الصبر

#الصبر
.
عشان تعرفو نحن جيل لدينا من الصبر ما يكفي 10 سنين عجاف. .ولا تهزنا رياح الضغوطات و قطع الكهرباء و المويه و السخانه و غلاء الأسعار في رمضان. .
.
نحضر كابتن ماجد ونتابع الكورة لحدي ما تخش القون
في الحلقه الاولى يشوت الكورة و تنتهي
نجي الحلقه البعدها يتذكر امو و حبيبتو البتشجعو ولمن كان شافع و بلعب حفيان و مغبش ووسخان.. وتنتهي
نجي الحلقه البعدها الكورة تصل دائرة النص و يس يكون جاري وماسك قلبو و يتذكر مرضو و ينفسن بينا .. وتنتهي
ونجي الحلقه البعدها الكورة تصل ملعب الفريق الخصم و تكون طايره فوق والميدان كلو يعاين ليها .. وكابتن ماجد جاري وفجأة الأرض تبقى مدوره .. وتنتهي
ونجي الحلقه البعدها بسام يرفع خصلتو و يجي طاير و يكورك لن اسمح لك بالتسديد يا ماجد .. هو ماجد سدد وانتهى .. والكورة زي الصاروخ عابر القارات ماشه علي القون وفي عداد زمني تبقت لها حلقتان وتدخل المرمي.. وتنتهي
في الحلقه البعدها تنزل الكورة وتشخبط المدافعين و تصل خط 18 .. وتنتهي
ونجي الحلقه البعدها تقوم الكورة تحن علينا و الحارس ينط و حيمسك الكورة لانو نط ليها صح .. و مد يدو وهو طاير والكورة قربت
وفجاة !
الكورة تدق في الواطه وتغير مسارها وتمشي في عكس الحارس والحارس يعاين ليها ويقول بالغتي ياخ !
هسه ما كنتي جايه بهنا الوداك بهناك شنو ؟!! ده كلو وهو طاير و أخيراً تلامس الكورة شباك المرمي ..
والحكم يصفر ..
والجمهور يقيف مخلوع ..
ونحن نكورك قوووون جابها ود اللذين ..
حتى يقوم عمر مدافع الفريق يكورك قون والفريق يحتفل والحكم ينهى المباره ..
وتنتهي الحلقه. .
ونمشي البيوت
ونجي في انتظار أسبوع تاني
و حلقات تانيه فيها قون واحد..
.
وهكذا بدأت مسيرتنا في تعلم الصبر و برودة الأعصاب ..
.
.
محمد طارق | زول درويش.