في الفرحة بتاعت إحراز الأهداف بنجد صور كتيرة ومختلفة في الاحتفال..
مثلاً
في لعيبه بقلبو هوبه زي مهند الطاهر..
وفي لعيبه بتزلحقو في النجيله.. قالو يوم بله جابر جاب قون وجري اتزلحق في النجيله لمن قام لقى روحو مظلط ومسلخ..عاد بالغت يا بله في داعي لجنس ده ؟!!
وفي لعيبه باردين ما بعرفو يحتفلو .. تلقاو بفتش للكورة في القون عشان يشليها ويختها في نص الملعب .. نظام مستعجل .. يلا يامعلم اضرب الحمام !
وفي لعيبه امثال بكري المدينة ده لو جاب قون عادي تلقاو فووق في الشعبية. . الكهربا الكتيرة بتعمل اكتر من كده والله! !
وفي لعيبه بمشو الكورنر ويقلبوها حرب فيتنام شي رشاشات وشي قتل .. ياخي انت جبت قون ما استوليت علي العالم! !
وفي لعيبه الواحد وهو جاري شات الكورة خشت قون يلا لاحظو معاي مش مفروض يقيف عشان يحتفل لا ده بواصل جريتو ويزيد السرعة وتلقى التيم كلو جاري وراو وصاحبنا ما داير يقيف ..
يازول استهدى بالله اقيف!!
مالك شفت شنو مخلوع كده !!
ولسه جاري ..
تحلف تقول لاعبين سك سك .. اقبض اقبض اقبض!!
في النهاية نفسو قام وقطع..
وفي لعيبه بخافو من الاحتفال .. خايف الجماعة يتلبو فيو ولمن يقومو يقلى نفسو مطفج وملصق في الأرض. .
وأخيرًا وليس آخرا
اللعيبة المعلمين امثال كرستيانو وكده يجري علي الكورنر ومع النطه فوووق يقول قوووون !!
طبعا هو بقولها ب البرتغالي ونحن بنقولها بالسوداني ..
.
.
وفي النهاية هي فرحة وشعور حلو :)
.
.
محمد طارق | زول درويش.
ليست هناك تعليقات:
إرسال تعليق