الكريسماس

بتذكر وقت نكون مؤجزين و قاعدين في البيت بنسمع صوت النوبه والطار من بعيد ممزوجه ب أغنيات شعبية. . الصوت ما واضح والاغاني ما مفهومة .. بنطلع الشارع و ننتظر النوبة بشغف  لحدي ما تصل حلتنا .. النوبة دي كانت احتفالات اخوانا الجنوبين ب الكريسماس .. بنمشي معاهم ونلف الشوارع شارع. . حلة حلة. .  بنمشي ساعات وعادي نلقى نفسنا بعدنا من البيت شديد بس ما حنك. . و مافي زول بتعب او بزهج .. بنرقص
نفرح
نضحك
نغني معاهم بلغتهم الغير مفهومه لينا. . مافاهمين بقولوا شنو لكن بنشيل معاهم علي اللحن.. ونحن ماشين في نصهم منهم و فيهم و مبسوطين انو نحن مشاركنهم اعيادهم..
في جزء منهم بوزع الحلاوة في الشارع..
و الجزء الآخر شايلين الكشكوش زي ما كنا بنسميو..
والناس في بهجة و سعادة. .
الوقت داك الناس كلها لونها واحد
تراثنا واحد
في وطن واحد
مافي فرق بين جنوب و شمال
غرب أو شرق . .
كلنا سودانين . .
كلنا إخوان . .
كلنا أحباب . .
.
.
محمد طارق | زول درويش.