يحزنني جداً

#يحزنني_جداً رؤية إثنان لم يكملا سن الرشد بعد و هما في قصة غرام  مفعمة بالحياة،
ترى أعينهما تشعان بريقاً ولمعانً من الحب ♥،
حتى تنتهي هذه القصة في مرحلة ما بالفراق،
فتنكسر القلوب..  💔
عندها تكون قد وضعت أول عتبة سوداء في طريق علاقاتهم الطويل..
و يبدأن يتخبطان بين أشباه الحبيبات و الأحباب..
حتي تهن الروح و يشتعل القلب شيبا..
و #يسعدني_جداً حين يأتي ذلك الشريك المنتظر بعد خوض نفس التجربة و ينتشل رفيقه ليضمر جروح سنين و يشفيها و تعود أعينهم تشع من ذلك البريق الأول 😍
.
#مصيرو_الحي_يعود_تاني
#يحل_في_سمانا_أجمل_عيد ❤
.
.
محمد طارق | زول درويش.

للمسابقة

#للمسابقة 😚✌
.
سيلفي العيون 👀 للمسابقة!
سيلفي القدوم 💋 للمسابقة!
سيلفي النخرة و الاضان 👃👂 للمسابقة!
سيلفهات كتيره و عويره برضو للمسابقة!
الشبابيك و الفتحات و المناور برضو للمسابقة!
و انت يا ماشي تعال #غاشي
و يا بعيد قرب قريب و شوف #العجيب!
ورقه عشره
عشره ورقه
ورقه عشره!
سلع رخيصة للبيع و برضو #للمسابقة!
و اها الجائزة شنو؟  🌚
يترفع السيلفي صورة #غلاف!
بس خلاص كده !
اي والله!
لا يعني هسه الواحد #يعرض_نفسو للبيع اقصد #لللايكات عشان غلاف!
تصدق 🌚
😂😂😂😂😂 ياخي والله دي مهزله!
طيب والناس الكوووباااااار ديل برضو مشاركين في المسابقة!
ايوه #مهزلتنا اقصد مسابقتنا لكل الأعمار!
لا حول ولا قوة الا بالله! 😂😂😂😂😂
.
#نقطة_سطر_جديد 😑 ✋
ليه الناس بترخص من نفسها و قدرها بالصورة دي!
ليه انتي يا أخت تعرضي تفاصيل جسدك (عيونك رموشك  و اياً كان) للعامة عشان لايك و كسير تلج من #خرفان لا يسوون شئ!
ليه بس!
كدي الدين والشريعة خلوهو بالجمبه لانو واضح مافيو اتنين تلاته
لكن بالعقل كده ليه بس؟!
و الخرفان و المطبلاتيه القاعدين ديل!
ما تقول لي ترفيه و تغير و بتاع! لالا دي مهزلة و هباله و عواره و #تنزيييييل ليك اولا كراجل و ليها هي كأنثى (مقدسة) ثانياً !!
ليه بس!
عشان لايك!
عشان كسير تلج!
#اها_وبعداك! استفدت/ي شنو؟! 😒
لا و الغريب انهم مبسوطين و فرحانين تلقى الواحد ولا الوحده تضحك ها ها ها #فزت في المسابقة! 🌚
طيب ياخ
قالو عنك #وجيه #وكسار و الخفيفات يتفصلن ليك! 😍
قالو عنك #حلوه و #مزه و الخرفان يترقدو ليك! 😍
طيب و بعداك!
وروني عليكم الله بعداك بحصل شنو؟  🌚
ولا شي
ولاااااااااااااااااا شييييييييي 🌚 ✋
.
#حقيقة_كده شئ مؤسف جدا جدا جدا نشوف القروبات شغالة تجارة بمقامات و مكانات الناس عشان شويه كمية اعضاء و شهرة تافهة لا تسوى شئ!
.
#قيم_نفسك_بنفسك  😊✋
و #ما_تخلي_الناس_تقيمك ! 😶☝
#تقيمك_من_جوهرك_وليس_مظهرك ❤
.
#نسخة_من_المنشور_ده_لناس_المسابقات 😉
.
.
محمد طارق | زول درويش.

انقلاب

Mohamed Tarig:
كدي نتخيل لو #الانقلاب ده كان حصل عندنا في السودان بنفس سيناريو #تركيا 😉
اي عرفنا جدودكم كلهم اتراك 😒
المهم الجيش انتشر سيطروا على الاماكن #المهمة ومنها
#عوضية_سمك 🐟
#قندهار 🐏
#حوش_السمك 🐡
#شارع_النيل 🏝
#بشير_بوش 🍲
و غيرهم من المعالم #المؤثرة على اقتصاد الدولة..
يقوم #بشه يحتار يعمل شنو 😅
يقوم يضرب #لعبدالرحيم #بالايمو يلقى مافي شبكة 😶
يضرب ليو فيديو #بالماسنجر و يرد عليو 😁
ويبدا #يخاطب الشعب العظيم 😌✋
" تن تن تن تن  ا     تن تن  لو  تن تن
#الس تن تن  #لااااام  تن تن  #عل  تن تن تن  #ييييكم
#سبعة دقايق  يادوب قال السلام عليكم 🌚
ن و و و و #الصورة تقيف فجأة 🌚
وفجأة #شاسميللسمشةربسسكظسظينرر #الشعب_الكريم
#بال تن تن تن تن تيت تيت...
#انقطع_الاتصال 😷

وجلللب تجيو رسالة #ام_تي_ان
"عفواً لقد تم نفاذ حصتك اليومية من الانترنت يمكنك التصفح، و للحصول  على الساعة السريعة الاتصال ب....."
.
و #ضاع_العشم_وانسدت_ابواب_الرجا
#صعبت_خلاص_الحالة_يارب_تفرجها 👏👏
.
.
محمد طارق |زول درويش.

المدارس

#المدارس 📝📒📏📐🖊
.
.
بما انو الليله اول يوم في العام الدراسي لطلبة الاساس ،نرجع شوية لمن كنا نحن في نفس المرحلة دي..وقت كنا شفع حلوين #ظريفين..😇
قبل موعد المدارس باسبوع او اسبوعين كنا بنكون منتظرين بفارق الصبر😍 لانو خلاص الزهج بحصل 😅..  في انتظار الوالد او الوالده يجو خاشين بحاجات المدرسة..او يقولو لينا البسو عشان ماشين السوق نشتري ليكم الشنط والجزم 😍..
ونصل السوق ونلقى اصحابنا البقرو معانا هناك برضو .. والدكاكين كلها
كراسات
شنط
اقلام باشكالها
المساطر
البرايات
المقالم
الالوان
المساحات
علب الهندسة
ونلف الدكاكين و نتفرج و نشتري الشطنة 💼
ونمشي نشتري #الزمزمية في شكل #الرجل_الالي ويومين بس و #بتتكسر 😁 بس برضو ليها في النفس مكانة❤..
و ناخد #قماش ابيض للقمصان
وقماش اخضر للبناطلين
والقماش المبرقع لناس الثانوي
او نشتري جاهز..
وللبنوت #الباندات والطرح..
ونجي نشتري الجزمة 👟👟
و الكراسات والجلاد و الفلوسكاب الابيض و البني للكتب..
و نشتري #المسطره الفيها #موية وجواها حاجات #بترقش قمة المتعة 😍..او الفيها #متاهه و بليه صغيرة وتقعد تحرك في المسطرة عشان تدخل #الجله دي في مكانها 😍..
والبراية شكل #المفرمة..البراية دي ليوم الليلة نفسي فيها😁..
و #المساحة الريحتها زي #اللبان..غالبا  كنا بنشمها ونقرمها😁😋..
وقلم #الحبر الفيو كم #لون داك..
و #الساعة الفيها #آلة_حاسبة..😎 وانت لابسها تحس نفسك ابطال الديجيتال 😂
.
ونرجع البيت #مبسوطين ☺
ونكون منتظرين وكل مرة نفتح الدولاب ونعاين لحاجاتنا 😅..
واول يوم نلبس ونلاقي اصحابنا ونصل المدرسة سوا..
و #طابور_الصباح..
و الطلبة الجداد..
و #برنامج_الطابور.. و #حكمة اليوم و فقرة #النكات,, وفقرة #هل_تعلم, ,
و #نشيد_العلم.. الكلو غلط 😂
" نحن جند الفول جند العدس
نشتري الجبنه باغلى ثمن
هذه الجبنه لكم فليعش طباخنا حائماً بين الحلل للللللللل
يابني السودان هذا كلبكم
و يحمل العضمه
و يجري خلفكم 😁
والصفقة 👏👏👏👏👏"
طابور  #صفا
#انتباه
للفصول سر..
وتجري تحجز جمب الشباك عشان الكهربا مرات بتقطع من الحصة التانيه..او تقعد ورا..
والالفة يكتبك مع #المشاغبين..
وناخد الواجب
و جرس #الفطور
ونصحح مع الاستاذ
ويكتب ليك جيدجدآ او ممتاز..وتتبسط وتشيل وتعاين ليها😍.
وجرس نهاية اليوم🏃🏃
ونكورك #البييييوووت يا عبود تاكل الدود 😂..
وترجع بيتكم مكتح
و مغبر 😷
وتعبان
بس مبسوط..
و يمضي العام سريع
ونلقى نفسنا كبرنا و بنتذكر في الايام الجميلة دي❤..
ونشوفها في عيون اخوانا الصغار❤..
.
ونتمنى ليهم عام توفيق ونجاح بـاذن الله تعالي❤ .
.
.
محمد طارق | زول درويش  .

في المول

#في_المول 😎✌
.
بعد التراويح و الدنيا عيد قلت امشي #المول الجمبنا اكشف واشوف الحاصل شنو 😎 و اغير جو زاتو ..
اها مشيت و خشيت المول زحمه و جوطه 😷
وبقيت حايم..
طبعاً كسوداني #ما_ماشي اشتري  😅 و عموماً كده السودانين بمشو المولات عشان يغيرو جو و يتصورو و يشغلوها لبتاعين المحلات و يدقو جرس اسعاركم غاليه و يجوطو و في النهاية بمرقو #مييييييطي 😂
سبحان الله كل الشعوب بتمشي تتسوق و تشتري و تشرب ليها حاجه و يتخارجو الا الشعب الاسباني الظريف ده 😂
اها خشيت #ماكس  معروف ابو الرخا و حاجاتو ظريفه و عادي تخش اي فرع ليهم تلقى المحل كلو سودانين تحلف تقول في #السوق_العربي 🙊🙊🙊
الوضع ما عجبني مشيت محل بعديو ظريف وراقي ومافيو جوطه بقت لافي و اعاين 👀
خشيت قسم الملابس الرجالية و بقت اشيل ده و اجربو
اجي تاني وارجعو
اشيل البنطلون ده و اجربو
اجي تاني و ارجعو و شغلتها للفلبينو و الهنود الشغالين 😅😅
يشيلو و يتجارو يجيبو لي في المقاسات 😁😁😁
وانا في جيبي كلها 10 ريال 🙊🙊
في النهاية زهجت
واثناء ما مارق كده #طااااااخ حاجه ضربتني في راسي لمن طشيت شبكه ثواني كده بقيت ما مجمع 💢💢💢 و شايف نجوم نجوم 💫💫💫
قلت بكون واحد من الهنود ديل بعد التشغيله جا يفش غليلو و خماني #عكاز في راسي 😂😂😂
بعد شويه فتحت لقيتها وحده #جميله #جماااااااال 😍😍
لا حول ولا قوة الا بالله 😍😍😍
قرصت روحي سريع لكن الموضوع طلع مافيو قريص 😅😅
قلت بس دي #ليله_القدر جاتني لحدي عندي 😍
استغفر الله العظيم ياخ 😅😅
سريع استجمعت قواي و تركيزي و صريت ليها 😑
و قلت ليها ما بتشوفي انت قدامك؟! 😒
ارفعي راسك عايني لي هنا 😒
قالت لي "ام سو سوووري عنجد ماني قاصدي" و معاها #كشيره حقت الشفع #البريئة ديك 😔
غايتو الجمله دي تقول فكو فيني حقنة مخدرة 50 سيسي 😂😂😂
قلت ليها حصل خير بس تاني عايني قدامك 😒
قالت لي " #تؤبر لي البي ما تزعل مني و حياتك #ماني قاصدي "😔
#حييييييييييينا من تؤبر لي البي دي 😍😍😍
ما قلت ليكم #اللبنانيات ديل #حنيناااااااات 😍😍
المهم بعد تحانيس و راسك بقى كيف و شويه حنك عزمتني قهوة ☕
قلت خلاص امورك #وضحت يا محمد طارق 😎
و مشينا اقرب #كافيه  و جلسنا في ركن قصي و #قعدنا و البت #خجلانه خجل وانا اكشف بالكروكي سااااي 😁
#العيون كيف و #الشعر كيف و الباقي تمو خيال 😂😂
بقينا نتونس شويه شويه
قلت الامور #سلكت باقي #الرقم و تكون انجزت يا معلم 😎💪
فجأة تلفونا ضرب و وصفت لواحد مكانها دقايق جا واحد حلبي كده ناعم و عامل شعرو كيف و لابس كيف 😏
سلم عليها و قومي يا البت #عرفيني عليو 🤔
هادا #محمد اتعرفت عليه قبل شوي و هادا #حمودي ماي بوي فريند ❤
ديشاااك حمودي طلع حبيبك يا بت الذين 😡😡😡
وهنا انا #احلامي ضاعت!!!
#ضاعت!!!
ضاعت في #الرهااااااااااب !! 💔
طوالي ولا #هظرت قلت ليو اتفضل اقعد وسالتو تشرب شنو عازمكم انا ومشيت لبتاع الكاشير ما خليت شي ما #طلبتو 😈😈😈
كابشتينو علي فكشتينو علي اسبريسو علي دونات علي جاتوهات و اخترت اغلي الحاجات لقيت الفاتورة قربت تحصل الالف لمن بتاع الكاشير احتار 😈😈😈
و وصفت ليو مكان نحن قاعدين و رجعت للبت و حبيبها وقلت ليهم عن اذنكم ماشي الحمام وجاي و #فوووووووو #كبرتها  😂😂😂
طلعت برا و بقيت بعاين منتظر اشوف الجماعه حيعملو شنو
و جاءت اللحظة #القاتلة ردمو ليهم #الطلبيات قدامهم و بقو يتلفتو #يفتشوني بعد شويه شايف الود جاطها و شاكل البت و  #وووب البت وقعت #غمرانه 😂😂😂
عند هذه اللحظة #ضحكت حتي #بانت #نواجذي و قلت لها
#welcome_to_my_world 😈😈

ومشيت اقرب محل شاي اشتريت لي #كرك (شاي لبن)  #بريال و لميت الباقي و رجعت بيتنا
عزيز مكرم رافع الراس نافخ الصدر 😎✋
و شافت عرض #زولي_امدرماني_ثوري لن تنساه ما حييت 😌✋
.
#الشغل_المحلي_ده_أجمل_منو_مافي ❤
قال تؤبر لي البي قال!!  🌚
.
.
محمد طارق | زول درويش.

احببت فتاة

سك سك 🏃

#سك_سك 🏃🏃
.
كالعادة جيت بعد التراويح قعدت والزهج يخيم علي الاجواء 😶
الفيس مافي موضوع
الواتس مافيو موضوع
التلفزيون كلو دعايات وشويه ناس بغنو 😷😷
ده حال شنو ده 😑
قعدت افكر طيب يا محمد طارق ما تقوم اخد ليك جكه سريعه كده تغير وشايف في جضوم وحاجات بدت تظهر 😅😅
المهم خشيت في البرموده و الكت و الكداره و يا الشارع جاك زوول 😎✌
ركبت سماعاتي و عملت تسخينه سريعه كده وبديت اجك 🏃🏃🏃
جاكي و منطرب ☝👋👏👏
شويه شويه بزيد السرعة..
اها خشيت في شارع ميت كده لا عربات لا جوطه و جاري بمزاااااج 😌
و بهدن شويه اشيل نفس ومعاهو كم رقصة سريعه كده 😁😁🙊 💃💃
وتاني بقوم مشخط.. 💨🏃
اها في طرف الشارع ده في هنود اتنين قاعدين بره و مركزين مع تلفوناتهم..
بس طق جاتني فكره قلت لمن اجي جمبهم اخلعهم و اواصل جريتي.. اشغلها ليهم شويه بدل قاعدين كده 😈
يلا قربت والجماعه ولا جايبين لي خبر يشختو في تلفوناتهم ساي..
بس وصلتهم كده!!!
كوركت ليهم جاااااااااكم!!!!!
ومعاها صوت وحش كده 👹 ياخي انا زاتي لمن اتخلعت 😅
وقومو يا الهنود اتخلعو لدرجة اطلقو كرعينهم للهوا و في كسر من الثانيه فوووووووو  بقو جارين 😂😂😂😂
ولا هظرو جري بس
والله جرو جري
حيروني زاتي معقولة اتخلعو للدرجة دي؟ 😂
اها انا قلت خلاص الحقم اوريهم اني بهظر معاهم وكده
اها الجماعة شافوني جاري وراهم قالو بس خلاص الزول ده الليله بنتهي مننا وقومو اجرو زياده 😂😂😂
انا جاري
وهم جارين
سك سك بس والله
يا جماعة استهدو بالله
والله بشاغل فيكم 😂😂😂
وحات ديني شخطو شخيط
طيارات بس ✈✈
ينفعو مهاجمين  😂😂😂
ياخي جرايين كيف القصار الدقدق ديل 😅 ماشاءالله تبارك الله 🙊
انا جاري وراهم لمن كراعي اتشمطت 🙈
الجماعة اي واحد استلم ليو شارع و لف بيو و بجريتهم ديك ما وقفو 😂😂😂😂
انا قطعت خلاااااااااص والفيني كملت 😅
وقفت بعاين ليهم لحدي ما اختفو من الشارع واضحك😂😂
ياخي ابو جبنكم زاتو 😂😂
ديل شنو ديل 😒
الواحد ما يهظر! 😏
غلطان انا البظهر معاكم 😑😂
.
المهم هسه انا القي لي زيت سمسم اتمسح بيو وين؟! 😅
.
.
محمد طارق | زول درويش.