ماسورة 3

#ماسورة3
.
العبدلله بقى منتظر تلفون من ناس الخطوط الجوية السودانيه في آحر من الجمر ..
اها أخيراً اتصلو عليو و وروهو المواعيد و لملم شنطو و ودع اهلو للمرة التااانيه ..
ومشى المطار ..
وطلع مافي تأجيل تاني.. و ركب الطياره
و فوووووو السعودية جاك زول .. أرض الملاين من السودانين ..
اها استقبلوهو اتنين قرايبو ومشى قعد معاهم ..
و مشي عمل عمرة ظريفه كده ..
و مشى مطاعم البك ضرب الجداد لمن اتخنق ..
والترطيبه بدات تظهر فيو ..
اها بعد كم يوم كده قال يضرب لناس الوكالة عشان يشوف الفهم شنو ويبدأ يظبط إجراءات الإقامة ...
بضرب التلفون ما بخش معاو
ضرب كم مره مافي شي .. بدا يقلق و ضرب لصحبو في السودان عشان يشوف الناس دي مالها..
صحبو رجع ليو برضو مافي شي.. تلفونات الناس دي كلها مقفله..
العبدلله راسو ضرب. .
في جماعة قالو ليو امشي مكتب العمل هناك بتلقى اي شي و ممكن يدوك عنوان لوكالتك دي ..
العبدلله مشى وسأل قالو ليو مافي وكالة بالإسم القلتو ده !
كيف ياجماعه !
والفيزا دي طلعوها كيف !
فتشو تاني برضو مافي .. لا رخصة لا عنوان لا غيرو !
كبير المسئولين جاو قال ليو :يا الزول اقولك ترا فيزتك هادي مضروبة يعني مزورة و أحسن ترجع السودان قبل ما تدخل في مشاكل مع الشرطة و ممكن تاخد سجن كمان .. اقولك كتار زيك يجون هنا و يتفاجأون ب الوكالات الوهمية و الفيز الغير صالحة  ونصبت كتير من الطيبين ..
.
العبدلله الدنيا ضلمت في وشو !
قعد في الواطه وخته يدينو في راسو !
الجماعه المعاو رفعوهو ورجعو بيو البيت ..
حاول بكل السبل إنو يعمل فيزا بس قروشو كلها دفعها في السودان ...
خلاص بعد فشل و قنع رجع السودان و وصل البيت ومافي زول عارف .. و فتح الباب ودخل وصدم الناس تااااني ..
والأسئلة بدات ..
.
تاني يوم ضرب لصحبو و شاكلو وطلع الجواو كلوووو و قال ليو نمشي مكتب الوكالة صحبو قالو ليو ما عارف لكن هم كان عندهم صفحه في الفيس واتواصلت معاهم و رسلو لي  الفيزا بالإيميل و حتي القروش  جاني واحد بعد ما اتأكدت من الفيزا والإجراءات استلم مني القروش ومشى .. شكلو زاتو ما بتذكرو..
خشو الفيس شافو الموقع الكاتبنو في السوق العربي اها مشو هناك بالضبط لا لقو وكالة ولا غيرو..
لقو كفتريا صغيرة و مكرفون شغال :
شعير مركز ب 1000 جنيه
ليمون مركز ب 1000 جنيه
برتقال مركز ب 1000 جنيه
طعمية جامبو ب 2000 جنيه ..
.
العبدلله شرب ليو كبايتين ليمون و استعوض امرو لله .
.
.
تمت. .
كسرة :
ملعون أبو الغربة الخلت الناس تبيع صغيرها و كبيرها..
ملعون أبو القروش الخلت الناس تبيع ضميرها ..
.
.
محمد طارق | زول درويش.