التصوير الرياضي فن

#التصوير_الرياضي_فن 😌✋
.
المصورين بتاعننا في الكور المحليه
اول شي ما بختارو الزاوية المناسبة
يعني فجاة تلقي واحد قام منفعل غطا الكاميرا
و الزول ده #اب_راس ده نكرهو كره و محيرني كيف!!!
في اي كوره اساسي تقول بدفعو ليو عشان يعمل حركتو دي😡
اها المصور لمن يجيب الكاميرا علي جهة الجماهير #تخاف_عديل😱
و تجيك رعشه 😵
ناس هايجين 😤
وناس متشاكلين 👊💪
وناس داقين جرس ومعاها تيت تيت 😷
و لو خلاص اتفنن بصور ليك #باقه_طايره من المدرجات لحدي ما تصل لب راس اللاعب اصابة مباشرة وسقط ارضاً
ياخي والله ناشيونال جيوغرافيك بس 😂😂😂
.
اما مصورين برا
ياسلاااام ياخ 😍
بعرفو يختارو الزاويه
يجيب ليك الميدان ده طول وعرض
من كل الاتجاهات
و بعرف يختار الجماهير كويس 😎
يعني يجيب ليك الناس الرايقين النضاف
لابسين كلهم زي بعض
بشوشين 😁
#المشجعات ❤
#الطبيات ❤ وعلي خدودهم منقوش العلم 🙊
#فاتحات_الروح_سبعة_ضلفات 😍
تشوفهم تقول بس خلاص انا مشجع الفريق ده
وانت اسمو زاتو ما بتكون بتعرفو 😁
يعني بخلوك تستمتع بالكورة وكده يعني 🙈
و يدوك احساس انك جوه الاستاد..
.
لكن بس نقول الحمدلله
الحمدلله
الواحد يحاول قدر الامكان #ما_يوسخ_عيونو 👀
ركزو مع الشغل الخارجي و الدولي ده ناس كوبا أمريكا و اليورو ❤
خليكم من ناس التحكيم فاشل 😂😂😂
.
.
و #حقيقة_كده_التحكيم_فاشل 😌✋
.
.
محمد طارق | زول درويش.

سحور في الغربة

#سحور_في_الغربة 😌✌
.
أول رمضان لي في دوحة العرب كان عبارة عن نوم و سهر 😴😴فشنو اكتشفت فيو حاجات كتيره ما زي في السودان..
التراويح مافيها شي مختلف مع التكيف و البخور الفي الجامع بتكون مستعد تصلي للصباح 😍❤
و التهجد ببدا الساعه 12.. ساعة وحده ترجع البيت شغل ابو السريع 😁
الصبح باذن من تلاته ما عارف ديل مستعجلين لاحقين شنو 🤔
اها يوم قاعد بعد التراويح وما عندي موضوع قلت ابرمج بنفسي مدام متعطل كده بقيت افكر اعمل شنووووووو 🤔
بس جاااات 😎
قلت البلد دي مافيها ناس بطلعو #يدقو_للسحور عشان الناس تصحي تتسحر طيب ما انا اكسب فيهم اجر و اسحرهم 😍
يازول شلت ليك #قارورة كبيره بتاعت مويه الصحة ديك والله فيها ايقاع وصوت! النوبة ما فيها 😎
و شلت لي #مفراكه ادق بيها
و ربطت القاروره في رقبتي و اتوكلت 😎
بديت من الشارع الورانا
دق دق دق دق دق السحوور يازول
رمضان رمضان يازول 👏
شهر التوبه والغفران يا زول 👏
شويه كده شايف الناس بدت تمرق و مستغربة الزول ده جاني ولا شنو؟ 🌚
وانا اتكيفت قايل روحي عامل شغل و زدت حماس 😁💪
و شغال و ادقدق و الناس تمرق تتفرج وانا مبسوط
لمن وصلت راس شارع بيتنا جا مواطن مارق و هايج 😤
وش فيك يازول!!! ترانا نايمين!! وش تسوي عندك انت!!!
انا طوالي وقفت وبكل ثقة سودانيه ورافع راسي فخراً قلت ليو ده اسمو السحور عادة وتقاليد في السودان قلت اوريكم ليها 😌✋
قال لي اهاااا طيب وقف دقيقه احكيك شي! 
ودخل جوه بيتو
انا هنا قلبي اكلني لكن قلت اقيف احتمال داير يجيب لي سحور اتسحر بيو عندهم حلويات كده ظااابطه 😍😍😍
بعد شويه عاينت كده صحبك جا من هناااااااااك و جاري وراو اسد 🦁 اقصد نمر 🐯 كلب ياخ 😨
و دقيقة ما تمت لقيت روحي جاري و الاسد جاري وراي 🏃🏃🏃🏃🏃🏃🐕🐕🐕🐕
كراعي تدق في قفاي
فحطت فحيط
و الله كلب ممكن يتعشى بي عادي  😅
جاري وبقرا في قران ببدا بالإخلاص بتمها بالكوثر 🙈🙊
جاتني طاقة و لياقة من مافي
جري بس يازول
بعد مراوغات و تكتيك روحت الكلب 🐶
انتصرت اخيراً ✋
ياسلاااام ياخ 😍
و لقيت روحي في مكان ما عرفتو وين
ولا عارف الطريقه البترجعني بيتنا 😅
و عاينت لروحي لا #قارورة معلقه في رقبتي
ولا #مفراكه
ولا #سفنجات 😅😅😅
.
و اتعملت درس لن انساه ما حيت 😁
مش بقولو #بلدا_ما_بلدك_حوم_فيها_حفيان!
اها انا الليله وروني البجري فيها حفيان منو 😂😂😂
.
.
محمد طارق | زول درويش.

طقوس ما بعد صلاة التراويح

#طقوس_ما_بعد_صلاة_التراويح  😎✌

وقت كنا صغار يلا ما بنقدر نصلي التراويح بنصلي العشا و جري الميدان جاك زول 😎..
الميدان بكون ركبو الكشافات عشان الدوره الرمضانية و بكون منوووور
نقوم نلعب بالعجلات و #نفحط و #نشنق_اللستك بعداك ندفر..
الدافوري العجاجتو قايمه 👋
بتلقي الشفع ديل جارين بس لكن ما بتشوف الكورة نهائي
كتاحه و شفع جارين 😂
يلا لو مافي كوره تلقى اي واحد شايل معاو #الف_جنيه او #خمسية_جنيه عشان نشتري بيها #التسالي من عمك البكون حايم حول الميدان بالعجلة بتاعتو وببيع تسالي..
ياخي عمك ده عندو تسالي طاعم طعومية 😍
ليوم الليله ما لاقاني زيو..
ربنا يجزيو خير اينما كان 👐
و نقعد نحضر الدوره الرمضانية.. و كواريك  و صفافير
العجب لمن اللاعب يعمل ليو حركه
او #يجبد لاعب
او #يقيسو
او #يبيضو  لا حول ولا قوة الا بالله دي هنا الحلة كلها بتسمع الكواريك و بتعرف انو في زول طبقو فيو نظرية 😂😂😂
و مرات بنكون قاعدين جمب الجامع نكشف للهناي القدرنا 😍 الوقت داك حدنا نعاين بس 😞
لكن الكبار شويه امورهم واضحه 😉❤
اها يلا لو اليوم مافيو كورة بنكون قاعدين نتونس في امان الله
يقوم يجي واحد من ورا شايل #ليفة_سلك و مولعه نار وتعالو شوفو الجري 😂😂
تحلف تقول الناس دي شافت شيطان 👿
داك بكون ساكي الناس #بسلك_اللماع ده و يرش فيهم 😂😂
و دايما بركز علي الاولاد الما جرايين لانو المتعه هنا الود جاري و #يتشتش 😂😂😂
تش!
تش!
تش! دي تسمعها في ضهرك 😅
و تلقي باقي الاولاد ممردغين في الارض ضحك في صاحبنا #المرشوش 😂😂😂
و غالباً ما كانت بتنتهي بشكلة و طوب و فليق لكن تاني بتصالحو عادي 😁✌
و بعداك بنشيل أغطية حللنا و جرادلنا و باقاتنا و نطلع نزعج الناس اقصد نسحر الناس 😁👏👏
.
ياسلاااام ياخ 😍 زمن سمح والله ❤
ليته يعود يوماً 😞
.
.
محمد طارق | زول درويش.

برنامج #وطن_اب
"قال المشكله الاقتصادية دي ما السودان براو بعاني منها
و دول مثلنا تعاني
قال لدينا من الامكانيات ان نخرج من هذه المشكلة الاقتصادية
و لدينا الحلول لنخرج منها!!!"
قال سبب المشكلات دي مجموعة منظراتية انقسمت سوا كان في الحكومة او المعارضة ما قاعده تغوص في الشعب ولا عارفه عنو شي و نحن من الشعب و عارفين!!
.
واحد! حلولكم دي غير مرجعانا لورا وكاسره ضهر ام الوطن ما عامل شي!
اتنين!  مدام انتو من الشعب وعارفين و حاسين و عايشين المعاناة معاهو طيب البتسو فيو ده شنو؟!
تلاته!  الإحباط الحاصل الان سببو انتو
.
السودان غني الفقر في العقول الاداريه

عند إشتياق

#عند_إشتياق

ناداها لتأتي إليه
فلتتفضلي يا سيدتي
إجلسي بقربي
هنا في حضني..
ضمها بقوة
من شده إشتياقه..
و مسك كفها وضعه علي خده
ثم إنحنى و قبله كما يقبل السيد كف سيدته..
ثم أخذ يدها
وراقصها..
ثم حلقوا مثل الفراشات فوق الأرض
حملهم الشوق بعيداً..
الي السماء
بين السحب
و ظلوا يرقصون هنالك..
ممسك بيدها بقوة
يشعرها بالأمان..
فسلمت له أمرها
فهو الان حاميها
درعها
سيدها
و حارسها..
لا زال يراقص طفلته
نعم هي طفلته
صغيرته
التي يعشق و يهوى..
يراقصها و يراقبها
ضحكتها
عيناها
خدها المحمر شوقاً
شعرها الحريري المنسدل
و شفتيها التي تود أن تعبر عن شوقها و توقها..
جلسا عند طرف الغيمة
يراقبان الكون من فوق..
وضعت رأسها علي صدره
تستمع لدقات قلبه
الذي بات هو قلبها..
أنفاسه المتصاعدة
سريان الشوق الجاري علي عروقه..
همس لها في أذنها
أحبك..
أحبك سيدتي..
أحبك صغيرتي..
و قبلها في جبينها و ضمها عليه مجدداً..
ثم خيم صمت ممزوجاً بسعادة لا توصف..
فبكت الغيمة دون أن تشعر
و أنبتت الأرض أزهار حبٍ و إشتياق..
.
.
محمد طارق | زول درويش.

الهاربين من الواقع

#الهاربين_من_الواقع..
.
حين ذهجة عند إرتفاع الضجيج في موقع العمل، صوت الطرق علي الحديد، ماكينات القطع، ضجة العمال، توجهت لبائعة الشاي التي تجلس بالقرب من المبنى الذي أعمل به،
ذهبت كي أرخي أعصابي و أرح بالي قليلاً،
جلست هنالك في ذلك الفناء أخذت مقعدً عند ظل الشجرة الوريف، بعد أن طلبت كوب شاي بالنعناع، إتكئت علي الجدار الذي خلفي،
و بينما انا أنتظر صرت أتجول بنظري علي وجوه الأشخاص الذين يجلسون من حولي ..

علي يميني امرأة و رجل يبدو انهما زميلان في العمل، يحكي لها عن إبنه الذي إحتاله عندما طلب منه مبلغ لشراء تذاكر سفر و زاد عليها مبلغ 200 جنيه، فيضحك الوالد ضحكة انتصار، ثم يغير مجرى الحديث..

هنالك علي الناحية الشرقيه من المكان يوجد فتى اورنيش يضع أمامه سلة صغيرة بها اداوته، فرشاة و منظفة و علبة لماع صغيرة، ينظف لسيدة ترتدي "توب" أبيض يبدو أنها موظفه حكومية، و هي تتحدث في الهاتف مع صديقتها تحدثت مطولاً لم أستطع قراءة شفتيها،  ولكن يبدو انهما تتحدثان عن "صرفة" فهؤلاء الموظفات يعشقن "الصرفات" ..
.
قاطعتني الخالة بوضعها كوب الشاي أمامي، فأخذت ارتشف منه قليلاً ، و ضعت الكوب، لتخف حرارته قليلاً فعادةً لا أشرب الشاي حارً، حينها رجعت مرة أخرى أتجول بنظري حول المكان ..
.
هنالك شاب يعمل في ماكينة تصوير يتوجه اليه رجل يرتدي بذلة رسمية، يبدو أنه رجل أعمال له صيت و يتبعه سائقه الذي يتملقه منذ دخولهم ذلك الفناء، يحادث الشاب و يلقي عليه الدعابات حتى تعالت ضحكاتهما ، لا أعلم لماذا رجال الأعمال هنا يرتدون بذلات غير مرتبه او تبدو قديمة و ألوانها غير متناسقة ، في بعض الأحيان أشعر بأنه لم نخلق لنرتدي هذه البذلات..

في الناحية الأخرى فتاتان تتحدثان عن صديقتهما القبيحة التي تزوجت من شاب وسيم، تشمتان منها و يبدو الحسد علي نظراتهما، أشحت بنظري بعيداً عنهما لطالما كرهت سطحية هؤلاء الفتيات اللاتي يعتقدن أن الحياة هي رجل وسيم و ثري ..

أسفل تلك الشجرة شباب يجلسون سوياً في شكل حلقة يتجاذبون أطراف الحديث،  وترتفع قفشاتهم بين الفينة والأخرى متناسين ضغوط الدراسة وما بعدها ..

علي يساري يجلس رجل في الأربعينات له لحية طويلة، أخرج هاتفه متصلاً علي شخص، وعندما أجابه ذلك الشخص بدأ الحديث ضاحكاً " سلام عليكم باش مهندس.. كيف حالك؟  تعرف ضرب لي بكري من السعوديه قال لي افتح الفيس بتاعك شكلو اتهكر فيو صور فاضحه نازله.. ياخي دي المره التانيه تحصل لي.. ولدي قال لي اعمل و سوي لكن برضو ما نفع... "

حينها ضحكت بداخلي و عدت إلى كوبي و أدركت أنهم مثلي، هناك شئ مشترك بيننا،
هاربين من الواقع، محملين بالهموم الثقيلة، يخففون و يرفهون عن أنفسهم بهذه الأحاديث و الجلسات الودية ..
.
.
محمد طارق | زول درويش.

جلابي

#جلابي 👳💵💸
.
وانت جاي ماري جنب برج البركه
او الجامع الكبير فجأة يجيك واحد يقول ليك بصوت وااااطي صرف يا استاذ..
"طبعاً كلمة استاذ دي تخليك تبتسم للضرس الاخير 😁"
تمشي منو تلاقي واحد قاعد ليو في حجر و يأشر ليك بيدو صرف صرف..
وانت شغال طناش ساااي 🤐
و يهمس ليك واحد متكل في عربية "دولار ريال درهم"
فشنو تقوم بدافع الفضول تسال عشان تعرف الدولار عمل كم؟
يلا بس قولة #بكم تلقا الجماعة كلهم يقابضو فيك 😂😂😂
وانت في جيبك غير تلاته جنيه حق المواصلات و كرت اريبا ابو جنيهين قاعد ليو اسبوع ما عندك شي🙊
و تحاول تعمل فيها مهم 😎
و تتدارك للموقف طوالي 😌
و تقول ليهم ما شايل معاي لكن بجيكم راجع 😅
.
.
في اللحظة دي بجيك إحساس انك #جلابي #جلابي و الدولارات تتطاير من يديك الخشنات 💵 💸
.
.
اللهم جلبنا من حيث لا نحتسب 👐
.
.
محمد طارق | زول درويش.