عِرس الهنا و السِرور!

#عِرس_الهنا_و_السِرور !
.
.
العبدلله بعد ما مشى يخطب زولتو و اثناء ما هم قاعدين في الحوش عمك ابو البت نادى بكري و طلع بكري هو المأذون و لابد في الصالون،
بعد ما دقس و الحكاية قلبت عقد!
بقى يكابس في حق العرس!
و زولتو كل يوم طالعة بفلم جديد!
ورتو النجوم عز النهار!
خلتو يشوف شعااااع عديييل كده!
ما خلا شغله ما اشتغلها!
ياخي ده جازف مجازفة!
بس يمرق حق الشيلة و كم مليون كده مهر يسكت بيها اهل العروس!
لكن هم بسكتو؟!
دايرين و دايرين و دايرين لمن يسمع كلمة دايرين دي تمسكو قبضة اسبوع ما تفك منو!
اها بفضل الله و رحمتو جاب الشيلة!
تلاته تلاته تلاته  اي شي تلاته اصلو ما زاد منهم!
ابو العروس قال ليو الصالة علينا انت عليك العشا و الفنان و ناس التصوير العربية هينة اخوها بزفكم!
و حشر ليك العبدلله في زاويه ضييييييقه!
العبدلله قطع رسمي وشعبي، التكتح ما عندو!
هسه يعملو ليهم عشا من وين!
و انا الدّين لحلقومي!
و الفنان اقل واحد داير مليون ده لو مستجد في الشغلانيه!
وناس التصوير ديل كوووووم براهم !
ياربي امشي وين انا!
اعمل شنو!
العبدلله سكلب و جقلب!
اها في النهاية اتصرف و حددو اليوم و جا العرس!
الجماعة زافنو
ابشر ابشر ابشر و الزغاريد فووق ايوويووويووي !
و الفلاشات دي تلخم!
الناس انبسطت و قعدت بعد العرسان رقصو و قعدو في الكوشه!
اها سريع سريع قالو قبل الحفلة تبدا نخلص من برنامج العشا ده و وزعو ليهم العشا!
تعالو شوفو العشا شنووووووو!
ديك يا سندوتشات الفول و الطعمية الما خمج و ختو ليهم صحن نيكل ملااااان شطه  و مويه طماطم (كاتشب) في نص الطربيزه!
شغل كده زي بوفيه المدرسه!
و الناس مخلوعة ده عشا شنو!؟
كيييييف في عرس العشا يكون كده!
و النسوان شيالات الحال طوالي دورو شنيّف!
ام العروس دي لبدت عديييل!
اها بعد شوية الطرب اشتغل!
الناس قبلت علي المسرح تشوف الفنان منووو!
.
.
.
.
يلقو ليك مسجل كبييير شغال فيو شريط عثمان حسين !
العبدلله قام لابو العروس ابشر ابشر ابشر!
قلت لي دايرين شنو!
ههههه ابشر ابشر!
.
قال ليك ام العروس ودوها الطوارئ
و ابو العروس جاتو صدمة سكري!
و البت من يومها ما قالت دايره شئ!
.
.
و كما تغنت الاستاذه العاتيه انصاف مدني صاحبة الصوت المدويّ
" اوضه وبرندا وحوش وباب...
و الزير ملان موية شراب.. "
ابشرووو 👌
.
.
محمد طارق | زول درويش.

غريبة الدنيـا 3

غريبة الدنيـا!
.
.
غريبة لمن وحدة تحب واحد و هو كمان و العلاقة البيناتهم علاقة لقدام،يعني مستقبل،
يعني ما مسك زمن أو علاقه لحظية،
و البت تنتظر الود لحدي ما يفتش شغل
و سنه سنتين...
وهي لسه مستمرة في حبو..
لسه متواصلين..
و هو يعرف اهلها..
و اهل البت يعرفو الود الحيكون زوج بنتهم لقدام،
و لحدي ما يشتغل،
وهي عشمانه خير،
مامشكلة عشانو يهون كل قاسي،،
وتبدا أم البت تنق فيها
انت زولك ده شكلو ما جادي!
والبت تقنع امها إنو جادي!
طيب خليو يعمل خطوة
خليو يجيب أهلو و نعمل خطوبة و نقول الخير!
و تمشي البت تكلم زولها و إنها إنتظرت مافيو الكفاية
خلاص تعال بيتنا و أخطبني و لحدي ما ربنا يفتحها عليك نعمل العرس!!
كلامها حلو و ده المفروض يحصل من أول!!

لكن تجي الكارثه هنا!
.
بعد كم يوم يرد عليها إنو أمو  حالفة ما يعرس وحده من برا العيلة أو قبيلتهم!!
و إنها حاجزه ليو بت خالتو لحدي ما تخلص قرايتها!!
و هو يطلع إنسان ما عندو شخصية! او ما عندو الجراءة يبدي رأيو لامو!!
و هو يكون عارف من أول إنو أمو حترفض و عشم بت الناس في الفاضي و كسر قلبها!
و ما تعرف زاتو تقول لأمها شنو!!
و يخليها في حيرة و صدمة من الوهم و الواقع الما حيتحقق!!
.
.
طيب شنو يعني
امي حالفه و حاجزه لي!
انت وين رأيك؟!  وين أختيارك؟!
امك هي الحتعيش مع البت الاختارتها ليك دي ولا انت؟!
دي حياتك انت!!
طيب ياخ مدام اهلك نوعية الناس الاتجاهم واحد و ماشين بما وجدو عليهم آبائهم! 
ما تعشم بنت الناس ساي!
من اول خليها مدام عارف روحك (إمعه)!
ايوة رضا الوالدين اهم شيء و فوق كل شيء
بس خت في إعتبارك إنو المعشمها دي خلت أي شي عشانك أدتك من وقتها الكتير عشان تعوضها لقدام!!
خليك واااضح
خليك صريييح!!
و كذلك بالمثل بعض البنات بعشمو الأولاد وفي النهاية يكون القرار أصلاً لأهلها.. يا يعرسوها لود عمها و لا ود خالها..
.
.
فشنوو العوائل الزي دي سببت مشاكل لكتير من الشباب و أبنائها بحكم نحن أولي من الغريب و النسب و ما ادراك ما النسب و عادات وتقاليد ما أنزل الله بها من سلطان !!
.
و الفيو النصيب ده ربنا كاتبو كان من اهلك ولا كان مع غيرهم .
.
.
محمد طارق | زول درويش.

أعياد الميلاد

#اعياد_الميلاد
.

زمان الواحد لمن يكون يوم عيد ميلادو بمشي يشتري بسكويت رويال و لبن بدرة و كيلو موز و يطلع المسجل و يرش الحوش مويه و يفرش المراتب في الحوش و يرص كم كرسي كده و يخت طربيزه في النص،
و بعداك اصحابو يجو قاشرين و يتلمو في الحوش...
و يشغلو الشرايط في المسجل...
و نغني مع محمد منير "سو يا سو حبيبي حبسو "
و خواطر فيل مع النور الجيلاني" قبضوني ليه جابوني ليه عاوزني أعمل ايه هنا"..
و هيصه ظريفه مع ناس البيت و الشاي باللبن
و اي واحد ياخد صحن فيو قطعة موزة و كيكه من صنع الام و بسكويت و برتكان ،
و الناس تضرب بمزاااااج...
بعداك اي الواحد يمشي، مافي هدايا، الهدية بتكون هي جيت الواحد،  يعني لو ما جا من غير عذر معناها ما هداك!
.
كبرنا شويه بقى عيد الميلاد الواحد ما بتذكرو الا يخش الفيس و يلقى اشعار، و شوية كده حيطة صفحتك تتملي كلها صور جاتوهات! و نفسك تخش فيها و تسرح و تبلع ريقك سااااي وفي البيت كم تهنئة كده و تاكل طعميه تتعشى بيها وتنوم تحلم بالجاتوهات !
يلا لو عندك حبيب يومك بكون ظابط،  يعمل ليك عيد ميلاد ظريف مفاجأة كده و انت بتكون عارف بس بتتخلع عشان يحس بيك،  و اصحابك ياكلو الجاتوه الجابتو ليك حبيبتك،  و بعد الناس تتفكفك تقوم تطلع ليك هدية من شنطتها غالباً ما بتكون كباية فخار او علاقة معاها جزلان و قلم او ريحة ،  و تشيلها وترجع مبسوط..
.
كبرنا تاني او الزمن تطور شويه، بقى الواحد متذكر اليوم و يخش الفيس كلو يقين انو حيلاقي تهنئة وكده و يلقى حيطتو كلها صور ليهو هو معاها تهنئة ظريفة منزلنها اصحابو ، غايتو دي احسن من صور الجاتوهات البتجوع، ولو عندك حبيبة برضو ما بتقصر معاك مفاجئات و حركات و لمة في مطعم ظريف و ترجع مبسوط،  اصلا في كل الحالات بتكون مبسوط..
.
يلا البنات مع بعضهم ما بقصرو ده برنامج بالنسبة ليهم و تخطيط كده ولا الحوار الوطني، في وحدة تكون مشركة ليومها ده عشان الهدايا،
وفي نوع كده بعملو اعلاااااان عديل بالهدايا الدايرنها قبل اليوم !
ما عارف قايلين الناس دي سانتا كلوز ولا شنو!
غايتو!
.
فشنو القيمة المعنوية للتهنئة مهما كان نوعها دي في حد زاتو هدية..
و المهم تهادوا تحابوا 😊
و ربنا يجعل ايامنا كلها اعياد 👐
.
.
محمد طارق | زول درويش.

في شارع النيل تنتهي الأحلام!

في شارع النيل تنتهي الأحلام!
.
في يوم مُغيم مثل هذا اليوم و في مثل هذا الشهر الذي ِكره أسمه من شدة التشغيلة،
في ذلك المكان الذي يتوجه إليه الجميع في مثل هذه الأجواء العطِرة ، حدثت هذه القصة.

" رن هاتفها الذكي تُضئ الشاشة حاملة أِسمه، أسرعت الي غُرفتها و أوصدت الباب خلفها حتي تنعم بمحادثة هادئة بعيدة عن ضجة المنزل و أصوات إخوانها الصِغار المُزعجة، إرتمت بجسدها علي السرير و ضمّت عليها الوِسادة و أخذت الهاتف تُجيب  المُكالمة.
خرج هو من منزله ليجلس في المسطبة الخارجية للمنزل لكي ينعم بمكالمة هادئة بعيداً عن مشاغلات إخوته، ولكن أصوات الركشات تبدو أرحم من تلك المشاغلات،
جلس و كُله لهفة لسماع صوتها، فصوتها يُزيل عنه كل حِمل ثقيل حمله في يومه، أخذ يُحدثها و يسألها عن أحوالها و كيف كان يومها، و كانت هي تسرد له كل صغيرة وكبيرة في يومها حتي هذه اللحظة، مضت نصف ساعة من المكالمة و عند كل دقيقة تمضي يود لو يحادثها للأبد، و عند كل كلمة تخرج من فمها و تتسرب اليه عبر سماعة الهاتف يتخيلها تقف أمامه، بمنظرها الجذّاب الذي أسره من أول لحظةٍ يراها، و هو يُحدق الي عينيها الواسعتان، و يتذكر عندما غازلها أول مرة و صمتت هي من شدة الخجل، و قُصر قامتها التي طالما رأى أنه يجذبه في كل مرة يراها ، و دائماً ما يقول لها "والله بقصرك ده بتحسسيني اني داير اشيلك واقوم جاري بيك "
مضّت المكالمة بعجل وفي آخر الحديث طلب منها مقابلته غداً حتي يخفف من شوقه لها و لكن كان لها رد آخر بأنها ذاهبة الي الجامعة لديها بعض الأوراق المهمة لتصويرها، و لديهم جلسة لشرح مادة،
تقبل ذلك منها و أودعها السلام.

في صباح اليوم التالي كانت للسُحب المُغيمه والتي تملئ السماء أثر خاص علي قلبه، فقرر بعد انتهاء الدوام أن يتوجه مع أصدقائه الي شارع النيل، فهو المكان المثالي ليمضوا تلك الساعات الجميلة فيه،
عند نهاية اليوم تقابل مع صديقه و توجها صوب النيل،
وصلا و جلسا عند فطومة بائعة الشاي، مع بقية أصدقائهم و أخرج احدهم "الكُشتينة " و مضوا في اللعب،
كُوب من القهوة يليه كُوب من الشاي، و سجارة تِلو الأُخرى، و قطرات المطر الصغيرة تتساقط عليهم، و الرزاز يداعب البشرة ليزيد من الاجواء روعة،
ذهب ليشتري علبة سجائر أخرى من أحد الباعة المتجولين،
لا يبعد عنه سوى القليل، حينها لفت إنتباهه فتاة تُشبه فتاتُه! تعبر من الناحية الاخري للطريق،
توقف مكانه لكي يتأكد،
انها هي!
اللعنة ماذا تفعل هُنا!
ومن هو ذلك الشاب الذي برفقتها!
أخذ خطوات للوراء لكي لا تراه حتي يتأكد من هو، إنه ليس بأخيها ولا أيضاً إبن خالتها، فهو يعرفهم جيداً،
راقبها عن كثب، و هي تضحك معه و كأنُه عشيقها!
و جلسا أسفل شجرة و أدارا ظهرهمها للطريق!
توتر و تصبب عرقاً!
تسّمر في مكانه!
حتي أتت تلك الحركة التي قام بها الشاب لعشيقته و حلت عليه كالصاعقة!
إنه يُمسك يدها!
في تلك اللحظة جثَى علي رُكبتيه  و تبعثرت كل أحلامه أمامه!
خُططه المُستقبلية معها!  و تلك المواقف التي جمعتهم! حتي أسماء صغارهم التي وضعوها تشتّت!
وضاع كل شئ هباء منثورا!
ففي شارع النيل تنتهي الأحلام!.
.
.
محمد طارق | زول درويش.

كُبي نُص!

#كُبي_نُص!
.
العبدلله اصحابو ضربو ليو تلفون "ياعمك اطلع نمشي على الجمبه  نشرب لينا جبنه من محاسن و عشرة ونسة ظريفة كده "
العبدلله شال جزلانو و طلع..
اها قاعد كده مع اصحابو و هم نوع الشلة العاملين فيها مثقفاتية و الونسه كلها سياسة و شمارات عالمية،
"-اسمعني شفت الاتراك اولاد الذين ديل! جابو ليهم طياره روسية واقعة!
- لكن ما دقسو ما عارفين الروس ديل دمك و اتجاه واحد!
- عمك بوتين ده بس سرب واحد يفكو ليهم يخليهم يتضايرو!
- اسمعني انت المصرين ديل مالهم! فجأة كده قبلو علينا!
- والله سامع بقولو قبضوهم تجار عملة وما عارف شنو!
- ياخي الدولار زاتو وصل حداشر و دقداق!
- انتو عارفين الحرب العالمية الثالثة حتكتم قرييب !
- بالشايفنو ده معاك حق!  ادوها سنة سنتين لقدام نلقى روحنا شايلين سلاح و بنحارب في اثيبوبيا و مصر وليبيا و الدول الحولينا دي كلها!"
الونسه كلها كده!
فجأة العبدلله لله يلقى نفسو في الحدود بين السودان وأثيوبيا!
حرب قايمه و ضرب لي رب السما!
دخاخين!
طياره واقعه هناك محروقة!
و تاتشر واقف هناك مولع نار!
عساكر مجدعين!
و واحد جارنو جر عفص ليو لغم قطع رجلو!
دوشكات دي واقفه شبط!
الجيش السوداني يضرب!
الجيش الاثيوبي يضرب!
و الناس زاحفة لقدام!
وووب العبدلله وقع في حفرة!
ما فتح الا وهو في قبضة الجيش الاثيوبي!
كيف! و بوين!  الله اعلم!
خاتنو في غرفة كده مضلمة بس فوق ليو لمبه شغالة تتحرك يمين شمال!
العبدلله ما قادر يشوف كويس!  شكلو الجماعة ضربو في راسو بالدبشن بتاع الكلاش! و لسه هو بحاول يجمع!  الجابو هنا شنو!  وديل منو!  والحاصل شنو!
شوية شوية بدا يفتح عيونو!  اول ما فتح كويس عاين للعساكر الواقفين حولو! كلهم نسوان!
الجيش الاثيبوي نسائي!
في اللحظة ديك اتذكر انو اول رحلة تاريخية قامت بيها الخطوط الجوية الاثيوبية طاقمها كلو نسوان!  من بتاع المرور والعتاله البرفعو الشنط و الجرسونات و السواقين!  جت نسوان!
انبهر ليك بالجمال الواقف قدامو ده!
نضيفات نضافه !  ابتسامة تكتل!  و السنون من شدة ما بيضا لمن تجهرك! 
العجب السمار!  لا حول ولا قوة الا بالله!
العبدلله جاتو صدمة!
هسه جنس ديل بحاربو بيهن!
هي لكن ما ببالغو!
دي خلق يرفعو في وشهم سلاح!
الناس دي جنت ولا شنو!
جاتو وحدة سمحة سماحة مبالغة! دنقرت عليو كده!العبدلله لمن اتشهق! وبلع ريقو!
سالتو تشرب شنو؟! نحن من عوايدنا نقدم للأسرى اكل و شراب!
العبدلله شال نفس طويل و غمض عيونو نظام مكسوف و قال ليها بكل حنيه " لو سمحتي ممكن بس قهوة بدون دوا!
.
.
اها فتح عيونو كده يلقى ليك محاسن واقفه في وشو!
محاسن دي قدر الضربة!  حاجة كده جامبو! و غازه يدها في نصها!
و تحمر ليو!
و تعوج في خشمها!
وقالت ليو باستغراب "اجي!  اجي ياود امي! "
اتلفت عاين لاصحابو قاعدين و لسه شغالين تنظير !
لعن الواقع!
و رفع راسو لمحاسن وقال

" محاسن كُبي نُص! "
.
.
تمت.
.
.
محمد طارق | زول درويش.

حين تبتسم!

#حين_تبتسم  😊
يتوارى القمر خجلاً خلف السحب..
تتراقص الاشجار طرباً..
تنحني لها الجبال تجليً..
وتصمت الرياح امامها
وتتجمد الامواج مكانها ! 
.
حين تبتسم يصبح الخريف ربيعاً ..
والليل المظلم صباحاً مشرقاً..
وتلك الفراشات التي تحلق فوق الازهار
تصفق لها بجناحيها ..
وتتحول الغربان
لعصافير جميلة مغردة مبتهجة!
.
حين تبتسم تقتلني غمازتيها ..
و ذلك الزمام اللامع علي انفها..
تصيبني حمى العشق..
فهي افريقية سمراء..
لها من الجمال مالم يكن لغيرها!
.
حين تبتسم أذوب عشقاً في تلك الابتسامة
اخضع لها
فتأسرني و تضعني خلف قضبان الروعة..
من اين لها بهذا!
الا تعلم انه سلاح قاتل!
قاتل للقلوب!
قاتل للانفس التي تقدس بهاء الطلة!
سبحان من سواها !
.
حين تبتسم يبتسم معها الحظ..
يبتسم معها الكون..
تبتسم خلفها الحياة..
عندما تبتسم العالم يبدو أجمل دوماً..
عندما تعطيني تلك الابتسامة
تكون أفضل ما حصلت عليه قط !
.

فقط ابتسمي  😊

.
محمد طارق | زول درويش.

لعنة الصمت!

في أغلب الأحيان تُصيبنا لعنة الكتابة، فترى الحروف عند كل شئ، تتدفق و تنساب الكلمات الي راسك من كل صوب و حدب ، وتبدأ تراقصها بكل أريحية، و جميل ان يطاوعك قلمك لترتب تلك الحروف و تُجملها و تقدمها لنفسك و للجميع.
و في بعض الأحيان تُصيبنا لعنة الصمت، ترفض كل الحروف حتى أن تقترب منك، تجعلك وحيداً بائساً، محاولاً أن تُخرج من عقلك شئ حتى و لو بالقليل، و لا تنفك من المحاولة، و لكنها تُشي بالفشل، و تبدو كولادة متعسرة،  فتتركها لحين الهام.
.
محمد طارق | زول درويش.