أعز مكان عندي السودان!

#أعزّ_مكان_وطني_السودان
.
بت ﺍﻟﺠﻴﺮﺍﻥ
ﺳﻴﺪ ﺍﻟﺪﻛﺎﻥ
ﺍﻭﻻﺩ ﺍﻟﺤﻲ
ﻗﺎﻋﺪﻳﻦ ﻛﻴﻤﺎﻥ..
.......
ﺷﺎﻓﻊ ﺍﻟﺒﻴﺖ
ﺟﺎﺭﻱ ﺣﻔﻴﺎﻥ
ﺣﺒﻮﺑﻪ ﺗﻨﺎﺩﻱ
ﻭﺩ ﺳﺠﻤﺎﻥ!..
.......
ﻛﻮﺯ ﺍﻟﺰﻳﺮ
ﻭﺍﻟﺰﻳﺮ ﻧﺪﻳﺎﻥ
ﺣﺒﻞ ﺍﻟﻐﺴﻴﻞ
ﺍﻟﺤﻮﺵ ﻭﺳﺨﺎﻥ..
.......
ﺭيحة ﺍﻟﺒُﻦ
ﺑﺨﻮﺭ ﺗﻴﻤﺎﻥ
ﻋﻄﺮ ﺍﻟﺼﻨﺪﻝ
ﺷﻜﻞ ﺍﻟﺪﺧﺎﻥ..
.......
لمة أهل
وسط الحبّان
ملانة ضحك
مغمورة حنان..
.......
في لوحة حب
فرشةُ فنان
إبداع أُستاذ
وصوت رنان..
.......
ﺩﺍﻓﺮﻭﻱ غُبش
ﻟﺤﺪﻱ ﺍلآﺫﺍﻥ
ﻟﻤﺔ ﻟﻴﻞ
ﺟﻠﺴﺔ ﻭﻟﻬﺎﻥ
ﺍﻟﺤﺎﻝ ﻣﺎﺷﻲ
ﺷﻜﺮ ﺍﻟﺮﺣﻤﻦ..
.......
ﺻﻴﻒ ﺍﻟﺤﺮ
ﻭﺍﻟﺰﻭﻝ ﻋﺮﻗﺎﻥ
ﻣﻄﺮ ﺍﻟﺨﻴﺮ
ﻭﺍﻟﺒﻴﺖ ﻏﺮﻗﺎﻥ
ﺷﺠﺮ ﺍﻟﺸﺎﺭﻉ
ﺑﺎﻟﻤﻮﻳﻪ ﺭﻭﻳﺎﻥ..
.......
ﺷﻬﺮ ﺍﻟﺨﻴﺮ
ﺷﻬﺮ ﺭﻣﻀﺎﻥ
ﻗﻴﺎﻡ ﺍﻟﻠﻴﻞ
ﺗﻼﻭﺓ ﻗﺮﺃﻥ
ﻃﻴﺐ ﺍﻟﻨﻔﺲ
ﻭﺍﻟﺰﻭﻝ ﻓﺮﺣﺎﻥ..
.......
ﺷﻴﺦ ﺍﻟﺤﻲ
ﻋﻤﻚ ﺳﻔﻴﺎﻥ
ﻭﺩ ﺍﻟﺰﻳﻦ
ﺭﺍﻗﺪ ﻋﻴﺎﻥ
ﻭﺩ ﺍﻟﺨﺎﻝ
ﻣﺎﺷﻲ ﻭﻧﻌﺴﺎﻥ
.......
ﺍﻟﺨﻴﺮ ﺭﺍﺍﺍﻗﺪ
ﺍﻟﺒﻴﺖ ﻓﺪﺍﻥ
ﺍﻟﺤﺎﻝ ﻣﺴﺘﻮﺭ
ﻭﺍﻟﺪﻧﻴﺎ آﻣﺎﻥ..

.
.
محمد طارق | زول درويش.

وليمة!

#وليمة!

أخوكم كان معزوم وليمة و جاي من هناك مهوووي وشاف ليك الصفرة دي عيونو زغللت 😍
يازول خاتين ليك صينة كبييييرة بتاعت كبسة في النص،
كبسة سمك!
اول مرة تلاقيني!
فيها ام جلمبو و سرطان البحر و حاجة كده مكرفسة قالو اسمو روبيان و اسبونج بوب و بسيط و شفيع 😁
و الرز ده لونو بنيييييي! و الخضار مشتت فوق الصينية كده بأشكال هندسية تفتح النفس 😌
تعالو شوفو السلطات حول الصينية موزعة بصورة منمقة ياسلاااام يا 😍
شي مايونيز و شي كاتشب و شي طحين و شي كده ما مفهوم زاتو هو شنو!
و طوالي طلعت ليك التلفون عشان اصور الوليمة دي اغيظ بيها الجماعة 😁😌 دي فرصة ما بتتفوت!
تشك صورة!  تشك صورة 📷! 
و جيت قعدت بمزاااااج!
و اتربعت فوق الكرسي كده ولا ملك الفرس 😌✋
و شمرت زراعي استعداداً للمعركة الطاحنة 😎
و قلت بسم الله بديت بالرز و جريت ليك صحن الكاتشب قريب!
و ديك يا الخلطة الرزية الكاتشبيه 😁
و هبشت السلطة كده نظام الود صحي وكده 😌
طبعاً قلت ءأخر الحاجات الظابطة ديك نظام الود مؤدب وكده 😎
و جريت ليك حاجة كده مكرفسة و محمرة شكلها زي الطعمية 😋

اللقمة الاولي!

اللقمة التانية الدنيا ضلمت في وشي!  😨
و بطني قلبت 158307153920 درجة!
و بقيت شايف طشااااش طشاااااش 😵
لمن بقيت ابتسم براي! شر البلية ما يخليك تبتسم 😅
المهم اقرب ليمونة عصرتها في خشمي!
تدارك للموقف طوالي!
.
بس عاينت نظرة سريعة لقيت ليك في صحن كوراع مختوت في الطرف هناااااااااك ومافي زول جايب خبرو 😍
في اللحظة دي عيوني اتملت نجوم و قلوب 💕  وسالت دمعة فرحة من عيوني المحمره 😁
و عادت الابتسامة لوجهي الاخضر مرة أخرى 😁😃
و ناولت ليك الكوراع دي و دورت فيها 😋
كوارع مسبكة ياخ 😍
دي ما فاضية لكوارع الموناليزا زاتو 😁
.
لكن للأسف لم تمضي ثواني حتي عاد مفعول ذاك الشي المكرفس داك!
مفعولو كان قوي ياخ!
قوي شديد والله ! 😢😥
و خلاني اعمل دعم سريع! و هجمة مرتدة مباغتة! 
🏃🏽💨💨💨💨💨💨
يلا انتو تمو الباقي خيال! 😧

و إقتعنت إقتناع مقنع إقناعاً تاماً انو المظاهر خداعه
حقيقة والله لا تغرنكم المظاهر و التسميات عشان تركبو التونسية زي 😞
.

أكتب لكم قصتي هذه و أنا أرتشف كباية جامبو من النعناع 😷
.
.
محمد طارق | زول درويش.

من عجائب وغرائب الفيس بوك!

#من_عجائب_وغرائب_الفيسبوك!

تكون قاعد في أمان  الله 😌 جُبُق الماسنجر ينط ليك في وشك! 😨
زي لمن تكون قاعد في البيت ويجيك ضيف يداهمك و أنت ما متوقعو! 😱
اها تجيك رسالة : هلا ✋🏻
وانت بواجب إكرام الضيف لازم تشوف منو البدق في الباب و ترحب بيو!  😊
فشنووو تقوم ترد علي الرسالة : اهليين كيف حالك؟ 😊
أنت هنا عرفت الضيف منو و رحبت بيو و سالت عن حالو!
يقوم هو يقول ليك تماام الحمدلله و يسكت 😶
وأنت تكون منتظرو يبادرك بنفس السؤال كنوع من العادة ولو ما عادة نقول مجاملة ياخ !!!  😣
لا ! ولسه صاحبنا ساكت!  😶

اها هنا في اللحظة دي بجيك إحساس الضيف البجيك من هناااااااااك و أول ما تستقبلو و تضيفو، يقعد   و يمسك خشمو عليو!
و يطلع تلفونو يطبظ فيو!
او يطقطق اصابعو و يعاين للسقف!!
الزول ده ياربي بفتش في عنكبوت ولا شنو؟! 😂

طيب نقول إحتمال يكون ما عارف يخش عليك كيف لكن ما لدرجة انو يسكت قدر ده و ما يبادر حتي بالسؤال عن حالك! 😠

الوقت داك انت بتكون شغال جو نفسك " والله انا كويس!  كدي ارفع راسك عاين لي!  👀
اوقسوم بالله فل الفل الحمدلله!
لكن ما تسكت ياخ!
قول اي شي! 😩
ان شاءالله قول لي ما عندك شاحن!  مالو عادي يعني! ضيوف الزمن ده اهم شي عندهم الشاحن قبل العصير!  عادي ياخ!
طيب أديني رايك في السقف البتعاين ليو ده!
افتح خشمك ياخ! ما ممكن " 😑

المهم بجيك إحساس كده غياظ لا تعرف تتكلم معاو ولا تعرف تسكت تخليو! 😑
.
فشنو النوعية دي مهما حاولت تكون ظريف معاهم و تحاول تعمل موضوع حيقفولها طرشا و عميا في وشك!  😷
فشنووو حدك معاهم اهليين، سألك خير و بركة، ما سألك أشتريت رأسك و تمضي الحياة عادي زي الزبادي 😁
.
.
محمد طارق | زول درويش.

زول أشتر!

#زول_أشتر!
.
قال ليك العبدلله جاتو فيزا من واحد قريبو للسعودية،،  صاحبنا ما صدق!
من يوم طلع الجواز بتاعو اي زول يلاقيو يسلم عليو و يمرق ليو الجواز.. 
تحلف تقول الجواز الامريكي! 
فرحان بيو فرح!
ليهو حق يفرح  اصلا ده الشي الوحيد البقى يفرح!
المهم الجماعة اشتغلو معاو وصايا تقيله
لانو ما عندو اي معلومة عن السفر!
و عارفنو اشتر!
ياخي بص سياحي بالغلط ساي ما حصل ركبو!
حدو الحافلات الروزا
و اللوراي و السفنجات!
ده نوع البتلب بالشباك ولو الحافلة قفلت يتشعلق فوق في سبت الحافلة مع كراتين الحاجات!
اها كلمو انو مفروض يعمل شنو من يدخل المطار لحدي ما يصل السعودية!
*اول شي الطيارة مافيها شباك بتفتح!
*مافيها بوري سيرا عشان ما تقول للكابتن سمعنا بوري!
*السواق اسمو كابتن!
*مافي كمساري في بنات ظريفات حلوات حايمات اسمهم مضيفات!
*تطلب منهم اي شي بالذوق بجيبو ليك !
*تسال المضيفة من مقعدك بتوديك ليو! ما تقعد ساي!
*سفتك ما تجدعها تحت الكرسي!  وما تسف زاتو لحدي ما تصل! السافي ليها شنو!
*ما ترفع كراعك في الكرسي القدامك!  اقعد محترم!
*ما تهبش كتير!  حركات القلق بتاعتك دي خليها!
*شنطتك ختها فوق ليك في الرف ما تحضنها معاك! مافي زول بنشلا !
*داير تتسير امشي الحمام براحة بكون نهاية الطيارة!  مافي حاجة اسمها وقف الطيارة قرصة كده بالجمبه!
.
الجماعة ما ادوهو نفس كلو كلو! ما خلو ليو جمبه يقبل عليها!
اها جا اليوم المسافر فيو ودعهم كلهم اهلو وناس الحلة و اصحابو و اتوكل!
ركب الطيارة و زي ما قالو ليو عمل..
و اول ما الطيارة قامت العبدلله اتشهق!
خشت فيو خلعت الإقلاع!
و بقى يكورك!
نزلوووووني! 
نزلوووووني! 
شكيتكم لله!
شكيتكم لله!
الطيارة كلها تضحك فيو!
الراكب الجمبو مسكو سريع و بقا يهدي فيو !
لحدي ما الطياره استقرت هدا و استكان !
.
اها كل ما يجي يعمل حاجة يتذكر الوصايا و يعمل بيها!
اها بعد كم ساعة كده وصل..
خمخم شطنو و مرق لاقى قريبو..
-حمدالله علي السلامة و الرحلة كيف ان شاءالله انبسطت!
-والله في البداية كده الطيارة دي عملت ليها حركة ما حبابها لكن تاني مافي عوجة تب!
-لكن يا الطيب الجماعة ديل و الله عندهم اكل طاعم طعومية عجيبة خلاص!
انا غير العيشة ما فرزت فيو شي!
.
العبدلله بحكي لقريبو و مبهور بالمطار و يتلفت زي مروحة الطربيزه!
.
اها وصلو البيت كده العبدلله قال لقريبو والله الطيارة دي فيها حلاة كراسي!
مريحة راحه!
تقعد في الكرسي كده تحلف تقول داير يبلعك!
العجب السنادة حقت الراس!
طلعت ليك قلمي بتاع البيق..
و كتبت فيها تذكار كبييير اي زول يقراو..
"من العبدلله لاهلي في كل السودان..
ودعتكم الله و الرسول"
و تحت  كتبت رقم تلفوني الاريبا عشان لو في جكسوية قرتو تضرب لي.. أخوك حنكو سنين والله !
.
في اللحظة دي القريب اتحسبن
و اتشهد ولا حول ولا قوة الا بالله!
و جاتو صدمة سكري
و ختا يدو فوق راسو
وعاين ليو كده وقال ليو

"جيت تكحلها طبظتها!
ده حالتو الجماعة وصّوك "!!
.
.
تمت.
.
.
محمد طارق | زول درويش.

كدي نتخيل!

#كدي_نتخيل!

بمناسبة البرد الظريف ده والتلج الجاي علينا في السكه ده. .
كدي نتخيل بس!
نتخيل انو التلج نزل علينا
اي زي شغل الافلام داك
السماء بتنقط تلج !!
والأجواء كلها بقت ابيض في أبيض
والشوارع اتقفلت
والناس اجزت!!
و اي زول لمه حطبو و طلحو عليو
و وولعو الدفايات
و اشعلوا النيران!!!
ولبسو تقيل و اي واحد مردف 3 بناطلين و 5 فنلات و طاقتين في الراس و 7 شرابات ده غير السيوتر و القفازات! 
شايفين كلمة قفازات دي حنينه كيف!
اها اي عيلة اتلمت حول المدفئة و عملو شاي مسخن بوخو طالع
و قعدو اتونسو
و ضحكو و نسو التلج المدور برا..

وبعد ساعات يتوقف تساقط الثلج..
والناس تطلع الشوارع فرحانه!
ياسلاااام يا!
اجواء خنفشاريه!
و الناس تلعب بالثلج
في جزو حيكون قايلو ايسكريم تلقاو شغال سف ساي!
اها و الشفع يعملو ركشة من الثلج
و فيهم البعمل بيت وراكوبة من الثلج
و  يعملو حرب كرات الثلج
و سك سك
و غميضه
وام 15
و كمبلت
و شلع بلع!
و الشباب يرقدو في الثلج ويعملو حركة الفراشه ديك الواحد يفرفر بيدينو و كرعينو..
و يتزلجو في الشوارع!!
و البلاعات تتجمد.. والخيران تتقفل..
و يعملو حلبة تزلج في الميدان
واي واحد يربط ليو علبة صلصة تحت جزمتو و يقوم يفحط في الحلبة!!!

اهاا النيل يبقى حلبة تزلج كبييييييرة زي حقت مول عفراء والتماسيح الفي البلد دي تنشف!
اي لازم تنشف و تبقى تماثيل
تتخته في شارع النيل و ياحبذا لو ختوها في مدخل شارع القصر !
واعمامك الكبار يقعدو ينظرو " هسه التلج ده لو نزل قروش
ولا نزل غاز ولا نزل بصل ما كان اخير !!

فشنوووو الناس تنسى الجانب السلبي من الجو ده
و تركز مع الحاجات الحلوة دي ..
.
.
فشنوو كدي نتخيل !!
.
.
محمد طارق | زول درويش.

شريك معاك!

#شريك_معاك!
.
طيب وقت كنا صغار الواحد لمن يلقا ليو حاجة سمحه واقعة (قروش، ساعه، لعبه،.... الخ)  اول شي بخطفها و بكورك شريك براااي شريك برااااي اها لو جمبو واحد صحبو بكورك شريك معااااك شريك معاااك!!
نظام يتقاسم معاو الغنيمة دي علي وزن ( من حضر القسمة)!
اها يوم الصباح ماشي علي المدرسة الكلام ده كنت في سنة تامنه،،  معاي صحبي سمين كنت بناديو كابوكي 😁!
اها ونحن خاشين علي المدرسة من بعيد كحلت ليك ورقتين حمرا 😱 خمسة الف خمسه الف ( خمسه جنيه خمسه جنيه)  الوقت داك لونها كان احمر ،، خمستين يعني عشره الف يعني معناها انت بقيت جلابي علي اصحابك! يعني رطبت ياماان تاكل باسطة وتشرب بارد و تشتري خشاف بالبسبوسه 😌
اهااا قمت كشفت براحه كده لصحبي لقيتو ما جايب خبرها بس فكيت الجريه وبسرعة البرق خمشت ليك الخمستين من الارض وبقيت اكورك شريييك براااااي (هنا قطعت الشك وبقت حلالي 😌) و انطلقت جوه المدرسة!
يلا تعالو شوفو كابوكي!!
والله جاري وراي جري! ولا ابوبكر كاكي!
بس خاتيها لي في خطراتي
الزول ده لمن خلعني 😨
طلع جراي ود اللذين 😂😂😂
لفيت بيو المدرسة كلها لمن نفسو قام في الاخر وقف،،  والله بتذكر شكلو لحدي هسه 😁😂
المهم قطعتو معاو سته صفر يازول انا قلت شريك براي و انت ما قلت شريك معاك!
و هو يحلف انو قال شريك معاك!
بقينا شغالين كده لحدي فسحة الفطور!
غايتو ما فضل ليو الا يبكي،، اصلو ابيت اديو،،
المهم زعل مني و حنني  قمت عزمتو نهاية اليوم داردمه و قرقاش بالبامبي و الشطة ودفعت ليو في المواصلات 😁😁
.
و حكينا القصة دي ليه عشان في ناس كتيره بقت تخمس معاك في حاجاتك!
والله صحي!
حتي في تلفونك ده في المواصلات تلقا واحد مادي راسو و بكشف 😂😂
شعب يحب التخميس بصورة غير عادية 😅
.
.
التخميس: مشاركة الشئ مع شخص آخر 😎
.
.
محمد طارق | زول درويش.

سألتني!

#فرحة_عمر 😍💗
.
سالتني: ليه في العقد الرجال و الاولاد بفرحو و البنات والنسوان ببكو؟!
استحضرت طوالي كم عقد حضرتهم و الشعور الحسيتو في الوقت داك..
فرحة الرجال باخوهم او ولدهم او صاحبهم انو اخيراً إتلما مع شريكتو الكان دايرها،،
البكاء والدموع عند النساء  فرحة برضو انو اخيراً بتهم او اختهم او صحبتهم إتلمت مع زولها،،
العقد اشهار للناس انو فلانه دي ياجماعة
بقت حقتي
البتعب عشان اصل ليها
البفرح بكلمة منها
البستند بيها
البهاتي عليها،،
خلاص يا ناس دي حقتي أنا 💗
يلا اي واحد خاتي عينو يشوف نصيبو وين،،
دي مرتي و حتكون ام اولادي و رفيقة عمري 💑
و هي كمان حتقول ده زولي وده حقي وده راجلي و ابو اولادي وسندي وعشمي💑
و يبدو يعيشو حياتهم بروح جديدة،،
.
فشنو الفرحة دي ماااااااا بتتوصف،،
احساس انك كنت محروووووم من حاجة حلووووووة شديييييد ونفسك فيها و في النهااااااية بعد تعب لقيتها ووصلت ليها 😌
وانت بتحضر في العقد ياااااالله يااااخ! 😍
حتدعي انو ربنا يجمعك مع شريكك و عادي تلقى نفسك من غير ما تحس مسكت التلفون و ضربت ليو،،
ومع الفاتحة و قولت أمييييييييييين
و صوت الزغاريد
و صوت التهاليل
و ضرب النار
و التباريك..
جسمك كلو يكش و تهرب دمعة من عينك شايله فيها كل الذكريات الجميلة البينك وبين حبيبك.. ☺
.
وزي ما غنا حسين!
"بتمناها ما تكون سنه
زي كل سنه بتمناها 
بتمنا فيها حبيبتي لي
لابسه الزفاف متحننه
ماسكاني من يدي اليمين
واهلنا واقفين حولنا بالفاتحه
في بيت الحلال يا ناس نتوج حبنا
بتمناها..
بتمنا هذا اليوم يجي 
البس قميصي وبدلتي 
ويجوني كل اصحابي ديل
زملاني واولاد دفعتي
ويغنو في البيت للصباح
أخواني وأولاد حلتي
واقول خلاص دي ست البنات
بقت حلالي ودنيتي
وافرح شديد لمن اشوف دعوه 
أبوي ووالدتي 
يالله يا قادر كرييييم
خلي الفرحه تعمنا 
بتمناها..
بتمنا تضرب لي تقول
الاخرك ترجع شنو  
وريني بي سرعه الحصل 
بي سرعه قولو معاك منو 
ارجع سريع للبيت انا 
عشان قليبها اطمنو
دي عمري وأديتها العمر
قليبها كيفن احزنو
قليبها ده الصار ليا بيت 
وليا سامح اسكنو 
مهمتي وفرضآ علي
علي لااااازم اطمنئها 
بتمنااااها ..
بتمنا اضرب للصحاب
واتمنا ليهم حظ سعيد
تاني مافي خلاص سهر 
لا مرقه لا مشوار بعيد 
لا شارع النيل لا البحر 
 لا توتي لا الكبري الجديد
لا كافي نحضر كوره في 
يا حليلو اتلتيكومدريد
انا تاني من وقت العصر 
ح أبقه للحب الاكيد
ح أبقه كلك سيد هووواي
ياا اليا يحفظها ربنا
بتمناها.. ❤"
.
.
ياخي ربنا يجمع كل حبان في الحلال و يكتب ليهم السعادة 😍
امييين يارب 👐
.
.
محمد طارق | زول درويش.

جن ياااخ!

طيب تعالو اوريكم حاجة
بما انو الناس اغلبها بقى ما عندها موضوع..
فشنووو  معظم العلاقات الحالية بقت عبارة عن عدم موضوع..
الولد ما عندو موضوع يقوم يربط مع وحده عشان ما عندو موضوع..
فتقوم البت تمشي الولد عشان هي ما عندها موضوع..
و هو عارف انها ما عندها موضوع وقبلت بيو لنفس السبب يعني ما علاقة مستقبلية..
و هي كمان عارفاو حنكو بيش بس يلا مالو تقضي وقتها عشان ما عندها موضوع..
فيقوم يبرمج بيها مرقات وطلعات و دخلات،،
و هي تبرمج بيو ده سبب تمرق بيو من بيتهم و الملل العايشه فيو،،
وهكذا،،
اها الحكاية لمن تبقى جد و الكلام يخش الحوش ده كلو يتغير،،
يشوف غيرها وهي تشوف غيرو،،
يلا النوعية دي خربو اي شي حلو في العلاقات جرحوهو و شوهو سمعتو (الحب)!!
يعني زمان الواحد عشان يقول لوحده بحبك بياخد ليو شهور و لمن يلاقيها يتكبكب
و يعرق
و يطقطق اصابعو
و نفسو يقوم
و يتمتم
و يتزنق
و يتسمر في مكانو
و يحك راسو و رقبتو
المهم بتحول لمخلوق مكعوج
في النهاية يقولها بخجل و صوت وااااطي ،، 
ليه بحصل معاو كده؟!  عشان مارقة من  جوه قلبو..
كذلك البت عشان تصرح بحبها لواحد بجيها شلل و ارتعاش عضلي!!
لكن كدي تعالو شوفو الهسه ديل،، 
لاقاها في الفيس!
ممكن نتعرف؟!
التشغيلة المعتاده!
بعد اسبوع طرح ليها،، 
عادي من غير اي كبكبه تووووش كده بختها ليها!!
ما فارقه معاو لو وافقت او رفضت لانها من لسانو بس،،
و البنات يحضرو في التركي و الهندي و الديك الرومي و يجو يشبكو الواحد انت ما رومانسي وما عارف شنو!!
.
.
غايتو جنس محن!!
الحب ده لو كان بتكلم كان طلب لجوء سياسي و لا شاف ليو عقد عمل اتخارج منكم لكنو مسكين وقعتو شيييينة.
.
و كما قال الحبيب ابو عركي البخيت :
" احساس بحسو غير عادي ونحوك انت تحديداً..
بحبك حب بحبك حب ثقل مويه المطر المن السما بتنزل..
قدر رمل البحار ال ليها بستقبل..
عدد سيقان شجر مد البصر مثمر
عدد ناسا بتتزواج وتتوالد وتتناسل وتتكاثر..
اقسم ليك يا آثرة بحبك حب ما حباهو جن لي جن
ولا حباهو زول لبشر
ولا جايين من الارحام من بعدك ومن بعدي حيعرفو كيف دا كان بحصل!! "
.
جن ياااخ !!!
.
.
محمد طارق | زول درويش.

فراغ!

فراغ!
مستلقي علي الأريكة
أضع قدمي فوق الأخرى،
أمامي الحائط بلونه البيجي
معلقة به بعض اللوحات التي تنظر الي
أو ربما تطالبني أن أشاركها هذا الصمت!
أحكي لها ما يجول بخاطري
وربما تود أن أكون صديقها!
عشيقها!
حتي أبوح لها و تبوح لي بما في دواخلها !
ولكن ذلك الكرسي الخشبي يحدق بنا!
يبدو أنه مشتعل بنار الغيرة!
لا يود أن أسرق منه رفيقته اللوحة التي لطالما شاركها الصمت!
و خلا بها وقت إبتعادي!
لكن الطاولة توصي اللوحة بعدم الثقة فيه!
لطالما إحتوى غيرها! وكان ملاذ راحة لهم!
فتتحدث و تّشاركنا الثريا المعلقة على السقف وتقول أنا اراكم جميعاً! تغمرنا بضوئها الأبيض الممزوج بالذهبي !
فيعلو صوت السجادة من أسفل تقول كم تتمني لو بإمكانها أن تأخذنا عبر الريح و نجوب العالم و نقتل الفراغ هذا!
فتقاطعها الساعة وصوت عقاربها يشي بشئ غريب !
تُحدثنا عن قصة قديمة و أن الزمن يمضي وكل ذلك سيتغير هكذا هي الحياة و سوف يأتي يوم لن نكون فيه سويا!
نوافقها الرأي جميعاً
نعود لنحتفظ بصمتنا و نقدس وحدتنا!
أعود إلى أريكتي الجميلة لتحملني و تحمل همومي المتراكمة معي .
.
.
محمد طارق | زول درويش.

معلومات عن الشعب الإسباني

#معلومات_عن_الشعب_الإسباني!
#هل_تعلم!!

هل تعلم أن الفتاة القصيرة يمكنها أن تتغطى بالبطانية و تتلفا بيها كم مره زي فطيرة الطعمية!

‏هل تعلم أن الفتاة الطويلة إذا دخلت قلبك تظل سيقانها برا!

هل تعلم أن الفتاة القصيرة السمينة زي أنبوبة الغاز!

هل تعلم أن الفتاة الطويلة الضعيفة لمن تجي ماشه زي النعامة السكرانة!

هل تعلم أن الولد القصير شكلو زي يد الفندك!

هل تعلم أن الولد الطويل عامل زي الأريل !

هل تعلم أن مثلث الموت عند الاولاد هو الفتاة التي تكون :
شينه!
متفلهمة!
قطيمة!

هل تعلم أن نظرة الفتاة الوشها لون ويدها لون تاني عند الاولاد زي نظرة الولد البسف عند الفتيات!

هل تعلم أن حواجب الفتيات هذا العصر تشبه رفارف العجلات ماركة الفوريفا و الطرزان في عصر المغبشين !

هل تعلم أن دقن الولد لن تقفل مالم جلحاتو تعبر و تقوم ليو صلعة !

هل تعلم أن الفتاة الإسبانية لم تظهر نهائي في دعاية شامبو في تاريخ البشرية!

هل تعلم ولا ما تعلم؟
المهم هسه أنت تعلم!
لا تخرج قبل أن تعمل أعجبني و تتحسبن وتقول ديشاااك !
.
.
محمد طارق | زول درويش.

الغاز قطع!

#الغاز_قطع!
.
كعادته كل يوم خميس، يعود إلى المنزل مرهق من يوم طويل ينال قسط من الراحة، ليخرج بالمساء مع أصدقائه، فور وصوله إلى المنزل توجه إلى غرفته و إرتمى علي سريره من شدة التعب و هول المعاناة التي خاضها للحصول على مقعد مهترئ في حافلة متهالكة كي يصل إلى منزله.
أغمض عيناه دون أن يشعر، ترك السرير يحتضنه، يغمره بالدفء ينقله الي كوكب الراحة، يحرك يديه يتحسس برودة اللحاف، تنفس الصعداء، هاجت كل حبيبات الدم في جسده و ثارت في عروقه، كثوار ضاقت بهم المعيشة فنفثوا نار الغبن علي الحُكام، شعر بنبضات قلبة تطرق كل أعضاء جسده المرهق ، و تنخفض رويداً حتى تصل إلى وضعها الطبيعي و يلفها الصمت،
لم يكلف نفسه عناء تغير ملابسه فهو الأن في أوج التعب،
كانت المروحة تمارس لعبتها تتحرك و تدور كساحرة تردد تعويذات أمام أحد ضحاياها تحرك قلادة في يديها يمنة و يسارا حتي ينام مغنطيسياً دون أن يشعر.
.
عند الرمقة الأخيرة، كانت والدته تقف أمامه بجسدها النحيل و ظهرها المنحني، تضع يديها علي خصرها، و تربط رأسها بما يبدو شال قطني، تنبعث منها رائحة الثوم الذي يمكنه برائحته النفاثه أن يخرج شخص من غيبوبة كاملة، أن يعيد الوعي لسكير أكمل لتوه قنينة كاملة من النبيذ الأحمر المعتق، دخلت الرائحة الي أنفه دون إستئذان، فترفعه منها، كمصارع محترف أدخل أصابعه في انف مصارع أخر يتعارك معه ليرفع رأسه الي أعلى،
ياترى ماذا تريد والدته منه في هذا الوقت؟!
ألا تعلم انه لا يحبذ أن يوقظه أحد؟!
تركت والدته الكلمات تخرج من فمها لتصيب طبلة أذنه!
"الغاز قطع قوم شيل الانبوبه وغيرها،، قطع لي في نص الطبيخ قوم سريع عشان نخت ليكم الغدا "!!
لم يعلم ما حل به و لكن تلك الكلمات كانت أسوأ من خبر وفاة أحدهم!
يا رباه!!

وضع يديه فوق رأسه،  صمت طويلاً، فلا توجد كلمات توصف ما يشعر به الآن،
مر أمامه شريط سريع لتلك الصفوف التي ليست لها أول ولا أخر ! 
الشمس المنتصبة أعلى الرؤس!
تمارس أشعتها السيطرة على كل شيء!
النساء و الرجال!  الصغار و الشباب و الكبار!
كلٍ يحمل علي كتفه أنبوبة فارغة أو يركلها بقدمه لتّدحرج فوق الارض!
الميادين العامة المعبئة بالبشر و أنابيب الغاز المختلفة الالوان!
كل ذلك يشي بيوم كارثي!
وربما لن يتحصل علي أنبوبة!
لا شيء متوقع!
لن يخرج مع أصدقائه كما اتفقوا!
و ستكون جمعتة في  نقل أنبوبته كل خمس دقائق خمس سنتيمترات!
ربما يستمر الوضع أيام! 

الوضع يبدو مثله كمثل الجهاد، فالجنود يحاربون من أجل حماية الوطن و ردع الغزاة و حماية الدين!
و نحن الأن نحارب من أجل بطوننا الخاوية !
لعّن كل من له يد خلف هذا الوضع !
.
.
بعد ساعة أستيقظ ليجد أخاه الصغير أمام ناظره وهو يقول له "قوم ختو الفطور! "
لم يصدق!  يا له من كابوس مرعب!
إستعاذ من الشيطان و توضأ و صلى ركعتين شكر!
و ذهب لتناول وجبة الغداء مع أسرته و أكل كما لم يأكل من قبل!
وقالت والدته " قبيل الغاز قطع لي لكن الحمدلله عندنا انبوبة تانية ركبتها "
تبسم لها و خرج يكمل يومه بكل بهجة .
.
تمت.
.
.
محمد طارق | زول درويش.