العيد اطفال

الفرحة أطفال..
و العيد لكل الأعمار. .
و العيدية هي الفرحة للأطفال ..
في العيد لمن كنا اطفال و لابسين هدومنا الجديدة وقاشرين و بعد الصلاة تنتهي طوالي كانت في خالة صحابنا بتدينا عيديه دون نساء الحلة اها بيتها كان اول بيت بندخلو وتدي اي زول تلاته جنيه وبتكون جديدة الوقت داك الجنيه زي العشره هسه .. بنشيلها منها وهي مبسوطه و بتشوفنا زي اولادها و نمشي ندخل بيت بيت .. و الكعك والخبيز والحلاوة.. و كورة العجوة بجوز الهند البتعملها أم صاحبنا ..
و بعد نخلص من اللف اي واحد بجري بيتو عشان يطقطق العيدية من ناس البيت زي الكمساري لمن يخلص من الركاب ^_^..
ابوي
امي
خالي
خالتي
حبوبتي
بعداك كنت بطلع عجلتي و بكون غسلتها نضيف يوم الوقفه و بكشتها ..
و اطلع اشتغل بيها إيجار الساعه ب 5 جنيه و اللفه ب جنيه .. والله كنت بطلع جنس قروش زايد عليها العيدية ..
اها ما كنت ببعزقها ساي .. بطلع منها 10 جنيه اشتراك الرحلة
و بطلع منها حق الألعاب في الحديقة .. عربات الطقش
و السلاسل
و العروسه
و الطبق الطاير
و سباق الفورميلا..
ده كلو من قروش الإيجار و العيديه..
اها بعد الرحلة بكون العجلاتي فتح زي خامس يوم في العيد كده. . "الوقت داك الإجازة أسبوع أو اكتر"
اها بمشي اشتري بكش جديد للعجلة  مرايات
و لباسات لمقبض الميزان
و رفارف نص
و قرون
و بدالات جديدة
وفرشة للسرج .. و بلفها شريط .. "وحده من عاش تلك الطفولة سيعرف عن ماذا أتحدث". .
وبرجع البيت اشحمها براي و اركب البكش و اغلسها واقعد منتظر عشان تنشف وادخلها تحت الشجره عشان الشمس ..
كانت الكروزر بتاعتي ياخ ♡..
و بشتري بندقية سكسك.. آخر وحدة اشتريتها محتفظ ييها لحدي هسه  تقريباً من 2004_2005 ..
والباقي البفضل من القروش بختو في الحصالة ..
.
.
ده كان عيدي وانا طفل ..
.
.
#ألا_ليت_الطفولة_تعود_يوما
.
.
محمد طارق | زول درويش.