الجرسة في رمضان

#الجرسه_في_رمضان
.
سبحان الله 11 شهر تلقى الناس دي جاريه وطاقاها الشمس و ترجع تلقى الكهربا قاطعه و متعودين وعايشه حياتها..
بس رمضان يقرب
تلقى الناس تتكبكب و تترجف و الناس تضبلن و حيلها يموت كده. .
السر في كده شنو الله أعلم !
.
85% من الشعب يظهر ليو سكري وضغط و قرحه  ومصران و قاود.. فجأة كده !! تلقاو قبل يومين قاعد في شهد الشام ومنزل ليو 3 كيلو بسبوسة و سبعه ارطال لبن ويجي يقول ليك السكري .. ماهو وراثه من جد خال حبوبه ابو أمي. . تقول شنو بس شاء الله ما قدر فعل !!
.
الأخلاق تضيق الواحد لو سلمت عليو يشاكلك !
بتسلم علي مالك يازول سلمت عليك انا ؟ العالم ده كلو مافيو غيري عشان تسلم عليو ؟! العجب لو عندك اجراء حكومي تمشي تلقى الموظفين جت نايمين ده لو لقيتهم قاعدين !! تسأل من شي الموظف يجاوبك بشي تاني ! .
وفي ناس من 12 تجي تلقاو شال مخدتو ومشى الجامع !
ياجماعه الجامع للعبادة تقرا قران تعتكف تصلي تدعي ربنا انو يفرجها وانو يصبرنا خمسه سنه تاني لقدام لو بقينا حيين ..
ما للنوم !
نوم في بيتك وتعال صلي !
تجي خاشي الجامع تبقى زي سوبر ماريو تنط من كراع ده وتجلي من راس ده و تشبح فوق كرش ده !!
ده جنسو شنو هسه ؟!!
الواحد يسألو منو يقول ليك في الجامع نايم بجي قبل الأذان بدقيقه !!
.
ناس الرشيش و التوب المبلول و المنديل الفوق الرأس ديل عاملين زي الازيار بغطوها بشوالات الخيش و يدوها مويه عشان تبرد !!
.
الشكلات و المشاكل تلقى الكمساري داقي جرس في ميه جنيه ( 10قروش) و الراكب بكورك عشان التكيف ما شغال !
ياتو يوم ركبت مواصلات عامه فيها تكيف!  بص الوالي من جابو اسبوعين و باعو مكيفاتو !
و يقول ليك الكرسي بتاعك مكسور و المقعد ليه ما منجد !!
يازول انت داير تصل بيتكم ولا داير شي تاني !!
و بتاع الخضار و بتاع التلج و الأفران تجي من بعيد تسمع ولولوو معناها في شكلة حاصله !
وتعال شوف التقاطعات !
حدث ولا حرج !
تيت في تيت في تيت ! اللهم إني صائم !
في ناس بفطرو ، صدقوني الفطور ده ما الا تشرب مويه !
غايتو الحمدلله. .
والطامه الكبرى ناس الحكومه من يسمعو رمضان قرب يقطعو الكهربا و المويه .. ماعارف السر شنو !
دي تقاليد تبع شهر رمضان ياربي ؟!
ولا اختبار لصبر الناس ؟!
ولا شنو ؟!
عليكم الله ورونا بتقطعوها مالكم !
النبي فيكم
الرسول !
.
اااه غايتو ربنا يتقبل منا و يعظم الأجر .
.
.
محمد طارق | زول درويش.