فوبيا الكاميرا

#فوبيا_الكامـيرا
.
ما عارف بس نحن من قمنا عندنا رهبة من الكاميرات يعني في الحفلات تلقى الناس دي قالبه الدنيا قلب بس كشافة الكاميرا تقرب منهم تلقى الكل في حالة استاند باي استعداد و جدية كده تحير !
بس تعدي الكاميرا منهم كده ايييك الدنيا تجوط..
العجب في وقت العشا
اكتر لحظة حرجه وانت تكون ما متغدي وجعان بس يختو ليك العشا كده وعيونك تتملي قلوب وتطلع لسانك مترين وتبدا تفتح في الكيس براحه وتبلع ريقك كده و تطقطك أصابعك
وتعاين يمين شمال تتأكد مافي زول مركز معاك والأمن مستتب...
ووورب
يجيك بتاع الكاميرا ناطي !!!
ياخي مالك! !
فشنو !!
داير تصور شنو !!
زول جعان وداير ياكل ، مصورو مالك !!
امشي اتعشى خلينا ناكل الله يرحمك !!
و يحلف ما يمشي وتلقاو يقوم
ويصور من فوق
ويقعد يصور من تحت
و يطلع في كرسي
ويصور و يقرب الصورة ويتفنن..
مهارات التصوير بتاعتو كلها يطلعها في اللحظة الانت داير تاكل فيها ..
وانت خلاص نفسك بتكون طلعت من الاكل و كتفت يديك وخلفت رجلك وبقيت مبستم ابتسامة عريضه للكاميرا .. وده كلو عشان يتخارج منك..
والناس كلها تكون اتعشت
وده لسه متلصق فيك ..
والدقسه لو جمبك بت حلوة !
انت طيارتك قامت !
ان شاءالله لحدي ما يفتركو الكوشه حيكون واقف ليكم كده!
.
وفي ناس كده يتكبكبو كبكبه
تلقى الخاله تشيل وتصلح في التوب و ترفع يدها نظام شوفو القويشات والدهب الصيني بتاع السوق العربي. .
و البت تصلح في طرحتها ده لو اصلا لابسه طرحه ولو ما لابسه تشيل وتنفخ في خصلها زي الحصان لمن ينفخ الشعر من وشو ..
و الولد يصلح الفيونكه والساعه ويطلع منديل ويمسح العرق نظام راقي وتلقاو قبل ما تصلو الكاميرا بمسح وشو و يدو بالفرشه بتاعت التربيزه ..
في ناس ما بتعرف تتصرف تلقاهم يتململو و بدل يبتسمو يصرو وشهم !!
.
غايتو جنس محن !
.
اللهم أبعد عنا بتاع الكاميرا
وقرب لنا البوزع العشا
امييييين
.
.
محمد طارق | زول درويش.