اغاني من الارشيف

في صغرنا وأيام المراهقة كانت التلفونات نادره والعندو معناها مرطب..في الفتره ديك ما كان في شي اسمو mp3 وعشان تسمع أغنية واحد من اتنين :
يكون عندك مسجل او هيتفون ..
وديل ما بشتغلو الا بشريط الكاسيت..
يا يكون عندك راديو صغير وتفتح مانقو 96 ..
طبعاً المسجل ده الا تكون في البيت
ومن الأشرطة الكانت منتشره الأيام ديك :
جمال فرفور
ابو السيد
كمال ترباس
ود الأمين
الكابلي
وغيرهم من حقبة الزمن داك ..
بالنسبة للكوميديا:
فرقة تيراب
فرقة الهيلاهوب..
.
بالنسبة للأغاني الغربية. .
ودي عندها طعم خاص للمراهقين او شباب الزمن داك :
بوب مارلي
50 cent
وشريط فيو الاغاني التوب كلها
مثلاً
زي شاكيرا
امينيم
كيفن لتل ..
.
يلا وانت ماشي
ومركب السماعات
و مشغل الراديو البشبه الموبايل
وفاتح مانقو
و شغاله اغنية "طعميه"
طبعاً الأغنية دي معظم الشعب كان حافظها وبالذات المقطع لمن المغني الاجنبي Kevin lyttle يقول.. طاميو  طامييوو !
وهي في الأصل "turn me on"
وبتتسمع زي طعميه والناس مسكو فيها ..
المهم بتحس بثقه كده ما عاديه ..
وبالرغم من إننا لانفقه شي بس كانت ليها طعم خاص و جميل ..
وحالياً كل ما نسمع أغنية من الماضي طوالي بتصحابها موجة من الزكريات الحنينة ..
.
و تخلينا نرجع مراهقين تاني ♥
.
.
محمد طارق | زول درويش.