الريدة

#الريده
.
-لمن تكون زهجان وتضرب ليها وترد عليك ومن اول كلمة
تعرف انك ما كويس. .
- لمن تكون مبسوط وتلقى أصابعك براها مشت تضرب طق طرق رقمها و طوالي تحكي ليها. .
- لمن تضرب و ما ترد
تاني تضرب وما ترد
وتالت تضرب وما ترد
و تبدا تقلق ياربي وين؟!
وبعد فترة تضرب وما ترد
و انت يغلبك القعاد
الف حاجه تجيك في راسك
و تتحول لزول تاني
و تكون حارس التلفون منتظر منها رساله مسكول مكالمة اي حاجة بس تطمنك
وفجاة يظهر اسمها في الشاشه
وترفع التلفون ويقع منك وترد "وينك ؟ فشنو ؟ ان شاءالله خير؟ " ونفسك يقوم
وهي ترد عليك بصوت حنييييين يسري في كل مداخل الدم الداخلة لقلبك " معليش ياسيدي اصلو كانو معانا ضيوف "
وكل خوفك يتلاشى في اللحظة دي و تاخد نفس طويل وتبدا ترجع ياك الأول ..
- لمن تكون متخاصم و تبادر انك تسامح عشان اللحظة الحلوة تدوم ..
- لمن تغيظها وانت قاصد و تتحول هي لطفلة صغيره في عمر سنتين و تبدا تكشر و تكرفس وشها وانت بجوه متيم و تراضيها بأبسط كلمة "مشتاقين" تتكابر عليك وهي من جوه الشوق شويه عليها وتقول ليك "اصلو ما حصل"..
- لمن تكون ماشي معاها وهي اصلا راسها مابحصل كتفك وتقول ليها "انت عارفه انك قصيرة؟ !" وتضربك في يدك ضربه خفيفه اصلو صعب عليها انك تتوجع و تقول ليك "الطول طول النخله وال.. " وتقاطعها خلاص خلاص لكن برضو قصيرة ..
- لمن تكون هي متضايقة وغيرك ما شايفه وتحكي ليك و تتكلم وتتكلم و تتكلم و تتكلم وانت بس ساكت وهي تتكلم و بعد تخلص تسألك: "اها سمعتني؟".. وانت ترد: " لا ما سمعتك ممكن تعيدي تاني ؟ شكلو شبكتك كويسه عشان كده كلامك سريع زي باقة زين ".. و تضحك وتنسى هي اصلا كانت متضايقه من شنو وتقول ليك :"امشي يا كريه ! غياظ ده ! "
- لما تكونو حافظين تفاصيلكم الصغيرة .. وتعرف هي بترد بشنو وحتقول شنو ..
.
.
- لمن تكون الريده بيناتكم صادقه  عفيفه و كل يوم ترسمو خط في لوحة حياتكم المستقبلية
و تدعو في كل صلاة إنها تدوم لقدام وربنا يجمعكم في الحلال..
.
.
محمد طارق | زول درويش.