وانا راكب الطيارة

#وانا_راكب_الطيارة
.
.
وانا مسافر بعد ماخلصت إجراءات شحن قلت للبت القاعده في منفذ الخدمات بت ظريفه كده .. لو سمحتي بس داير مقعد جمب الشباك..قالت لي اوكي دقايق بس ..
طبعا بحب القعاد جمب الشبابيك منبع الهمبريبه.. اها وانا منتظر قمت سرحت.....
" بعد ما الطياره طارت ووصلنا فوق قمت طلعت يدي بالشباك واحركها مع الهوا و طلعت راسي وبقيت بعاين للأرض.. وشغال (أي بليف أي كان فلاااي .. أي بليف أي كان تطش زا اسكاااي )
بعد شوية جينا مارين جمب سحابة قمت قطعت منها حته واكلتها (حلاوة قطن).. وخشينا في سحابه شايله تقيل رعد وبرق وقبضت لي برقايه كده وفكيتها باتحاه الأرض و نشت بيها واحد في صلعتو ..
اها السواق اقصد الكابتن أشر لي بالمراية عشان ادخل يدي وما تجي طياره في الاتجاه التاني تكسرها لي..
احترمت نفسي ولميتها.."
.
لو سمحت!
أستاذ محمد !
رجعت للواقع واتبسم براي لقيت البت تعاين لي وتضحك..قالت "طبعا اقرب مقعد فيو شباك من مقعدك جمب باب الطوارئ قصاد الجناح الشمال .." قلت ليها مامشكلة .. وطرق طق تطبزت في الجهاز وادتني ورقي ومشيت عملت الخروجيه وخشيت الصالة منتظرين البص يجي..
اول ما البص جا الناس قامت جارية تقول  الطيارة حتفوتم غايتو!!
.
خشيت الطيارة وفتشت رقم مقعدي ورفعت شنطتي فوق وقعدت ..
وبعد مسافة طارت الطيارة طارت الطيارة طارت !!
.
بقيت اهبش واتاكد أي شي في محلو دخلت يدي تحت المقعد السترة قاعده في حال كتمت..
(زول اكشن وبحضر أفلام كتيرة)
بقيت متكل علي الباب ويرجف واعاين للمحرك والجناح يرجف!
اها سرحت تااااني !
" اول ما الطيارة خشت في مطب وبقت تكركب و فجاة الانّذار ضرب تيت يت وجات المضيفة تتجارى أي واحد يلبس سترة النجاة حقتو!! واقعدو قبلكم !!
والحال لسه ماشي في زياده وبعد شوية اعيان بالشباك القي ليك المحرك ولع نااار .. كتمت !
مافي حل الا الناس تتلب من فوق ..
فتحت الباب واديتو شلوت ومع الهوا الشديد طار !
ونطيت وفتحت البرشوت(المظلة) بتاعي و وقعت جمب جزيرة .. .
اها سبحت لحدي ما وصلتها ..
ولفيت فيها طلعت فاضية.. قمت لميت لي حطب و بقيت افرك في العصايه لحدي ما النار ولعت ..
ومشيت قطعت لي كم صفقه كبيرة كده وعملت لي راكوبه وقعدت تحتها قصاد النار ..
بعد ساعات في مراكب وصلت الجزيرة وطلعو خفر سواحل بلد كده و حكيت ليهم الحاصل كلووو..
وضربو تلفون لناس السفارة السودانية الفي بلدهم وقالو ليهم عندكم المواطن الناجي من الحادثه السوداني الجنسية محمد وهسه نحن لقيناو..
ناس السفارة ردو ليهم : هسه الشبكة طاشة و الموظين مافي ..واحد بفطر والتاني مشي يصلي .. كدي اضربو لينا بكره الصباح تكون الشبكة جات نشوف موضوعكم ده شنو !! وقفلو الخط..
الجماعة كلهم بقو يعاينو لي ومستغربين ده شنو ده !!
هزيت ليهم راسي وقلت ليهم ده الطبيعي بتاعهم ^_^ "..
.
اسكيوز مي سير !
سوري !
اها رجعت للواقع ولقيتها المضيفة طلبت مني انزل التربيزه حقت الاكل عشان الوجبة..
اكلت وضربت العصير وشربت الشاي.. والطيارة وصلت بحمدالله ..
لا اكشن ولا تليب
سالم غانم ^_^
.
.
محمد طارق | زول درويـــــش .