جلاكسي..

#جلاكسي 🍫😋
.
من طلعت شوكلاته جلاكسي و شايف في الدعايات كلهم بنات و استغربت ليه ما في اولاد بعملو الدعايات دي؟!😅
والشي المحيرني اكتر الحالة النفسية البتجي للوحدة اول ما تاخد ليها قرمة من الشوكولاته!!
فجأة كده تقوم وتلف في مكانها و تتلفت وتغمض عيوناتها و تترجف زي الماخدة مخدر 😁
و تظهر جبال وشجر و بحر نضيف و حدائق وحاجات كده تفتح النفس 😌
.
فشنو قلت اجرب الشعور ده 😎✌
اشتريت لي جلاكسي و دسيتها و طلعت الحوش اخدت لي زاويه بعيده عن النظر عشان ما في زول يجي يقول داير 😈
و بس فتحت الكيس كده ضربني هوا و دعاش باااااااارد 😍ياسلاااام يا 😍
و قرمت منها حته 😋
و طوالي جاتني حالة روحانية.. و بس قلت خلاص هسه يظهر لي بحر قدامي و اقعد ادور  في مكاني..
و تظهر لي شجرتين جوز هند معلق في نصهم طرحة كبيره زي طوطحانية و اقوم استكين فيها 😍
.
لكن دون مقدمات لقيت روحي جريت نحو الحيطة و تلبت فيها
ومن الحيطة راس البيت!!!
في ثواني بس لقيت روحي متكل في طرف سقف الاوضة 😎
و دورت اكل في الجلكسي
ضربتها ضرب
اكل السوسه والعافيه المدسوسة 😁
و قبلت علي الكيس 😍
الكيس قرب يقوم جاري مني 😅
و بعد خلصتها و لحست اصابعي انتهت الحالة الروحانية..
فشنو اعاين لنفسي والقى شكلي كيف كيف!!
ملان عرق!
والشمس دي في نص الراس!
و اتوسخت بالغبار الفوق!
و ناس الحلة واقفين في الشارع يعاينو لي بدهشة واستغراب!!!
و النزله زاتو غلبتني!
وما عرفت انزل كيف!
و بعد مجازفات و اكروبات و جمباز قدرت انزل من فوق 😎✌
.
و عرفت ليه ما كانو بختارو اولاد في الدعايات
عشان القرد الجوانا ما يجي مارق 😅
.
و #جلاكسي_عندما_تعشق_الشوكلاته  ❤
.
.
محمد طارق | زول درويش.

ما بين النافذتين

#ما_بين_النافذتين!!
.

كنت أجلس بالقرب من النافذة في الحافلة واضعاً سماعات الأذن أستمع للموسيقى، شارد الذهن،  أتجول بنظري خارجاً في الطريق،
حتي توقفت الحافلة لينزل أحد الركابُ
وفي ذات اللحظة توقفت حافلة في الناحية الاخرى،
لم أعرها إنتباهي
حتي وقع نظري علي سمراء متوشحة بالجمال!
ربما لو وقف الجمال أمامها لفر هارباً من جمالها!
و الغريب في الأمر انها كانت تنظر إلى!
نعم!
بذات اللهفة و الإعجاب!
تبادلنا النظرات..
إبتسمت لي فابتسمت لها..
تبادلنا التحايا من على البعد!
غمزت لها عيني فاخفضت راسها خجلاً..
رفعت رأسها و تبسمت مرة أخرى حتي انتفض قلبي!
يبدو إنها وقعت في غرامي ويبدو إني كذلك!
كنت أعتقد ان الحب من أول نظرة هو مجرد هراء!
لا يحدث إلا في القصص والروايات..
لم أتوقع يوماً أن اكون بطل لقصة مثل هذه..
جلست في مكاني أتوق لها!
لكن كيف لي أن أصلها!
حينها لم أتردد لحظة
حركت يدي مشيراً لرقمها
فبدأت تحرك شفتيها تردد ما يبدو رقم جوالها! 
وبدأت بدوري في محاولة لجمع تلك الأرقام و تسجيلها..
هاهي تنطقها ليحملها الهواء إلي في طبق من ذهب..
09
1
7
4
0
إبتسمت حتي بانت نواجذي
وشكرت الحظ لهذة الصدفة التي لن تتكرر..
في تلك اللحظة حين إنغماسي بين أرقامها تحركت الحافلة دون سابق إنذار!
تحركت مسرعة!
حتى إصطدم رأسي بالنافذة!
كل شئ تلاشى في ثوانٍ!
تسمرتّ في مكاني ولم ادري كيف أتصرف!
كل الأفكار تدل على اللاشئ..
رأيتها تبتعد مني!
لا يمكن!
أخرجت رأسها من النافذة وهي تنظر إلى و عينيها الواسعتان تزرفان دموع الحسرة!
انظر اليها وتنظر الي..
في مشهد درامي يجب أن يمثل في المسارح،
تحطمت قلوبنا وسقطت علي الطريق الملئ بالأتربة و الأوساخ!
ننظر إلى بعض
حتي تورات حافلتها خلف الحافلات الأخريات والركشات!
في ذلك الطريق إنتهت قصتنا التي بدأت للتو!
.
و إشتغلت أغنية
عديلة في أذني
"Hello from the other side
At least I can say that I've tried
To tell you I'm sorry, for breaking your heart
But it don't matter, it clearly doesn't tear you apart anymore" ✋
.
و أعادني الكمساري إلي الواقع وهو يطالب بحقه بعد أن دقست و سرحت بخيالي بعيد. .
فتعوذت من خيالي المعاق وحمدت ربي، و دفعت للكمساري،
و رجعت أسبُ زحمة المواصلات..
و أتصبب عرقاً من الشوى الحاصل ده!
.
.
محمد طارق | زول درويش.

الوصف عند الجنس اللطيف

#حقيقةً_كده!

الوصف و الإتجاهات نخليها بس للجنس اللطيف!
بدوك احساس انو ما حصل قبل كده مرت عليهم جغرافيا دي نهااائي!
كدي تعالو نشوف بوصفو كيف!

- اسمعيني اول ما تخشي باللفة بتلقى بيت جمبو عمود يلا خليو وامشي طوييييل بلقاكي بيت تاني قدامو عمود بس شفتي خليو يلا البيت الجمبو طوالي بس انت وصلتي! 😳
(بغض النظر عن انو الشارع كلو اعمدة لكن اظن الوصف واضح! 😂😂😂)

- اهاا اول ما تنزلي من الزلط خش بالشارع طوالي بلاقوكي كلاب يلا تقومي تزحي منهم عشان ما يسكوك وتمشي دغري بلقاكي دكان جمبو صناديق بارد مختوته برا بس العماره الوراو !  😳
(طبعاً الشارع كلو دكاكين انت وحاستك العاشرة) 😂

- شفت تخش باللفة الفيها خور وشجرة كبيرة يلا بتقوم تلاقيك عربية لونها فوشي بس انت كده وصلت ! 😳
(طبعاً لو سيد العربيه ساقها انت حتكون حايم اليوم كلو تفتش للعربية الفوشي 😂)
.
و العجب لو انت داير توصف لوحدة! 
اييييك لا اله الا الله!
حتقول ليها (من مكانك الواقفة فيو حالياً قبلي شمال جغرافي و اول لفة يمينك خشي بيها!)
يلااا بس شفتو الجملة دي حتكون طشت بيها شبكة
و فيوزات راسها تضرب
و القيامة تقوم! 😂😂😂
.
ياخي والله بروحو جنس روحان
و بطشو جنس طشاش! 😁😁
يلا طوااالي مفروض يمشو يطلعو #رخصة_مشاة 😝
تجنباً للروحان الحاصل..
.
غايتو بس نفسي اعرف السر شنووووووو! 😅
.
.
محمد طارق | زول درويش.

في صالون الحلاقة

#في_صالون_الحلاقة
.
كالمعتاد بعد ما الشعر كتر مشيت الصالون عشان احلق واتظبط كحال الجميع..
المره دي مشيت صالون اول مره امشي ليو وقالو عنو كويس.. 
خشيت سلمت و قعدت..
الجو عادي..
ريحة الكلونيا 😌
شويه موسيقى شغاله.. 😎
التلفزيون معلق في الكورنه..
صوت مكنة الحلاقه..
دعابات الزبائن مع الحلاقين.. 😁
الزجاج و المرايات المغطية الحوائط..
كل حاجة عادية ..
جا دوري خشيت قعدت و الحلاق بدا حلاقة.. 😌
اثناء ما هو شغال كده فجأة وقف!
في واحد من الحلاقين علا صوت التلفزيون..
بعد شويه اي واحد خلا اي شي في يدو و وقفو  في نص الصالون..
استغربت الجماعه ديل مالهم! 😳
بقيت بعاين ليهم و بعاين للتلفزيون!
.
طق طوالي في اغنيه حبشيه اشتغلت!
قبلت اعاين للجماعة لقيتهم  منطربين
و شغالين يرقصو مع الاغنيه! 👏✌👐👏✌👏
ياربي السودانين ديل جنو ولا شنو؟!
وفجأة الجماعه بقو يرطنو!
اييييييييييك!
اتاريهم حبش!
و تعالو شوفو الرقيص والحت!
لقيت نفسي قاعد براي و صراحة كده عجبتني الغنيه واصلا بحب الاغاني الاثيوبية 😎✌
و تلبت من الكرسي
و جووه الجك خشيت في نصهم!
اهااا 👏👏👏👆☝✌☝👆✌👏👏
"فاتا فاتا فااااتا لااااالا ماتا فاتا ماتا
فاتا فاتا تشي لالااااا تشي فاتا ماتا فاتا
اهااااا 👏 👏 👏 👏 ☝"

والغنيه كاتمه
و الجماعه ديل حتوهو حت القرض 👏👏
الحكاية قربت تقلب ظار 😈😁
و طوالي شبكتهم
بربس
هاا
بربس
هاا
بربس 👏👏
.
لمن رقبتي اتشمطت
وبقيت عامل زي علامة الاستفهام ❔
وجاني نشاف في المفاصل
و الركب طقطقن! 😅
و نفسي قام تحلف تقول ساكيني كلب! 😅😋
اها بجاي بجاي الحمدلله انتهت الاغنيه بسلام..
وعم الهدوء المكان
ورجعت مقعدي خلصت حلاقتي
وطلعت ركبت ركشه لحدي بيتنا لانو صراحة كده غلبني المشي 😂😂😅😅
.
وحكينا القصة دي ليه!
عشان نعرف انو الرقيص ده ما هين!
رياضه وصحي جدا وبنشط الدورة الدموية
و مفيد للمفاصل
وناس الروماتيزم و الغضاريف..
و انو نص السودانين الموجودين حالياً هم حبش ما سودانيين 😌✋
.
و حقيقةً كده!
سودانا الخدار
سودانا السخانه
سودانا الحبش..  💗
.
.
محمد طارق | زول درويش.

حقيقةً كده!

#حقيقةً_كده!
.
الواحد بقى لمن يشوف النت عمل +H بتجيو صدمة فرايحية و تمسكو حالة من الهلع الانبساطي 😁
وتلقاهو بتبسم براو 😌
و لو مسخن ينسى السخانه
و لو زهجان مزاجو ينعدل!
و العجب لو النت بعد صلاة العشا بقى راشي كده!
ياسلاااام يا 😍
تجيب كرسي تختو برا جمب خشم الباب
وتبدأ تهيئ في الجو 😎
توصل الخرطوش..
تملا الازيار..
ترش الشجر..
تدي الشارع رشه خفيفه كده
و يجيني رشاش
واشم الطين 😍
انا ياناس بدور افرح 😍
هوي ياناس سوداني اوقسوم بالله بدور افرح 😁
و تقعد بمزاااااج 😌
تستكين في الكرسي و تخلف رجل فوق رجل و تبدا تشخط في التلفون 😁
و ترتشف كوب من شاي لبن دافي 😌
و ما تشتغل ب نقة الباعوضة!
وتندمج اخر اندماجة
و تسافر عبر الاسافير 😎
.
و اول موضوع يعجبك تجي تفتحو الشبكة تقلب E و تحلف ما تفتح ليك!!
و تكتم فيك!
لا واتساب ولا فيس ولا غيرو!
غايتو لو ايمانك ضعيف عادي ممكن تفك التلفون في الحيطة 😅
لو خلاص النت جاملك! رسايل الواتساب تجيك بعد ساعة!!
و تجي رسالة رسالة!
في النهاية تحردو وتلم عفشك و تمشي تشوف نومك بوين!!
#يافرحة_ما_تمتش!
ياخي تيييت لشركات الاتصالات
و تيت خاص من هنا لحدي شركة سوداني 😒
.
وترجع ياك انت عابس ومصرصر زي ما كنت!
.
#النت_إسلوب_حياة_مشحتفة!
.
.
محمد طارق | زول درويش.

الاجازة الصيفية

#الاجازة_الصيفية! 😎✌
.
يلا بعد كل سنة دراسية كنا بنكون منتظرين بفارغ الصبر متين الاجازة تجي! مترغبين اخر يوم في الامتحانات عشان ننطلق في الشوارع و الفسحات!
العندو عجلة بجهزها
والعندو كورة بطلعها
والعندو اتاري بخليو جاهز
والعندو بلي يختو في علب الكريستال!
و يجي اخر يوم في الامتحانات و تبدا الاجازة 😍
.
الفترة الصباحية بتكون لعب بالعجلات و سباق و تفحط و تدق كومار و تشنق اللستك!
نمشي نفطر ونطلع الشارع تاني!
الفتره النهارية اي واحد بشيل نبلتو ومن شجرة لشجرة ومن عمود لعمود 😈😎
رحلة صيد داخل الحلة وشوارعها! 😁
او مشينا نقطع البرازيل و المنقه من الشجر ونجي ناكلو بالملح والشطه 😋
.
ويوم الجمعة بعد الصلاة كنا بنشد الرحال ونمشي البحر،، جلكسات و ندق راس وغطس و نلعب الكاس عبارة عن سك سك بس جوة الموية..
و نرجع البيت نستحمى و تقعد قصاد التلفزيون #اسبيس_تون قناة شباب المستقبل.. وفعلاً حالياً نحن شباب المستقبل..
كابتن ماجد، هيفي كروكيت، كونان او اي كرتون من كرتون الحقبة ديك.. 😇
العصر نطلع الدافوري و البيبسي.. الدافوري الاقوانو طوبتين و الحكم هو اكتر واحد بحلف، وما بنتهي مالم يقتنع الفريقين و يتعبو وعادي ممكن يكون مدور لحدي صلاة العشا..
ولو سيد الكورة زعل بشيلها ويمشي بيتهم و الدافوري انتهى.. 😁✌

ولو مافي دافوري تلقى الشكلة مدوره في البلي!
العين! و اللين!
الضراب!  الجُله!
ترس نايبو حرس!
سفينه تغرق!
نظر!
.وغيرو من المصطلحات 😉
.
الفترة المسائية بتكون بعد المغرب
نلعب بمبه!
شليل وينو!
ام الخمستاشر!
شد و اركب! و كتير من الالعاب..
وبعداك نمشي الدكان نعمل البوش! 😋
البوش اي واحد بمشي البيت يجيب معاو حاجه
واحد يجيب عيش لو في!
واحد يجيب بصل او طماطم!
واحد يجيب الصحن و لو في زيت يجيبو برضو!
و الما عندو شي غير ديل يدفع قروش وما بتكون كتيره!
ونظبط الفته 😍
و الحركة الغياظة التي ابكت ملاين الشفع هي لمن يكون خلاص البوش علي وشك انو ينتهي يقوم واحد يكورك #كرعت و يخطف الصحن ويقوم جاري بيو 😁😂
بعداك انت وسرعتك يا خطفت ليك لقمة لقمتين يا طلعت من الناس المتحسرة وباكية! 😭
وما اظن الوقت داك في بوش الناس قعدت فيو بسلام لحدي ما قامت شبعانه! 😅
دايما مكرعة 😂
وفي نوعية كانو بعملو #بوش_تل ديل بعد يشبعو بقومو جارين وما بحاسبو سيد الدكان! 💨🏃🏽
الحمدلله الوقت داك القلم كان مرفوع عننا 😌😁
.
.
الحاجات دي لو ما كلها نصها حالياً موجود..
لو لاحظنا لاخواننا الصغار وهم بلعبو ،،  بحسسوك انو لسه الدنيا بخيرها 😊،، وبنشوف فيهم طفولتنا زمان..
لكن الجاين بعدهم ديل الله اعلم يلقو شي من ده!!
.
.
ولنا في الماضي ذكريات جميلة ترسم على وجوهنا إبتسامة عريضة كلما مر نسيمها وفاح شذاها في الخاطر 😊
.
.
محمد طارق | زول درويش.

قصة محزنة!

#قصة_محزنة 😔
.
في احد الزقاقات كان الفار خالط حبيبتو الفاره و مبسوطين للضرس الاخير..🐭❤🐭
الوقت اتاخر قالو يرجعو خلاص..  واثناء ما هم ماشين سمعو كركبه وراهم!
قلبهم انقبض و خافو وقبلو ما لقو شي!  😨
مشو شويه الكركبة زادت!
فجأة ظهرت كديسة من ورا شوال الوساخة! 🐈
وقفت ليهم و الشر يتطاير من عيونا 😈
الوقت داك الفار والفاره فكو الجريه واطلقو العنان لكرعيهم الصغار و فحطو! 💨💨💨🐀
جارين والكديسة جاريه وراهم!
🐈💨💨💨💨
من زقاق لزقاق!
جحر جحر!
زنقة زنقة!
والكديسة لسه مفحطة وراهم 😈😈
واثناء ما هم جارين الفاره وقعت في موية بلاعة مكشحه في الشارع!
وما قدرت تتحرك! 😱
الفار رجع عشان ينقذها لكن هي كوركت فيو!
اجري يا الفار!  كبرها خليني! الفارات كتارات بتلقى احسن مني!  اجري يا الفار! 😢✋
الفار غلبو يعمل شنو!  وبقى مسمر مكانو!
والكديسة نطت في الفارة و اكلتها!  😞
الفار وقع في الارض يبكي!  😭
ويبكي 😭😭
و زعل زعل شديد!
وغضب! 😤😡
وقرر انو ينتقم لحبيبتو!
وسافر الصين!  🀄
اتعلم فنون القتال! 💪
الكونغ فو!  الجيتسو!  الكاراتيه! 
و هو راجع جاب معاو ذواكر موبايلات قال يبيعها! 😎😁
المهم شرك للكديسة في نفس الزقاق! 😠
والكديسة جات!
واتشاكلو!
فجخ لرب السما!
دق شلاليت كفيت!  فنش!  👊👊💢🌟🌟👊💢🌟💥💪✊💢🌟
ار كي او!
دي تي تي!
و الكديسة لسه فيها روح! 😰
و قامت سكت الفار! 👿
وقوم يا الفار اقع في نفس المكان ونفس البلاعة!!!
و جات الكديسة زعلانه جكك!
قرمت راسو و اكلتو 😞😭
و مضت في طريقها تبحث عن فيران تانين! 🐭🐀🐭
.
وحكينا القصة دي ليه!
عشان نعرف انو الكبير بياكل الصغير😔
وانو لا يلدغ المؤمن من جحر مرتين! 😁
.
.
محمد طارق | زول درويش.