#سيلفي
.
التصوير عموماً من اجمل الطرق لحفظ الذكريات الجميلة..
من زواج
خطوبة
عيد ميلاد
لمة مع الحبان
والكتيير من المواقف البنحفظها عن طريق الصور..
لكن في حاجات كده تحير الواحد وبقت منتشرة بصورة كبيرة و بتمر عليك محن و حاجات غريبه وعامله كيف كيف!!
..
مثلاً محن الصور ..
ما اي صور !! صور معينه !
ووضعيات بتخذوها الناس !
بس نفسي اعرف إحساس المتصور شنو بعد يتصور كده ..
مثلا زي
-واحد يحلق حلاقة الصندوق
و يظبط شعرو تمااام
و يلبس قميص ليموني وبنطلون أبيض وجزمة صفرا
و يمشي الاستيديو يتصور ..
و بتاع الاستديو يصنفر الصورة تماااام ..
و يخت وراو بركة مويه
و بالجمبات دبابات
وتحتو نجيله خضراااا و بط بلعب...
ويشيل الصورة فرحان!
- واحد يتصور جمب شجرة الجهنمية ويمسك وردتها الحمرا ويعمل فيها بستنشق ريحتها الكلها غبار اقصد السمحه ..
- يتصور سيلفي
وهو راقد
و وشو مورم
وعيونو وسخانه
ويختها صورة شخصية في الفيس!
- يتصور و هو لابس نضاره سودا
ونافخ صدرو كده زي ناس الحديد
و يحمر و يصر للكاميرا كانو متشاكل معاها
و وراو ستارة كلها ورود
وينزلها الفيس ويكتب "الطائر الحائر"!
- و في نوع تصور كراعا وتنزلها الفيس أو الانستغرام
وتصور يديها و تنزلها الفيس أو الانستغرام
وتصور نخرتها وتنزلها الفيس أو الانستغرام
وتصور اضانها وتنزلها الفيس أو الانستغرام
المهم صور بالتقسيط كده!
.
جد محن والله. .
غايتو ماعارف الناس دي إحساسها بكون شنو لمن تعمل كده !!
لكن شكلو إحساس بسنتشغخرمبي!
.
ده كلو كوووم و الجاي ده كوم تاني!!
.
العبادة و الصدقة و الحج والعمرة!
للاسف الناس بقت تركز انها توثق اللحظة اكتر من انها تركز في العبادة!
الناس بقت تتصور وهي بتتصدق!
في حين انو شمالك ما مفروض تعرف انك تصدقت خلي من العالم كلو يعرف!!
اصبحت اعمالنا لا تخلو من الرياء !
حتي و لو ما كنا قاصدين و نيتنا المشاركه فقط ليس الا،،
بس بالذات اللحظات دي! مفروض لو وثقتها احتفظ بيها لنفسك و افتحها و انت براك!
.
افسدت وسائل التواصل الاجتماعي العديد من المعاني الرائعة في حياتنا... حتى العبادات والروحانيات التي هي شي خاص بين العبد وربه اصبحت شيء يتباهى به الناس امام بعضهم
.
.
.
محمد طارق | زول درويش.
ليست هناك تعليقات:
إرسال تعليق