بص السيرا

#بص_السيرا
.
.
من أعظم الحاجات البتحصل في الاعراس هي السيرا..
فشنوو السيرا هي عبارة عن قافلة بتتحرك من منزل العريس او العروس لحدي مكان الحفل .. وتختلف السيرا حسب ماهو متوفر من وسائل نقل ولكن الأغلبية هي "الباص" نسبتا لسعته الكبيرة. .
..
يلا في الباص بركبو الخالات والحبوبات والأخوات وبنات الحي وشباب الحي و دايماً بنجد الشباب بستلمو الشماعات ونهاية الباص..
.
الأجواء بتكون ملانه فرح وصوت البوري و الناس تنادي دقيقه اقيف فلان لسه ما جا !! .. لحدي ما البص يتحرك
و تبدا الاغاني
والصفقه
والدلوكه ..
والشباب والبنات والخالات كلهم بصوت واحد يغنو  في مشهد وتناغم كده جميل .. و للسيرا اغاني معينه معروفه ب اغاني السيرا مثلا زي :
- جياشه
جياشه
والجيش نقولو فتاشه..
- يلا يا سواق زود السرعه
ارح ارح ارح..
- الليلة دوب ولازم نرضى بالمكتوب ياالله
يتبسم يعاين لي
شاف الدبله فوق ايدي
شاف الدبله فوق ايدي
قال لي مخطوبه وب احي يا الله..
- الليله ساير يا ود القبايل العدييله ليو
قالو السيره مرقت عصر يا بلالي ليل ليل انا
وانا بريد الشيخ ود بدر يا بلالي ليل ليل انا..
- مبروك يا صباح الخير ده عرسينا البعدل الميل..
-ده اليوم الدايرينو ليك يااخوي مبروك عليك..
-مبروك يا صباح الخير ده عريسنا البعدل الميل..
-اده ومابقول اديت
سوا ومابقول سويت
تسلم ياعمود البيت..
-عريسنا من كبر شبا
عمرو ماسكر سبا
ويسلم الابو الربا..
-يابارد الحشا الليله العريس مرق بالسيره..
- حننو الليله سيرو
أخوي ممتاز المابشرب قزاز
ده بالدولة فاز ده ود العزاز
.
.
.
و اخر شي لمن يصلو مكان العرس
الكل يغني -انحنا جينا وكيه للمابينا
سواقنا زينا وحالف م يدلينا..
-دور بي حبيبي دور بي
دور بينا البلد ده
أحرق الجازولين الولد ده..
ويقوم السواق يدور بالبص و يتحمس
وكم بوري
علي كم تسخينه كده. .
و بعداك الناس تنزل العرس..
.
.
و يعاود المشهد نفسه مرة تانيه عند الرجعه بعد انتهاء الحفل و انتهاء تلك الليلة الجميلة. ♥♡
.
.
.
محمد طارق | زول درويش.