حقيقةً كده!

#حقيقةً_كده!
.
الواحد بقى لمن يشوف النت عمل +H بتجيو صدمة فرايحية و تمسكو حالة من الهلع الانبساطي 😁
وتلقاهو بتبسم براو 😌
و لو مسخن ينسى السخانه
و لو زهجان مزاجو ينعدل!
و العجب لو النت بعد صلاة العشا بقى راشي كده!
ياسلاااام يا 😍
تجيب كرسي تختو برا جمب خشم الباب
وتبدأ تهيئ في الجو 😎
توصل الخرطوش..
تملا الازيار..
ترش الشجر..
تدي الشارع رشه خفيفه كده
و يجيني رشاش
واشم الطين 😍
انا ياناس بدور افرح 😍
هوي ياناس سوداني اوقسوم بالله بدور افرح 😁
و تقعد بمزاااااج 😌
تستكين في الكرسي و تخلف رجل فوق رجل و تبدا تشخط في التلفون 😁
و ترتشف كوب من شاي لبن دافي 😌
و ما تشتغل ب نقة الباعوضة!
وتندمج اخر اندماجة
و تسافر عبر الاسافير 😎
.
و اول موضوع يعجبك تجي تفتحو الشبكة تقلب E و تحلف ما تفتح ليك!!
و تكتم فيك!
لا واتساب ولا فيس ولا غيرو!
غايتو لو ايمانك ضعيف عادي ممكن تفك التلفون في الحيطة 😅
لو خلاص النت جاملك! رسايل الواتساب تجيك بعد ساعة!!
و تجي رسالة رسالة!
في النهاية تحردو وتلم عفشك و تمشي تشوف نومك بوين!!
#يافرحة_ما_تمتش!
ياخي تيييت لشركات الاتصالات
و تيت خاص من هنا لحدي شركة سوداني 😒
.
وترجع ياك انت عابس ومصرصر زي ما كنت!
.
#النت_إسلوب_حياة_مشحتفة!
.
.
محمد طارق | زول درويش.

الاجازة الصيفية

#الاجازة_الصيفية! 😎✌
.
يلا بعد كل سنة دراسية كنا بنكون منتظرين بفارغ الصبر متين الاجازة تجي! مترغبين اخر يوم في الامتحانات عشان ننطلق في الشوارع و الفسحات!
العندو عجلة بجهزها
والعندو كورة بطلعها
والعندو اتاري بخليو جاهز
والعندو بلي يختو في علب الكريستال!
و يجي اخر يوم في الامتحانات و تبدا الاجازة 😍
.
الفترة الصباحية بتكون لعب بالعجلات و سباق و تفحط و تدق كومار و تشنق اللستك!
نمشي نفطر ونطلع الشارع تاني!
الفتره النهارية اي واحد بشيل نبلتو ومن شجرة لشجرة ومن عمود لعمود 😈😎
رحلة صيد داخل الحلة وشوارعها! 😁
او مشينا نقطع البرازيل و المنقه من الشجر ونجي ناكلو بالملح والشطه 😋
.
ويوم الجمعة بعد الصلاة كنا بنشد الرحال ونمشي البحر،، جلكسات و ندق راس وغطس و نلعب الكاس عبارة عن سك سك بس جوة الموية..
و نرجع البيت نستحمى و تقعد قصاد التلفزيون #اسبيس_تون قناة شباب المستقبل.. وفعلاً حالياً نحن شباب المستقبل..
كابتن ماجد، هيفي كروكيت، كونان او اي كرتون من كرتون الحقبة ديك.. 😇
العصر نطلع الدافوري و البيبسي.. الدافوري الاقوانو طوبتين و الحكم هو اكتر واحد بحلف، وما بنتهي مالم يقتنع الفريقين و يتعبو وعادي ممكن يكون مدور لحدي صلاة العشا..
ولو سيد الكورة زعل بشيلها ويمشي بيتهم و الدافوري انتهى.. 😁✌

ولو مافي دافوري تلقى الشكلة مدوره في البلي!
العين! و اللين!
الضراب!  الجُله!
ترس نايبو حرس!
سفينه تغرق!
نظر!
.وغيرو من المصطلحات 😉
.
الفترة المسائية بتكون بعد المغرب
نلعب بمبه!
شليل وينو!
ام الخمستاشر!
شد و اركب! و كتير من الالعاب..
وبعداك نمشي الدكان نعمل البوش! 😋
البوش اي واحد بمشي البيت يجيب معاو حاجه
واحد يجيب عيش لو في!
واحد يجيب بصل او طماطم!
واحد يجيب الصحن و لو في زيت يجيبو برضو!
و الما عندو شي غير ديل يدفع قروش وما بتكون كتيره!
ونظبط الفته 😍
و الحركة الغياظة التي ابكت ملاين الشفع هي لمن يكون خلاص البوش علي وشك انو ينتهي يقوم واحد يكورك #كرعت و يخطف الصحن ويقوم جاري بيو 😁😂
بعداك انت وسرعتك يا خطفت ليك لقمة لقمتين يا طلعت من الناس المتحسرة وباكية! 😭
وما اظن الوقت داك في بوش الناس قعدت فيو بسلام لحدي ما قامت شبعانه! 😅
دايما مكرعة 😂
وفي نوعية كانو بعملو #بوش_تل ديل بعد يشبعو بقومو جارين وما بحاسبو سيد الدكان! 💨🏃🏽
الحمدلله الوقت داك القلم كان مرفوع عننا 😌😁
.
.
الحاجات دي لو ما كلها نصها حالياً موجود..
لو لاحظنا لاخواننا الصغار وهم بلعبو ،،  بحسسوك انو لسه الدنيا بخيرها 😊،، وبنشوف فيهم طفولتنا زمان..
لكن الجاين بعدهم ديل الله اعلم يلقو شي من ده!!
.
.
ولنا في الماضي ذكريات جميلة ترسم على وجوهنا إبتسامة عريضة كلما مر نسيمها وفاح شذاها في الخاطر 😊
.
.
محمد طارق | زول درويش.

قصة محزنة!

#قصة_محزنة 😔
.
في احد الزقاقات كان الفار خالط حبيبتو الفاره و مبسوطين للضرس الاخير..🐭❤🐭
الوقت اتاخر قالو يرجعو خلاص..  واثناء ما هم ماشين سمعو كركبه وراهم!
قلبهم انقبض و خافو وقبلو ما لقو شي!  😨
مشو شويه الكركبة زادت!
فجأة ظهرت كديسة من ورا شوال الوساخة! 🐈
وقفت ليهم و الشر يتطاير من عيونا 😈
الوقت داك الفار والفاره فكو الجريه واطلقو العنان لكرعيهم الصغار و فحطو! 💨💨💨🐀
جارين والكديسة جاريه وراهم!
🐈💨💨💨💨
من زقاق لزقاق!
جحر جحر!
زنقة زنقة!
والكديسة لسه مفحطة وراهم 😈😈
واثناء ما هم جارين الفاره وقعت في موية بلاعة مكشحه في الشارع!
وما قدرت تتحرك! 😱
الفار رجع عشان ينقذها لكن هي كوركت فيو!
اجري يا الفار!  كبرها خليني! الفارات كتارات بتلقى احسن مني!  اجري يا الفار! 😢✋
الفار غلبو يعمل شنو!  وبقى مسمر مكانو!
والكديسة نطت في الفارة و اكلتها!  😞
الفار وقع في الارض يبكي!  😭
ويبكي 😭😭
و زعل زعل شديد!
وغضب! 😤😡
وقرر انو ينتقم لحبيبتو!
وسافر الصين!  🀄
اتعلم فنون القتال! 💪
الكونغ فو!  الجيتسو!  الكاراتيه! 
و هو راجع جاب معاو ذواكر موبايلات قال يبيعها! 😎😁
المهم شرك للكديسة في نفس الزقاق! 😠
والكديسة جات!
واتشاكلو!
فجخ لرب السما!
دق شلاليت كفيت!  فنش!  👊👊💢🌟🌟👊💢🌟💥💪✊💢🌟
ار كي او!
دي تي تي!
و الكديسة لسه فيها روح! 😰
و قامت سكت الفار! 👿
وقوم يا الفار اقع في نفس المكان ونفس البلاعة!!!
و جات الكديسة زعلانه جكك!
قرمت راسو و اكلتو 😞😭
و مضت في طريقها تبحث عن فيران تانين! 🐭🐀🐭
.
وحكينا القصة دي ليه!
عشان نعرف انو الكبير بياكل الصغير😔
وانو لا يلدغ المؤمن من جحر مرتين! 😁
.
.
محمد طارق | زول درويش.

لحظة تأمل!

#لحظة_تأمل!
.
وقفت أمام شارع الزلط بعد غياب طويل..
وقفت أتأمل الماره
الوجوه العابسه و البشوشه
الملامح التي أكل عليها الدهر..
الأجساد النحيلة و المتعبة..
وقفت أتأمل الحياة كما نعرفها و كما عهدتها ..
السيارات
المواصلات
"مريم الشجاعه - الروزا -الهايس -الركشات - بص الوالي "
الكارو
الزاحفين علي أقدامهم..
و الجالسين أمام الدكاكين
ستات الشاي و الكسره
الأفران، أمامها بترينات الطعمية..
الجزاره، باعة الخضروات..
الحدادين و النجارين..
دكاكين الغاز الملئية بالعبوات الفارغه..
الأكياس و الأوراق و صفق الشجر  المتبعثرة علي الأرض..
صياح الأطفال الغُبش
الدافوري و التشغيلات..
أصوات المأذن تنادي للصلاة..
صينية الأكل "طعميه -فول جبنه زيت سمسم -سلطة الخضار - المُلاحات - الكسره بالوكيه - قراصه بالدمعه - العصيدة - سلطة الروب "..
شاي الصباح و المغربيه..
الهواء المحمل بالأتربه و الأصوات البعيده..
هنالك حفل علي الشمال و صوت بكاء من الجنوب..
و عواء كلاب من الشارع المجاور..
السيمفونات المعزوفة من قبل فرقة الباعوض
و الترانيم التي يُرددها الذباب..
كل ذلك وكل شئ يشي بأنه توجد حياة
حياة ما زالت مستمرة..
بالرغم من كل المحن
المأسي
الألم
الوجع
الحال المعوّج
التدهور
بالرغم من الضيق
الا إنه ما زالت الشوارع تنبض بالحياة
و الأجساد تحمل كل ذلك و تمضي ..
.
وقفت أتأمل كل ذلك حتي أبتسمت!
دون أن أدري ما السبب!
أهو إشتياق لموطني!
ام للحياة التي أعدتها!
ام الفرق الكبييير بين هنالك و هنا!
ام ماذا يا تري ؟!
.
لست متأكد، لكني إبتسمت و الأن أبتسم. 😊
.
.
محمد طارق | زول درويش.

راودتني عن نفسي!

#راودتني_عن_نفسي!
.
ذات ليلة باردة عند منتصف الحلم راودتني عن نفسي، جاءت كما لم تأتي من قبل، كانت تقف عند الزاوية المقابلة بالقرب من الباب، تُحيط بنا جدران الفراغ المظلمة ، توقفت و أنا مشدّوه في الطرف الآخر من الفراغ، أتأمل ملامحها، بدت أكثر جمالاً من ذي قبل، تبتسم لي بإبتسامتها تلك التي تشي بنوع من الهدوء والثقة ،ترميني بسهام نظراتها القاتلة التي لطالما كانت نقطة ضعفي، تلك العينان المتسعتان ، تمارسان عليّ سحر الفتنة ،
مالت رأسها الي اليمين ليسقط شعرها منسدل فوق كتفها الأيمن و بحركة سريعة جمعته كله علي ذلك الجانب،
تُراقبني بصمت، تتربص ردة فعلي، كي تنال مني حين غفلة ،
و ضعت طرف إصبعها السبابة بين شفتيها، فغدت كأنها طفلة بريئة تترجى والدها ليبتاع لها قطعة من الحلوى..

وما زلت هنالك أقف و الحيرة تجتاحني، و الشك يساورني!
كيف لها أن تأتي دون إستئذان بعد كل تلك السنوات؟!
وكنت قد بدأت أتعود علي فراقها!
و ماذا تريد!
فكلانا أصبح له حياة مختلفة عن ما مضى!
بدأت تتحرك نحوي ببطء و تقترب مني خطوة تلو الأخرى،
وجدت نفسي أبتعد الي الوراء خطوة تلو الأخرى،
أسرعت خطواتها، و بدأت أسرع بدوري،
أعلم أني أفتقدها في بعض الأحيان و أشتاق لها، لكنه ليس بسبب كافي لأتقبل عودتها!
كلما أقتربت مني تضيق جدران الفراغ من حولي!
وهي تفرد يديها كطائر نورس يحلق فوق سطح البحر كأنما تطلب مني أن أتقبلها! و أحتويها!
كانت تهمس بكلمات لم أكن أميزها، فغدت كأنها تردد عليّ تعاويذ و ترانيم حتي أنصاع لها،
و في كل خطوة تخطوها اليّ أشعر برغبة لأنذوي لحضنها و أنعم بذلك الدفء الذي أحتاجة الأن و بشدة.. 

و في تلك اللحظة أغمضت عيني و فتحت لها أبواب صدري لأستقبلها في حضني، تركت كل الهواجس تسقط أرضاً ، ودفعت بكل الأحاسيس المُزعجة بعيداً،
وقفت هنالك كمن يناجي ربه فاتحٍ ذراعيّ رافعاً رأسي للسماء!
و لكن لم يكن هنالك سوى الفراغ،
تلاشت!
صورتها التي كانت أمامي قبل ثوانٍ أختفت!
حتي قبل أن أمسك بها!
و أرحب بعودتها!
ذهبت!
ذهبت كعادتها !
تركتني خلفها أقاتل حنيني بينما صرت أبحث عن صورتها بين رُفات الذكريات علي مضض !

و ذلك بعد أن قدّت قميص تماسُكي من دُبر..
.
.
محمد طارق | زول درويش.

زول فضيحة!

#زول_فضيحة
.
من عدم الموضوع قلت أتخيل إني مذيع في التلفزيون أو مقدم لأحد البرامج..
فشنو أصلاً ما حصل إتخيلت و لا نفسي أكون مذيع..
أوريكم السبب
" أسعد الله مسائكم بكل خير متابعيننا الكرام و جعل الله أيامنا و أيامكم كلها أعياد و أفراح..
أقوم أعاين للمذيعة المعاي عشان تبدأ تتكلم و فجأة القي نفسي ركزت في وشها الملان بوهيات و حاجات كيف كيف!
و جااااااااك افك الضحكه 😂😂😂
السبب قدامي ما محتاج تفسير!
أو مثلاً عامل لقاء مع واحد من المسئولين يقوم يشطح بي في الكلام و يسرح و يشبكني نحن عملنا و حنسوي و في اللحظة دي جااااااااك الضحكه تجي طالعه من جوه 😂😂😂😂
والله كضاب جنس كضب!
.
والله ولا بهظر الضحكة دي بفكها في أي وقت و أي مكان 😁
ببساطة كده زول فضيحة!
ومن صغير ضحكتي دي فاضحاني!
أعمل مصيبة في البيت يجو يلقوني بتتبسم براي! طوالي تثبت علي الجريمة! واخد علقتي ابكي وارجع اضحك تاني! 😁

من المواقف الفضيحية يوم في إسبوع المهندس صحبي عازم وحده من جامعة من الجامعات الهاي هاي ديك! و داير يقشر بيها و البت امورها واضحة!
المهم ضرب لينا عشان نجي نسلم، أول ما جينا كده البت كانت مقبله عكسنا بس مع لحظة اتلفت دي أنا كان في ضحكة واقفه لي في حلقي بس سلمت بطرف يدي و وقبلت منها و جااااااااك فكيت الضحكة 😂😂😂😂 و جريت تميتها بهناك و لحقوني اصحابي التانين! و اليوم داك قربنا نعملها في روحنا 😂😂
غايتو ما بوريكم السبب.. بيني وبين من حضر تلك اللحظة فقط !
المهم فضحت صحبي والبت سبت لي و سبت لجامعة السودان واليوم الجابها الجنوبي ..
عشان كده هو بتغاظ مني لمن أضحك 😁

أها برضو يوم في مستشفى فضيل معاي صحبي أول ما ركبنا الأصانصير إستحضرت موقف مرا بينا كنا في الدار الاستشارية ومعانا فردتي أول مره يركب مصعد اها أول ما الاصانصير إتحرك كده صاحبنا اتشهق ومعاها صوت 😂
فبقيت كل ما أركب أصانصير بتذكرو واضحك...
اها اليوم داك المصعد كلو نسوان و أعمامك كبار و عيانين،، بس مع قفلة الباب اتذكرت صحبي داك وقعدت اضحك 😂😂😂😂 والله ما قدرت اقيف كلو كلو 😂😂😂😂
فردتي الراكب معاي إتبرا مني وعمل ما بعرفني و الناس قالو الزول ده جنه و طشه شبكه 😁😁

.
فشنوووو اضحكوا ياخ الدنيا دي فيها شنو؟!
و عشان شنو نكشر اليوم كلو!
اضحكوا بس ما تكونوا فضايح زي 😂😂😂😂
.
.
محمد طارق | زول درويش.

يا صاحبة في الزمن الصعب!

#ياصاحبة_في_الزمن_الصعب!
.
الصداقة هي شنو؟
هي حاجة كبيرة مقدسة جداً..
حاجة جميلة خالص، ما عندها اطراف محدده ،
يعني ما فقط صداقة بين ذكر و ذكر او بين انثي و انثي!
لالا الصداقة دي بتشمل كل شئ !
فشنو بعض الناس ما مقتنع بالكلام ده وانا واحد منهم و مؤمن بالصداقة المتنوعة!
اي بين ذكر و انثي ..
.
طيب الصديقة
هي البتضحك معاها لمن تدمع
و تضحك معاك كانو اول مره تضحك!
تتهابل معاها و تتعاورو زي كانكم شفع!
ممكن تشاكلها و تشاكلك!
و بعد دقايق ترجعو حلوين مع بعض!
ما بترضى فيها الكلام الشين
ولا كمان هي بترضى ليك!
هي البتغير عليك و تغير عليها
تحكي ليك و تحكي ليها
تشاركها همومك و تتقاسم معاك همومها
هي زوله ليها مكانة خاصة عندك!
زي الصديق مش ليو مكان خاص عندك!
لمن تكون زهجان تتجه ليها
و لمن تكون زعلان تتجه ليها!
لمن تكون مبسوط بتطراها
و لمن تكون هي مبسوطة بتجيك انت اول واحد!
هي البتغير منها حبيبتك و بتحس انو ممكن تاخدك منها في اي لحظة!
هي البتجي و تحكي ليك عن حبيبها  وانت تحاول تنصحها و توريها!
وانت تطلب رايها برضو !
هي البتريدك و تريدها
ريده صادقه و عفيفه
من غير مقابل و من غير حتي تقولوها!
علاقتكم بسيطة ابسط ما يكون
لا فيها تعقيد ولا ظنون!
هي البتفهمك من غير ما تتكلم
من غير ما تبرر و تشرح
و هي البتعرف السؤال و الجواب!

وده كلو ممكن يكون حاصل مع الحبيبة
بس مع الصاحبة ليو طعم أجمل !
.
و يا صاحبة في الزمن الصعب..
.
.
فهنيئاً لكل من له صديقة بنكهة حبيبة او صديق بنكهة حبيب ..
.
.
محمد طارق | زول درويش.