كُبي نُص!

#كُبي_نُص!
.
العبدلله اصحابو ضربو ليو تلفون "ياعمك اطلع نمشي على الجمبه  نشرب لينا جبنه من محاسن و عشرة ونسة ظريفة كده "
العبدلله شال جزلانو و طلع..
اها قاعد كده مع اصحابو و هم نوع الشلة العاملين فيها مثقفاتية و الونسه كلها سياسة و شمارات عالمية،
"-اسمعني شفت الاتراك اولاد الذين ديل! جابو ليهم طياره روسية واقعة!
- لكن ما دقسو ما عارفين الروس ديل دمك و اتجاه واحد!
- عمك بوتين ده بس سرب واحد يفكو ليهم يخليهم يتضايرو!
- اسمعني انت المصرين ديل مالهم! فجأة كده قبلو علينا!
- والله سامع بقولو قبضوهم تجار عملة وما عارف شنو!
- ياخي الدولار زاتو وصل حداشر و دقداق!
- انتو عارفين الحرب العالمية الثالثة حتكتم قرييب !
- بالشايفنو ده معاك حق!  ادوها سنة سنتين لقدام نلقى روحنا شايلين سلاح و بنحارب في اثيبوبيا و مصر وليبيا و الدول الحولينا دي كلها!"
الونسه كلها كده!
فجأة العبدلله لله يلقى نفسو في الحدود بين السودان وأثيوبيا!
حرب قايمه و ضرب لي رب السما!
دخاخين!
طياره واقعه هناك محروقة!
و تاتشر واقف هناك مولع نار!
عساكر مجدعين!
و واحد جارنو جر عفص ليو لغم قطع رجلو!
دوشكات دي واقفه شبط!
الجيش السوداني يضرب!
الجيش الاثيوبي يضرب!
و الناس زاحفة لقدام!
وووب العبدلله وقع في حفرة!
ما فتح الا وهو في قبضة الجيش الاثيوبي!
كيف! و بوين!  الله اعلم!
خاتنو في غرفة كده مضلمة بس فوق ليو لمبه شغالة تتحرك يمين شمال!
العبدلله ما قادر يشوف كويس!  شكلو الجماعة ضربو في راسو بالدبشن بتاع الكلاش! و لسه هو بحاول يجمع!  الجابو هنا شنو!  وديل منو!  والحاصل شنو!
شوية شوية بدا يفتح عيونو!  اول ما فتح كويس عاين للعساكر الواقفين حولو! كلهم نسوان!
الجيش الاثيبوي نسائي!
في اللحظة ديك اتذكر انو اول رحلة تاريخية قامت بيها الخطوط الجوية الاثيوبية طاقمها كلو نسوان!  من بتاع المرور والعتاله البرفعو الشنط و الجرسونات و السواقين!  جت نسوان!
انبهر ليك بالجمال الواقف قدامو ده!
نضيفات نضافه !  ابتسامة تكتل!  و السنون من شدة ما بيضا لمن تجهرك! 
العجب السمار!  لا حول ولا قوة الا بالله!
العبدلله جاتو صدمة!
هسه جنس ديل بحاربو بيهن!
هي لكن ما ببالغو!
دي خلق يرفعو في وشهم سلاح!
الناس دي جنت ولا شنو!
جاتو وحدة سمحة سماحة مبالغة! دنقرت عليو كده!العبدلله لمن اتشهق! وبلع ريقو!
سالتو تشرب شنو؟! نحن من عوايدنا نقدم للأسرى اكل و شراب!
العبدلله شال نفس طويل و غمض عيونو نظام مكسوف و قال ليها بكل حنيه " لو سمحتي ممكن بس قهوة بدون دوا!
.
.
اها فتح عيونو كده يلقى ليك محاسن واقفه في وشو!
محاسن دي قدر الضربة!  حاجة كده جامبو! و غازه يدها في نصها!
و تحمر ليو!
و تعوج في خشمها!
وقالت ليو باستغراب "اجي!  اجي ياود امي! "
اتلفت عاين لاصحابو قاعدين و لسه شغالين تنظير !
لعن الواقع!
و رفع راسو لمحاسن وقال

" محاسن كُبي نُص! "
.
.
تمت.
.
.
محمد طارق | زول درويش.

حين تبتسم!

#حين_تبتسم  😊
يتوارى القمر خجلاً خلف السحب..
تتراقص الاشجار طرباً..
تنحني لها الجبال تجليً..
وتصمت الرياح امامها
وتتجمد الامواج مكانها ! 
.
حين تبتسم يصبح الخريف ربيعاً ..
والليل المظلم صباحاً مشرقاً..
وتلك الفراشات التي تحلق فوق الازهار
تصفق لها بجناحيها ..
وتتحول الغربان
لعصافير جميلة مغردة مبتهجة!
.
حين تبتسم تقتلني غمازتيها ..
و ذلك الزمام اللامع علي انفها..
تصيبني حمى العشق..
فهي افريقية سمراء..
لها من الجمال مالم يكن لغيرها!
.
حين تبتسم أذوب عشقاً في تلك الابتسامة
اخضع لها
فتأسرني و تضعني خلف قضبان الروعة..
من اين لها بهذا!
الا تعلم انه سلاح قاتل!
قاتل للقلوب!
قاتل للانفس التي تقدس بهاء الطلة!
سبحان من سواها !
.
حين تبتسم يبتسم معها الحظ..
يبتسم معها الكون..
تبتسم خلفها الحياة..
عندما تبتسم العالم يبدو أجمل دوماً..
عندما تعطيني تلك الابتسامة
تكون أفضل ما حصلت عليه قط !
.

فقط ابتسمي  😊

.
محمد طارق | زول درويش.

لعنة الصمت!

في أغلب الأحيان تُصيبنا لعنة الكتابة، فترى الحروف عند كل شئ، تتدفق و تنساب الكلمات الي راسك من كل صوب و حدب ، وتبدأ تراقصها بكل أريحية، و جميل ان يطاوعك قلمك لترتب تلك الحروف و تُجملها و تقدمها لنفسك و للجميع.
و في بعض الأحيان تُصيبنا لعنة الصمت، ترفض كل الحروف حتى أن تقترب منك، تجعلك وحيداً بائساً، محاولاً أن تُخرج من عقلك شئ حتى و لو بالقليل، و لا تنفك من المحاولة، و لكنها تُشي بالفشل، و تبدو كولادة متعسرة،  فتتركها لحين الهام.
.
محمد طارق | زول درويش.

يا رفيقه!

#يا_رفيقة

هل تتذكرين تلك الليلة التي كنا نتحادث فيها مطولاً و خططنا سوياً بما سنفعله في مستقبلنا الواعد،
انه ذات شتاء محمل بالمشاعر في أمسية رومانسية سنجلس و أمامنا يطل برج ايفيل،
نراقب غروب الشمس و هي تودع السماء،
و تتشابك أيدينا،
و ترمي أنت بجسدك علي حضني،
لنخفف علي بعض البرودة و انخفاض الحرارة ،
لترتفع مجدداً و يزداد القلب خفقان،
و عند لحظة إنعزالنا عن الكون و تأملنا لتلك التحفة المضيئة، ربما نتبادل بعض كلمات العشق، و لكن أعتقد أن الصمت هو أبلغ و أجمل من أن تتفوه شفاهنا التي اصبح لونها رمادي من البرد بشئ ،
هل تتذكرين حينما قلت لي أن باريس هي حلم حياتك الوردي!
و أننا سوف نتجول بين جاداتها الواسعة و ساحاتها التي تعج بالمقاهي و شوارعها الاَمنة!
عندما قلت لي انك ستأخذيني الي جادة الشانزيليزيه
و الي مقهى فوكيت Fouquets الرصيفي أحد ابرز معالم الشانزيليزيه، وموقعه الاستراتيجي و الفريد و المنظر الذي يتيحه من تلك الزاوية!
و نرتشف عنده قهوة ساخنة و ترتشف اعيننا النظرات حتي لا نشبع من انفسنا!
حينها قلت لك ستكون وجهتنا التالية هي جسر الفنون و نضع قفلنا الخاص وسط اقفال الحب التي تثقل كاهل جسر الحب، و نترك معه امانينا و كل ما نحلم به!
هل تتذكرين ذلك؟!
أعلم جيداً أنك لن تنسي تلك الليلة!
.
و لكن يا رفيقه كل هذا تغير!
لن نراها!
ولن يتحقق ذلك!
لمنعهم إعطائنا تأشيرة دخول!
هل تصدقين ذلك الهراء؟!
لا عليك و لكن تذكري أن قلوبنا لا تحتاج تأشيرة فهي تستقبل طالبها بكل حفاوة و ذلك هو الأهم.
.
.
محمد طارق | زول درويش.

نينجا

#نينجا
.
كلمة اطلقها الشعب السوداني علي المرأة المنقبة ،  تشبيه بمحاربي النينجا الذين يتوشحون و يتلثمون بالاسود..
.
طيب نحن كشعب سوداني مافي شي بعجبنا،
لا بعجبنا العجب ولا الصيام في رجب،
واي شي عندنا فيو راي و تنظير!
و كده وب و كده وبين!
فشنو الحاجة البقت حاصلة عموماً هي التريقه في المنقبات،
اطلاق الدعابات
و التشبيهات البتأثر تأثير كبير علي البت المنقبة،
نحن بنكون قاصدين الفكاهة ليس الا لكن في نفس الوقت ما احترمنا فكر الفتاة المنقبة و نقصنا من اهمية النقاب و صنعنا حاجز لكل فتاة دايرة تتنقب ،
وعادي جدا ممكن البت تغير رأيها و تقول مادايره اتحجب او اتنقب عشان صحبتها ضحكت فيها او سمعت واحد بتريق عليها!
الفتاة حساسة جدا اي شي ممكن يتقال يأثر فيها!
واي كلمة بتقيف عندها و بتحسبها!
.
فشنو مفروض نقدم ليهم الدعم المعنوي من كلمات تليق بهم و دعوات من القلب،
لانو الفئة دي ماشه في إندثااااااااااااااار،
و نقول ربنا يثبتهم و يقويهم  و يحفظهم
و يهدينا و يهدي الجميع.
امييين 👐.
.
.
محمد طارق | زول درويش.

المعلم

من الشخصيات العندها دور كبير كبير جداً في المجتمع، و ليها تأثير علي مدي أجيال كثيرة،
هي شخصية المعلم (الاستاذ).
فالمعلم مهما قلنا و حكينا و اتكلمنا ما بنقدر نوفيو حقو،
المعلم هو الوالد الثاني (ام، اب) ،
هو القائد لأجيال واعده و متطورة فكرياً و ثقافياً واجتماعيا ً ،
هو المربي،
هو اساس كل شخصية ناجحة،
هو مطور الشعوب،
لمن كنا في الاساس كان الاستاذ المسئول من الفصل بنطلق عليه (ابو الفصل) و فعلاً هو كان اب لتلك المجموعة من الصغار،
لمن اتنين يتخاصمو مع بعض هو بكون الفيصل بينهم،
لو في رحلة هو بكون معاهم،
لو في واحد من الطلبة عندو اي مشكلة هو بحلها حتي لو كانت داخل منزل الطالب ،
و لو الفصل مميز بقولو اولاد الاستاذ فلاني مميزين،
حتي لمن نمشي لمرحلة تانيه، بنفضل نتذكرهم و نلاقيهم و نسلم عليهم و يقدمونا للجيل البعدنا بكل فخر،
حتي بعد نخلص الجامعه بنقول درسنا علي يد الاستاذ فلان.

المعلم هو النور الذي ينير للمظلمين طريقهم، صديق المعرفة وعدو الجهل، فهو الشامخ في عالم المعرفة والعلم، وهو الذي يكون قادراً على تنمية الفكر والعقل لدى الطالب.

و هو من اكثر الناس الخاضو تجارب في الحياة و فهموها جيداً و بحاول بقدر الإمكان يقدم لينا خلاصة تجاربو و يعلمنا من حكمته،
و بنجد اي استاذ عندو كاريزما خاصة  و اسلوب خاص به، و المعلم مهما يعمل و يعاقب همه الوحيد مصلحة طلابه و انو يشوفهم ناجحين وفي اعلي المراتب.

المعلم هو الربان الذي يقودنا الي شواطئ المعرفة و النجاح و بر النجاة من الجهل ، هو الذي يقدم للمجتمع
الاطباء
المهندسين
العلماء
المدراء
الرؤساء
وكل فرد فعال في مجتمعه ناجحاً متفوقاً، كان المعلم له مصدر إلهام وتشجيع ..

لذلك علينا احترامهم و تقدير جهودهم،
و ننظر ليهم بعين الاحترام و الاكرام و الخضوع و التواضع، فالتواضع و الخضوع للمتعلم امام المعلم عزة و رفعة لطالب العلم.

معلمو بلادي الافاضل،
اصحاب الفكر المستنير ،
قدوتنا ،
ومصدر إلهامنا،
لكم منا جزيل الشكر والتقدير
شكراً جميلاً يليق بعظمة الرسالة التي تحملونها علي عاتقكم . 😊

وصدق الشاعر احمد شوقي بقوله :

قُـمْ للمعلّمِ وَفِّـهِ التبجيـلا
كـادَ المعلّمُ أن يكونَ رسولا
أعلمتَ أشرفَ أو أجلَّ من الذي
يبني وينشئُ أنفـساً وعقولا
سـبحانكَ اللهمَّ خـيرَ معـلّمٍ
علَّمتَ بالقلمِ القـرونَ الأولى
أخرجـتَ هذا العقلَ من ظلماته
ِوهديتَهُ النـورَ المبينَ سـبيلا
وطبعتَـهُ بِيَدِ المعلّـمِ ، تـارةً
صديء الحديدِ ، وتارةً مصقولا.
.
.
محمد طارق | زول درويش.

الرقدو قش!

الرقدو قش!
.
جملة تقال لمن الواحد يفصل!
طيب يعني يرقد سلطة!
طيب يعني يجر واطي!
طيب يعني يتنازل عن شي معين !
.
اها بتستخدم في مواقف كتيره
من ضمن المواقف دي
كسير التلج البصورة خروفية (من خروف) !
اها الرقدو قش ديل الله ما كترهم الا في بروفايلات البنات!
اي!
اي وحدة بتلقى في حسابها كمية من كسارين التلج!
وفي بعض الأحيان يقال لهم (خرفاااان)!
.
كلنا كده بننبسط لمن الواحد يشكرنا او يقول لينا كلام سمح..
لكن!
لمن تكون الحكاية اوفر هنا يستوجب دخول قوات الدعم السريع و ابادة الخرفان ديل!
لانووو ما ممكن بت تصور كراعا وتنزلها في الفيس و تجي انت بكل ما تملك من مشاعر و كلمات و ما عارف شنو و تشبكها
"عثل!  اموت انا ولا انقلب عنكبوت!
حينا و حلتنا زاتو!
دي كراع ولا انقلب باع!
ياخي انت اصلا باع فمافي داعي تتعب نفسك وتنقلب!
يا بوكيمون انت!
لا و شنو كمان يقطع في كراعا شعر!

"كراعك يا السمحه ما زي كراع باقي البنات
كراعك الفي الارض تنزل يقوم مكانا نبات
كراعك كراع غزال ساكيو اسد
كراعك ياسلام جمال  بدون حسد! "
فما بالكم لمن هي تنزل صورتها كاملة!
لا وفي بنات بعملو كده قصد عشان يضحكو في الوهم ديل!
.
هسه في داعي تهبل بنفسك كده!  😒
ياخي انت راجل عارف يعني شنو راجل؟
يعني امور الخرفنه دي ما بتشبهك
ولا حقتك
ولا بتجي اصلا معاك!
.
فشنو بطلو الرقااااااد!
و اركزو شويه
واي شي ليو حدود !
.
.
#كلنا_معاً_لدحر_ظاهرة_الخرفنة 😁
.
.
محمد طارق | زول درويش.

شخصيات من المجتمع

شخصيات من المجتمع..
.
في حياتنا اليومية في شخصيات بتمر علينا يومياً او في يوم محدد في الاسبوع،
يعني بنلقاها حايمه في الحي مثلاً،
بعتبرها شخصيات فعالة لانها بتقدم في خدمات بسيطه مقابل عائد قليل بستفيد منها طرفين،
الشخصيات ديل هم :

- عمك بتاع الخضار، يومي بجي حايم بالكارو بتاعو و يكورك " الخضار  طماطم ليمون جرجير بطاطس الخضار"،
و عمك بتاع التوم و البصل ، بجي راكب حمار و تلقاو يكورك "البوصل البوصل التوم التوووم ".

- بتاع الاُورنيش، نلقاو حايم و بكشكش بالكشكوش بتاعو المصنوع من علب الاورنيش الفاضيه،  و شايل شطنتو المصنوعة من الكرتون و شوال السكر، او شايل مخلايه صغيره في ضهرو فيها عدتو و بكشكش.

- سيد العدة او بتاع البدل،  ده بكون حايم شايل معاو شوالات ملانة اواني منزلية و يبدل الهدوم الرثه و القديمة ب كبابي او حافظات شاي و مويه و صواني وغيرو ،  ومرات في نوع ببدلك بفتايل الريحه الفاضية بصابون غسيل.

- البصلح السراير، نلقاو حايم شايل شنطة حديد صغيرة و بكورك
" صلح السراايير يا!
جنازير!
يايات!
شناكل!
صلح السراايير يا ".

- بتاع الخرد،  عندو كارو ملان خرد و عده منتهية و بشتريها منك و يمشي يبيعها في الدلالة،  و لو اي زول عندو حاجة ما نافعة او مركونة داير يتخلص منها ببيعها لبتاع الخرد،  و نسمع صوتو من بعيد
" الخرد الخرد!
خرد بطاريات،
خرد حديد،  غسالات،  خلاطات،
خرد خرد يا! ".

- عمك بتاع السكاكين، و ده عندو مكنة صغيرة فيها حجر نار في شكل عجلة و بكون حايم و بكورك
" سنن السكاكين يا!
سنن! 
سنن يا! ".

- عمك بتاع حلاوة قطن و بتاع التُرمس و بتاع الايسكريم،  نلقاهم حايمين و عندهم مزماز كده مصنوع من حديد عندو نغمة مميزة "طورررو رور وررور " من تسمعها تعرف انو ده واحد فيهم.

- سيد الطبلية،  و ده عندو طبلية متحركة في شكل دكان صغير، فيها القرقاش و التسالي و الالعاب و الطلق و دقة النبق و القنقليز،  و مسدسات المويه و السُكسُك،  وده حبيب الاطفال و مسيطر عليهم.

- سيد النبق،  ده عندو ناقه "جمل" بكون لافي بيو نص النهار،  محمل باكياس النبق  و القنقليز و الدوم و الدقه و اللالوب،  و نسمع صوتو بنادي " نبق لالوب دوم نبق قنقليز نبق عرديب نبق!  ".

- و سيد اللبن،  ديل بجو الصباح بدري شايلين تمنات اللبن و يدقو البيبان و ينتشرو في الحي سريع سريع،  و من دقة الباب بتعرف انو ده سيد اللبن، بخبط الباب خبط!
و لو ما عندك حق الرطل او الرطلين يديك عادي و الحساب لتاني يوم.
.
"سيد اللبن دور حديدو مني شال رطلي البيجيبو والقروش طلعن كتار..
شال قروشي معاه وروح، لما اشر لي ولوح ايدو من فوق الحمار..
كنت هسي معاهو بنبح فات و شال رطلي المصلح، والقروش طلعن كتار..
سعرو ولع بي حليبو
حوجتي لي تمنه حليبو،
والحمار هنق كمان،
قروشي لو كانت من نصيبو بالسلامه تزيد رصيدو لما ترجع يالحماااار."
.
.
فتلك الشخصيات البسيطة لها اثر كبير في مجتمعنا البسيط،  ولكن الان لم يتبقى منهم سوى القليل.
.
.
محمد طارق | زول درويش.

من علامات الأزمة الاقتصادية

#من_علامات_الأزمة_الاقتصادية
.
.
لبان ماربيلا 2 بجنيه!
لباااان ماربيلا!
يا جماعه
الاصفر الفيو تلاته حبات!
بطعم الموز!  اصلا طعمو دوا وجع البطن في الحقيقة!
لبان ماربيلا لمن تشتري سجارة للناس البسجرو بفضل ليك خمسين المدوره الصغنتوته ديك،  يقوم يديك بيها لبانة ماربيلا!
لبان ماربيلا يا جماعة لمن الناس تدق شيرنق للبوش و بعد الحساب يفضل متين ولا تلتميه جنيه يجيبو بيها لبان و يوزعو الناس تطعم بيو خشمها!
لبان ماربيلا الما بتشيلو الا يكون عندك باقي عند بتاع الدكان!
لا دقيقه!
يعني الجنيه هسه قيمتو زي  الميه جنيه (10قروش) الحديده الصغيره ديك!!!
انتو عارفين انو الميه جنيه دي كانت بتجيب شنو!
بتجيب طعمتين
بتجيب كيسين تسالي( و كب التسالي ولا تبالي فان التسالي ليس غالي)..
بتجيب لبان بطيخ..
بتجيب بالونه..
بتجيب ملح يقعد اسبوع..
بتجيب كمشة فول..
بتجيب سكر..
بتجيب جبنه..
بتجيب كبريته..
بتجيب باسطة..
بتجيب شوكلاته تيتي المربعات..
بتجيب حلاوتين مصاصه كاسو..
ياخي بتركبك مواصلات عديل كده!
معقولة لكن!
لبان ماربيلا يا جماعة!
اتنين ب جنيه!
لبان ماربيلا القوي ده !
البخربش الخشم لمن تاكلو !
لالالالا!
الكلام دخل الحوش و حام و لفه و تلب بالحيطة!
عاد لكن يا الجنيه ما بسألك!
فضحتنا مع الأجانب!
.
.
محمد طارق | زول درويش.

شخصيات من المجتمع

شخصيات من المجتمع..
.
في حياتنا اليومية في شخصيات بتمر علينا يومياً او في يوم محدد في الاسبوع،
يعني بنلقاها حايمه في الحي مثلاً،
بعتبرها شخصيات فعالة لانها بتقدم في خدمات بسيطه مقابل عائد قليل بستفيد منها طرفين،
الشخصيات ديل هم :

- عمك بتاع الخضار، يومي بجي حايم بالكارو بتاعو و يكورك " الخضار  طماطم ليمون جرجير بطاطس الخضار"،
و عمك بتاع التوم و البصل ، بجي راكب حمار و تلقاو يكورك "البوصل البوصل التوم التوووم ".

- بتاع الاُورنيش، نلقاو حايم و بكشكش بالكشكوش بتاعو المصنوع من علب الاورنيش الفاضيه،  و شايل شطنتو المصنوعة من الكرتون و شوال السكر، او شايل مخلايه صغيره في ضهرو فيها عدتو و بكشكش.

- سيد العدة او بتاع البدل،  ده بكون حايم شايل معاو شوالات ملانة اواني منزلية و يبدل الهدوم الرثه و القديمة ب كبابي او حافظات شاي و مويه و صواني وغيرو ،  ومرات في نوع ببدلك بفتايل الريحه الفاضية بصابون غسيل.

- البصلح السراير، نلقاو حايم شايل شنطة حديد صغيرة و بكورك
 " صلح السراايير يا!
جنازير!
 يايات!
 شناكل!
 صلح السراايير يا ".

- بتاع الخرد،  عندو كارو ملان خرد و عده منتهية و بشتريها منك و يمشي يبيعها في الدلالة،  و لو اي زول عندو حاجة ما نافعة او مركونة داير يتخلص منها ببيعها لبتاع الخرد،  و نسمع صوتو من بعيد
" الخرد الخرد!
خرد بطاريات،
خرد حديد،  غسالات،  خلاطات،
 خرد خرد يا! ".

- عمك بتاع السكاكين، و ده عندو مكنة صغيرة فيها حجر نار في شكل عجلة و بكون حايم و بكورك
 " سنن السكاكين يا!
 سنن!
سنن يا! ".

- عمك بتاع حلاوة قطن و بتاع التُرمس و بتاع الايسكريم،  نلقاهم حايمين و عندهم مزماز كده مصنوع من حديد عندو نغمة مميزة "طورررو رور وررور " من تسمعها تعرف انو ده واحد فيهم.

- سيد الطبلية،  و ده عندو طبلية متحركة في شكل دكان صغير، فيها القرقاش و التسالي و الالعاب و الطلق و دقة النبق و القنقليز،  و مسدسات المويه و السُكسُك،  وده حبيب الاطفال و مسيطر عليهم.

- سيد النبق،  ده عندو ناقه "جمل" بكون لافي بيو نص النهار،  محمل باكياس النبق  و القنقليز و الدوم و الدقه و اللالوب،  و نسمع صوتو بنادي " نبق لالوب دوم نبق قنقليز نبق عرديب نبق!  ".

- و سيد اللبن،  ديل بجو الصباح بدري شايلين تمنات اللبن و يدقو البيبان و ينتشرو في الحي سريع سريع،  و من دقة الباب بتعرف انو ده سيد اللبن، بخبط الباب خبط!
 و لو ما عندك حق الرطل او الرطلين يديك عادي و بعرف نسوان الحلة جت!  و بقي من الحلة وفيها!
"سيد اللبن دور حديدو مني شال رطلي البيجيبو والقروش طلعن كتار..
شال قروشي معاه وروح، لما اشر لي ولوح ايدو من فوق الحمار..
كنت هسي معاهو بنبح فات و شال رطلي المصلح، والقروش طلعن كتار..
سعرو ولع بي حليبو
حوجتي لي تمنه حليبو،
والحمار هنق كمان،
 قروشي لو كانت من نصيبو بالسلامه تزيد رصيدو لما ترجع يالحماااار."
.
.
فتلك الشخصيات البسيطة لها اثر كبير في مجتمعنا البسيط،  ولكن الان لم يتبقى منهم سوى القليل.
.
.
محمد طارق | زول درويش.

نوفمبر و الشتاء

#نوفمبر_والشتاء
.
شهر نوفمبر هو بداية فصل جديد هو فصل الشتاء، و يقال عنه فصل "العُشاق"
ويقال عنه ايضاً فصل معاناة لفاقدي المأوى،
هو اكثر الفصول اقبالاً لدي النفوس، حيث تمتزج نسمات الصباح الباردة مع أشعة شمس الشتاء الدافئة،
و رائحة أوراق الشجر الجافة المتساقطة، و شكل السماء المُزينه بالسحب الخفيفة،
تترك شعور مختلط جميل في أنفُس الجميع.
.
فالشتاء عندنا كما عهدناه..
معاناة القومة بدري، و" تلتلة " الحمام الصباحي،
عندما تقف تحت الدش تشاور نفسك، تتحسس باطراف اصابعك الماء البارد، منتظراً منه أن يُسخن،
تحرك الفك الاسفل بصورة جنونية سريعة مصدراً صوت طقطقة عند احتكاك الاسنان ،
الحل الذي يناسب الجميع تسخين المياه في إناء كبير او وعاء شاي "كفتيرا"،
بعد الاستحمام تركض نحو الغرفة مغطياً جسدك بكل ما هو ثقيل ودافئ،
منظر الطلبة و العمال و الموظفين الذين تغطي نصفهم الاعلي بالملابس الشتوية "طواقي، سيوترات، شالات،فلنات برد "، 
حركة الهواء الثائر "الزيفة" و صوت إحتكاكه حول الأذنين،
الشاي باللبن و الزلابية الدافئة  ،
أخذ مقعد و الجلوس تحت الشمس لكي تنال من دفء أشعتها ما يكفي ليعاود الدم حركته ،
الهدوء الذي يخيم داخل المكاتب والغرف و غيرهم من الفراغات الداخلية،
توقف المراوح و المكيفات لعدم حوجتها، وربما تظل صامته هكذا لعدة أيام،
صدي صوت الهواء بالخارج الذي يضرب علي النوافذ والأبواب،
الروائح المحملة في الهواء
رائحة نِشارة الخشب المحروقة تحت قِدرة الفول،
رائحة الطعمية العائمة علي سطح الزيت المقلي في الصاج،
الاصوات المحملة ايضاً في الهواء
صوت الحياة السابح في الاجواء ،
مكبرات الصوت المعلقة على حوائط المدارس وهي تردد طابور الصباح،
نهيق حمار الكارو المحمل بالخضار،
الاَلات في مواقع البناء،
أبواق السيارات،
أصوات فروع الشجر الراقص، و خشخشة الاوراق المتساقطة،
صياح الكماسره،
أصوات الباعة المتجولين، الذين افترشوا الارض عارضين بضاعتهم الشتوية،
أصوات محركات الركشات،
كل شيء يتحرك يخال لك انك تسمع صوته ،
.
عند نهاية اليوم يرجع الكل الي منازلهم مبكرين بالعودة للاحتماء من قساوة الشتاء،
الجلسة المسائية و اللمة مع افراد المنزل بعد صلاة العشاء،
توصيد الغرف جيداً و وضع الشاي الحااار في منتصف الجلسة ،
الجوع الذي يصيب الكل و تجهيز
العشاء "قراصه مسخنه" من الصاج للمعدة طوالي،
المسامرة و الونسه ،
الرعشة و "كشه الجسم" التي تصيب الجسد من الهواء البارد المتسرب بين فتحات النوافذ و الابواب،
البطاطين الثقيلة التي أُخرجت و نُظفت تحضيراً للشتاء،
"القِشرة و النشاف و الغبشة و شقيق الشلاليف،
الفازلين و الجرسلين و زيت الكركار"، 
العُشاق و طالبي الحب الحنان فالليل الطويل لهم ملاذ،
اما "العزابة " جالسين في اطراف المساطب و المطاعم و "الفته والبوش و شوربة الكوارع الساخنة و بوخها يسوي كدي 👋 ".
.
و يفضل الشتاء له نكهة خاصة و وقع خاص علي قلوبنا ، و يظل لدي البعض هو الفصل المفضل دون بقية فصول السنة.
.
و كما تغنت فرقة الهيلاهوب المشهورة

" هووي الليلة!  السقط جا!
السقط جا!  السقط جا!
حبه قحة و نزله
بنطلون و بدله
و الناس جونا قاشرين!
كل زول فنيله في البرد تقيله
و النسوان عبايتين!
هوي الليلة!  السقط جا!
هووي الليلة!
السقط جا! 
السقط جا
السقط جا ! "
.
.
محمد طارق | زول درويش.