صف ورا صف

صف ورا صف.
.
وقت كنا صغار اهلنا بقولو انو نحن جينا في زمن الراحة وزمن التكنولوجيا و زمن اسبيستون .. فشنو كلامهم صح .. و دايماً بقارنو بين زمنا و زمنهم..
يعني زمان الواحد بقرا بالفانوس والشمعة وبجي اول السودان.
وهسه يقرو ب "اسبوت لايت" و "سيلنق لامب" و خمسين لمبة في الاوضه أشكال وأنواع تقول مغلق و الواحد كان جاب 50 حق الحكومة يعملو ليو حفلة..
و تاني صلة الرحم زمان كانو بطلعو مع بعض وبتلمو في بيت زول كل جمعة وكل يوم ورحل وبرامج.. وهسه الواحد ينتظر يوم الجمعة عشان يغسل و ياخد ليو تكية قبل المغرب..
زمان عندهم اي شي رخيص..
هسه اي شي غالي ..
والرخيص برخصتو يضوقك مغصتو
و الغالي بغلاتو يضوقك مرارتو..
اي مرااارتو !!
زمان عندهم العيش بالصفوف يمشو يجيبو من الفرن و الواحد لازم يطلع بعد صلاة الصبح عشان يجيب عيش يومو..
فشنوووو الواحد لمن يسمع حاجة زي دي بستغرب
لكن اقتنعنا لمن حصلت أزمة الدقيق والعيش كان بالصفوف..
المواصلات زمان بجي باص "تاتا" في اليوم مرتين اتجاهو واحد لحقتو بتصل مشوارك ما لحقتو تركب تاكسي والتكسي زمان زي الركشه هسه. .
لكن هسه الحافلات ما تديك الدرب و برضو في أزمة ..
زمان ما عندهم صفوف في المؤسسات الحكومية. .
ولو عندك شي تمشي اللجان الشعبية في حلتكم
لكن هسه !!!
بسم الله نبدأ
صف شهادة الميلاد
صف الجنسية
صف التسنين
صف الرقم الوطني
صف الجواز
صف الترخيص
صف الرخصة
صف الفطور في المدارس
صف الدخول للمستشفيات
صف الصيدلية
صف الخارجية
صف التعليم العالي
صف القبول
صف وزارة التربية والتعليم
صف وزارة الصحة
صف اي وزارة
صف اي شي
و صفووووووووف الناس المتخارجة من البلد دي
و أخيراً وليس آخرا
صف الغاز.
اتصطفوا يرحمكم الله..
.
.
و بهديكم الغنيه دي
عسى ولعل تخفف الصفوف

مين غشاك وخشه صفك
مين نساك يا ناسي صفك..
شفت صفوف و صفوف طويلة
من الحرمان انا كل ليله...
الوقفات ابكت عيوني
الشكلات أصوات شجوني
شوف عيني كم زعلوني..
عشانك انت يا ناسي صفك .. .
.
محمد طارق | زول درويش.