محن الصور

الدنيا دي ضيقه وصغيرة .. وفي حياتك بتمر عليك محن كتيره و حاجات غريبه وعامله كيف كيف o.O ..
فشنو من المحن الغريبة المرت بي..
الصور ..
ما اي صور !! صور معينه !
ووضعيات بتخذوها الناس !
ونفسي اجربها واتصور واشوف إحساس المتصور ظابط ولا زي ما انا خاتي في بالي..
فشنوو
-نفسي احلق حلاقة الصندوق
واجلخ شعري تمااام
والبس قميص ليموني وبنطلون أبيض وجزمة صفرا
وامشي الاستيديو اتصور ..
وبتاع الاستديو يصنفر الصورة تماااام ..
ويختني بكم وضعية
ويخت وراي بركة مويه
و بالجمبات دبابات
وتحتي نجيله خضراااا و بط بلعب...
واشيل الصورة فرحان واغيظ اصحابي واقول ليهم... "كشفو السان ده عجيب كيف!! ". . - نفسي اتصور جمب شجرة الجهنمية وامسك وردتها الحمرا واعمل فيها بستنشق ريحتها الكلها غبار اقصد السمحه ..
- نفسي اتصور سيلفي
وانا راقد
ووشي مورم
وعيوني وسخانه
واختها صورة شخصية في الفيس.. -_-
- نفسي اتصور وانا لابس نضاره سودا
ونافخ صدري كده زي ناس الحديد
و احمر وأصر للكاميرا كانو متشاكل معاها
و وراي ستارة كلها ورود
وانزلها الفيس واكتب "الطائر الحائر"... O.O
- كنت داير اقول نفسي
اصور كرعي وانزلها في الفيس او الانستغرام
واصور يدي  وانزلها الفيس أو الانستغرام
واصور نخرتي وانزلها الفيس أو الانستغرام
واصور اضاني وانزلها الفيس أو الانستغرام
المهم صور بالتقسيط
لكن دي حركات بنات ما لينا بيها دعوة ..
.
.
جد محن والله. .
غايتو ماعارف الناس دي إحساسها بكون شنو لمن تعمل كده !!
لكن شكلو إحساس بسنتشغخرمبي :D
.
.
#محمد_طارق_زول_درويش