كانه مشعوذ..
.
والقوية عندما يتحدث تراه يرفع اصبعه و يحركه ليظهر لنا مدي طول ظفره..
.
.
احب اقول ليك انت و الخالات الشكالات ديك واااااحد فرق التسمية بس ..
"هيييي يا اللخو!👆  خت شخيييت و اقيف بعيد! ✋"
.
.
#لسه_الدنيا_بخيرها
😂😂😂😂
.
.
من العلامات البتدل علي انو لسه الدنيا بخيرها..
.
.
وجود شاب يتصور سيلفي و يكرفس وشو عشان تظهر ليو غمازه 😒..
عرفنا البنات دايرين يقولو عليهم مزز..
كدي ورينا انت مالك!
حاسي بشنو يعني؟!
.
.
والقوية النوع البمد قدومو مترين في الصورة في وضعية وش البطه ..
عرفنا البنات خشمهم ده بياكلهم لو قعد ساي.!
انت مالك فاقد حنان مثلاً؟!
.
يلا يا جماعة كلنا نشيل سوا
"نادو لي حنان الليل
حنان دي معزبااااانا
و ساكنه الحي معانا الليل "
👏👏
.
#لسه_الدنيا_بخيرها

😂 😂 😂 😂
.
.

من العلامات البتدل علي انو لسه الدنيا بخيرها..
.
.
وجود بنات الوحدة فيهم تسألك انت من وين؟!
تقول ليها من امدرمان..
فجأة البت تقوم تسكلب! 😱
واااي ما بحبها!
بكرها!
ما بتتبلع لي! سخانه! زحمه!
.
بسم الله الرحمن الرحيم! 😳
فشنو يا كيم كارداشيان يا سكارلت جوهانسن يا منبع الانوثة و الدلع انتي!!!!! 
اللخت من باريس ولا شنو؟! 😑
.
والقوية لمن تسألها اها انتي من وين؟!
وتكون الاجابة واحده من ديل :
الحاج يوسف
الكدرو
كوكو
سوبا
الكلاكله
السلمة.
.
موبااالغه!  شااامبيون!
ياخ بااااريس ما عندك لااااااكن!  😒
.
.
#لسه_الدنيا_بخيرها .
😂😂😂😂
.
.
من العلامات البتدل علي انو لسه الدنيا بخيرها..
.
.
وجود فتاة تضع طرحتها بصورة جميلة و محترمة قصاد كل 20 فتاة تقوم بوضع طرحتها في نص راسها ليظهر لنا نصف شعرها،  او تضعها في رقبتها ليظهر لنا شعرها كله،  او تتناساها في المنزل و تخرج بدون طرحه لتبين لنا شنو ما معروف زاتو 😑.
.
والقوية النوع البمرق لابس طرحه وعبايه من بيتهم واول ملف يحشروهم في الشنطه و داك يا الضيق و داك يا قماش الستاير 😒.
.
.
اخواتي
صديقاتي
فراشاتي، 
ارتدي ما يحلو لك من ملابس و لكن اجعليه واسع،  يسترك و يحميك من اعين الناس و مصائد الذئاب.
.
.
#لسه_الدنيا_بخيرها
😊😊
.
.

من العلامات البتدل علي انو لسه الدنيا بخيرها..
.
.
وجود شباب يحلقو ريسانهم زي كراس الحساب و يشخبطو فيو زي كراس الرسم بتاع شفع الروضه والاساس ديلك .. و ينزلو البنطلون و مدلدلو من نصو لمن تشوفو كده تحس بيو عامل فيو عمله!
افووو 😷
بالله البامبرز اللابسو ده مقاس كم ؟!
.
والقوية ناس التيشرتات و البناطلين الاسكيييييني..  الواحد ماشي كده زي الزومبي 👻 !!
من شدة الضيق الخاشي فيو الكرعين زي مقبض الزرديه 😁 ..
و ناس السلاسل و القويشات و الختم الكتار..
بالله حركة حمار الحلب الماشي كش كش كش دي بطلوها!
.
#لسه_الدنيا_بخيرها
😂 😂 😂 😂
.
.
من العلامات البتدل علي انو لسه الدنيا بخيرها..
.
وجود موظف حكومي يجي خاشي المكتب بعد ساعه من زمن العمل وفي ناس منتظرين حضرتو من سته صباحاً. يطلع و يخش حتى يفتح الشباك.. تجي شايل اجراءك يقول ليك الشبكة طاشه.. ترجع تاني تنتظر..
يقوم يقفل الشباك يقول ماشي يفطر يجي الساعه 12 تجيو تاني يقول ليك الشبكة لسه طاشه..
ترجع تنتظر تاااالت..
يطلع يصلي يجي الساعه 2.. تجيو تالت يبدا ليك في اجراءاتك يخلص ربعهاا يقول ليك تعال بكره بدري..
يقفل الشباك و يطلع..
وهكذا جرجره لحدي ما تخلص معاملاتك!!
.
.
والقوية البواب البكون في باب المستشفى.. صاري وشو و ينهر في الداخل و المارق!!
يا زول والله جنة عدن الحارسه دي ما دايرين منها شي ياخ!
.
#لسه_الدنيا_بخيرها
😔😔
.
.

من العلامات البتدل علي انو لسه الدنيا بخيرها..
.
.
وجود فئة من الناس يقول ليك دقيقه تلفونك و يمسك التلفون و يطبز ويلعب و يخش بهنا و يطلع بهناك، و تلقاو شغال سبعه تمنية و يخيط التلفون كلو،  تحلف تقول ترزي !
ياخي الآلة الحاسبه تلقاو فتحها!  😒
.
.
القوية و ده اكلب نوووع!  البخشو الرسايل و الصور الخاصة بيك و يجيك اسمعني فلانه دي قالت ليك اضرب ليها رسلت ليك هسه في الواتس! 😡😡😡
ياخي انت مالك ومال اهلك !
يرحم والديك ياخ ركز في ورقك !
الله يعمل ليك ضنب كان ما ركزت في ورقك!
.
الحمدلله حمداً كثيراً على نعمة رمز القفل.
.
#لسه_الدنيا_بخيرها
😂 😂
.
.
من العلامات البتدل علي انو لسه الدنيا بخيرها..
.
.
وجود عرسان يعملو عرس عادي، يمشو استديو عادي، و كم صوره للذكرى عاديه، و زفه عادية، و يرقصو عادي، و يتمو يومهم عادي مبسوطين،،
.
من غير اوت دور او من غير قلة ادب و حركات تخجل،،و الصور تلف العالم كلو، و عروس ما تختشي ترقص و تتمايع و عريسها و اهلها يخجلو ليها!!
.
.
و القويه انها ممكن تتوحم و تقول لعريسها بعد الزفه ارقد في الواطه وانا اجي ماشه في ضهرك!!!
و الاقوى و المصيبة المعاها يسمع كلامها!!
و ده كلو و الفلاشات شغاله!
.
.
ياريت الناس تبعد من حنك الاوبن مايند و الحريه الشخصية و الطلس الخاشه فيو الايام دي 😒😒
و نحافظ على عاداتنا وتقاليدنا او ما تبقى منها..
.
.
#لسه_الدنيا_بخيرها .
.
.
من العلامات البتدل علي انو لسه الدنيا بخيرها.. .
.
وجود شباب في مكان عام، او جامعة، او كفتريا، مستمتعين بالقعده و اللمة و غيرو، و اول ما سمعو الاذان كلهم قامو للصلاة و خلو اي شي في يدهم..
.
.
والقوية انو في شباب غيرهم و في نفس المكان لا هماهم اذان ولا غيرو..و ممكن يكونو مشغلين اغاني عادي و الاذان شغال،، و لو جيت سالت واحد منهم ممكن يرد ليك بكل برود "ما شايل الماده دي! " 😒
.
هل تعلم انو الماده الما شايلها دي هي عماد الدين! . .
.
ربنا يهدي شبابنا و يصلح الحال.
.
#لسه_الدنيا_بخيرها .
.
من العلامات البتدل علي انو لسه الدنيا بخيرها.. .
.
وجود كمساري لاتفارق الابتسامة وجهه ولو ما عندك حق التعرفه يقول ليك ما مشكلة و يغمز ليك و ممكن يديك عشان تتوصل لو حتركب من محطة تانيه.. وجود موظف حكومي يؤدي عمله باخلاص ويحاول بقدر الإمكان يساعدك بدل ما يقيف في طريقك.. .
.
و القوية وجود سائق ركشه لا يعلي صوته علي كبار السن،،
و وجود سائق اخر ينقل المرضى و المعاقين #مجاناً.. .
فعلاً
#لسه_الدنيا_بخيرها 😊😊😊
.
.
محمد طارق | زول درويش.