معاينة

#معاينة
.
العبد لله خلص جامعة و قدم تبع لجنة الاختيار للوظيفة..
اها حددوا ليو يوم للمعاينة..
العبدلله انكرب و اجتهد و قرا تاني من اول و راجع المواد الاخدها كلها ..
واخيراً جاء يوم المعاينة..
قطع نص و ظبط الحلاقه و الريحه و الساعه و اخر شياكة 😎..
و شال ورقو و حاجاتو و اتوكل..
ماشي في الشارع ولا المحامي داك..
راسو مرفوع و نافخ صدرو و شافط كرشو..
اها وصل المكتب.. و صادف هناك وحده زميلتو..
اهلين و كيف الحال و الحاصل معاك..
البت ما شاءالله 😍
جسم و اسم و وش مبتسم 😊
اها الناس بدت تخش المعاينة واحد ورا التاني..
والعبدلله متوتر و العرق ده ينقط..
و يسال في نفسو
ياربي حيسالو من شنو؟ 
من المادة الفلانيه ولا المادة الفلانيه؟!!
اها جا دور البت زميلتو..
خشت خمسة دقائق ما تمت البت جات مارقة و مبسوطه 😁..
العبدلله سالها اها قالو ليك شنو و الاسئلة فهمها شنو؟ !
قالت ليو عاديه بس سالوني اسمك منو و ساكنه وين و حالتك الاجتماعية و شالو رقم تلفوني..
العبدلله بالو ارتاح قال خلاص معناها هم دايرين يشوفو كيف الزول بتعامل و طريقة ردو راقيه ولا لا..
.
العبدلله جا دورو اتوكل وقال بسم الله و دخل..
السلام عليكم و وقف و مطمئن و مبتسم 😊 .
واحد من ناس المعاينة عاين ليو من فوق لتحت!!
.
وقال ليو: عرف لينا الاندغام الناتج عن فسيلويجة الامكنة المرتبطة بمكنونية اللا شئ..
و فسر لنا كيف يتم التعامل في حالة الازدواجية المنبثقة من العوامل السيريالية التي لها صدي متردد من بين طبقات الهواء..
.
العبدلله عاين ليهم يمين شمال
و عاين لزول ده و شال نفس طوييييل..
و قال ليو: ساكن في شمبات
ما مرتبط
و ده رقم تلفوني ********09
والمره الجايه بجيكم لابس طرحه..
و فكه ليهم ضحكة طويييله 😂😂😂😂😂
وطلع سابي ليهم.
.
من دربو داك اقرب دكان و ظبط ليو فته ظريفه ورجع البيت و قرر تاني توبه لا معاينة ولا لجنة اختيار،
يا يلبس طرحة يا واسطة،
و الاخيرة ثابته.
.
.
تمت.
.
.
محمد طارق | زول درويش.