غريبة الدنيـا

#غريبه_الدنيا..
.
غريبة لمن تشوفي ولد و يعجبك و تحاولي بكل الطرق انك تصليو،
تفتشي رقمو
تسالي عنو
و تعاني
و تحاولي
وتفتشي للبلمك بيو
و تخلقي اسباب عشان تلاقيو
و ما تخجلي
او تقولي انك خفيفة بس كلو عشان هو بستحق
و تبادري انت بالكلمة الطيبة
وفي النهاية تصلي و تفوزي بقلبو..
و تكونو حلوين مع بعض قشطة علي عسل
و تحسي انك ملكة معاو و انو هو سندك و مصدر قوتك ..
.
بس  بعداك !!
.
فجأة تتغيري عليو
تهمشيو
تكوني سبب مشاكلو
وتكوني سبب لتعاستو !!
و هو بحاول بكل الطرق انو يحتفظ بيك
يحتفظ بقلبك
يراضيك
يفتش ليك في الاعذار
يتنازل
و ممكن ينكسر و قلبو موجوع
بس صامد عشانك
و يخلي كرامتو بعيد برضو عشانك
وانت لسه مواصلة في الوجع
ولسه مواصلة تجرحي فيو !!
.
طيب!
وين الزولة الكانت بتهاتي عشانو ؟!
وين الزولة البتتوتر لمن تشوفو او يجيبو سيرة اسمو ؟!
وين الزولة الكانت بتتصل بكل لهفة بس عشان تسمع صوتو ؟!
وين الزولة البتكسر رقبتها عشان تسمع منو كلمة حلوة ؟!
وين الزولة الكانت بتغير حتي من صحباتها لمن يسلمو عليو؟!
وين الزولة الكانت كل همها تشوفو مبتسم
مبسوط
فرحان
سعيد
راضي عنها ؟!
وين الزولة دي ؟!
.
طيب ليه ما تسعى زي ما كنت بتسعى في الاول عشان تحتفظي بيو !
تسعي عشان تخليو اميرك الخلاك اميرتو
تسعي عشان تكوني ملكتو الختاك هو في عرشو !
تسعي عشان تخليو سعيد وهو معاك
مطمئن وهو  معاك
مرتاح  وهو معاك !!
.
.
طالما في حب حتكون في مشاكل او سوء تفاهم وعترات ،،
بس مهما يحصل خليك اقوى منها،
عشان حاجتين بس!
عشان لحظة فرحك اول ما كسبتيو !
وعشان هو اختارك و رضا بيك تكوني رفيقتو .
. 
.
محمد طارق |زول درويش.