الحنك

#الحنك
.
.
تعريف كلمة الحنك :
لغة هو الذقن اسفل الفك السفلي..
إصطلاحاً : هو محاولة إقناع الطرف الآخر بفكرة أو مدلول معين.
.
طيب كلمة "حنك " بقت كلمة أساسية في حياتنا اليومية .. محل ما نمشي بتلاقينا الكلمة دي .. وعندها استخدامات كثيرة في مواقف كثيرة لكن "الزيت " منها هو الإقناع بكل صوره المختلفة ..
و الإقناع "الحنك" زاتو  بختلف من شخص لآخر ..
في نوع ما عندو " حنك" وده غالباً زول مسكين وماشي مع الريح محل ما تمشي..
في نوع حنكو تعبان .. وده زول بحاول يمشي امورو ب الجلالة. .
وفي نوع حنكو سنين .. وده زول محترف بقنعك بقنعك .
ومن الناس الحنكهم سنين :
-الحلب بتاعين العدة. . تجيك المرا نازلة من بكسي العدة و تطلعك زبون ليها قديم في حين انك أول مرة تكون لاقيتها.. غالباً النسوان ديل خطرات في التجارة ..
- عمك البكون شايل صندوق فيو مويه وبارد في شارع النيل : ده برضو خطير بكون صادف كتير منكم .. بقيف ليك كده بتشتري منو بتشتري الا كان طلعت أخطر منو :D
-  التجار بصورة عامة .. و بالأخص أصحاب الكروش المنتفخه.
.
و دايماً بنلقاها اذا داير تطلع رقم وطني
جنسيه
جواز
بطاقة تأمين صحي
رخصة قيادة
اي حاجة فيها جرجره و انتظار ومسك زمن
اذا انت حنكك سنين بتظبط امورك سريع سريع وبتكون كسبان .
فشنو !!
انت و حنكك .
عجبتك بت برضو انت وحنكك .
داير تعرس انت وحنكك .
داير تسافر انت وحنكك .
داير تعيش انت وحنكك.
.
السكين اذا سننتها بتقطع كويس وإذا خليتها ميته حتعذبك.
كذلك الحنك اذا سننتو بتقنع كويس وإذا خليتو ميت جهجهك.
في النهاية انت وحنكك .
.
.
محمد طارق | زول درويش.