احببت فتاة

سك سك 🏃

#سك_سك 🏃🏃
.
كالعادة جيت بعد التراويح قعدت والزهج يخيم علي الاجواء 😶
الفيس مافي موضوع
الواتس مافيو موضوع
التلفزيون كلو دعايات وشويه ناس بغنو 😷😷
ده حال شنو ده 😑
قعدت افكر طيب يا محمد طارق ما تقوم اخد ليك جكه سريعه كده تغير وشايف في جضوم وحاجات بدت تظهر 😅😅
المهم خشيت في البرموده و الكت و الكداره و يا الشارع جاك زوول 😎✌
ركبت سماعاتي و عملت تسخينه سريعه كده وبديت اجك 🏃🏃🏃
جاكي و منطرب ☝👋👏👏
شويه شويه بزيد السرعة..
اها خشيت في شارع ميت كده لا عربات لا جوطه و جاري بمزاااااج 😌
و بهدن شويه اشيل نفس ومعاهو كم رقصة سريعه كده 😁😁🙊 💃💃
وتاني بقوم مشخط.. 💨🏃
اها في طرف الشارع ده في هنود اتنين قاعدين بره و مركزين مع تلفوناتهم..
بس طق جاتني فكره قلت لمن اجي جمبهم اخلعهم و اواصل جريتي.. اشغلها ليهم شويه بدل قاعدين كده 😈
يلا قربت والجماعه ولا جايبين لي خبر يشختو في تلفوناتهم ساي..
بس وصلتهم كده!!!
كوركت ليهم جاااااااااكم!!!!!
ومعاها صوت وحش كده 👹 ياخي انا زاتي لمن اتخلعت 😅
وقومو يا الهنود اتخلعو لدرجة اطلقو كرعينهم للهوا و في كسر من الثانيه فوووووووو  بقو جارين 😂😂😂😂
ولا هظرو جري بس
والله جرو جري
حيروني زاتي معقولة اتخلعو للدرجة دي؟ 😂
اها انا قلت خلاص الحقم اوريهم اني بهظر معاهم وكده
اها الجماعة شافوني جاري وراهم قالو بس خلاص الزول ده الليله بنتهي مننا وقومو اجرو زياده 😂😂😂
انا جاري
وهم جارين
سك سك بس والله
يا جماعة استهدو بالله
والله بشاغل فيكم 😂😂😂
وحات ديني شخطو شخيط
طيارات بس ✈✈
ينفعو مهاجمين  😂😂😂
ياخي جرايين كيف القصار الدقدق ديل 😅 ماشاءالله تبارك الله 🙊
انا جاري وراهم لمن كراعي اتشمطت 🙈
الجماعة اي واحد استلم ليو شارع و لف بيو و بجريتهم ديك ما وقفو 😂😂😂😂
انا قطعت خلاااااااااص والفيني كملت 😅
وقفت بعاين ليهم لحدي ما اختفو من الشارع واضحك😂😂
ياخي ابو جبنكم زاتو 😂😂
ديل شنو ديل 😒
الواحد ما يهظر! 😏
غلطان انا البظهر معاكم 😑😂
.
المهم هسه انا القي لي زيت سمسم اتمسح بيو وين؟! 😅
.
.
محمد طارق | زول درويش.

اعلامي

#اعلامي 😎✋
.
#سؤال_لاهل_الخير؟!!!
انتو الواحد لو داير يبقى #اعلامي يعمل شنو؟ 🌚
يظهر في التلفزيون ويعمل دعايات كده #بااااااااااايخوووو 😷
اي عارف #الإعلام_الاسباني خشم بيوت بيبانها مصديه 🌚
المهم اكيد حتسألوني مؤهلاتك شنو!
طيب أوريكم مؤهلاتي بس اكيد الحكايه ما محتاجه شهادات وكده صح؟! 😉
طيب بسم الله نبدا😌
-شكلياً ما وجيه و شعري #خشن و #مغبش لكن الواحد ممكن يستعين بالجل والحاجات 😁😎
طبعا كراجل الحمدلله دي ما مؤثرة شديد عكس الجنس اللطيف لازم في المعاينة تكون بنيتو #التحتيةوالفوقانية رااااكزه 🙊🏃🏃
-المهم ما قصير ودي ظريفه مع ناس الكاميرا عشان ما يجيهم وجع ضهر 😌
-نفسي #قصير ما اكضب عليكم يعني لست بمتحدث جيد 😅بقول كلمتين بقطع طوالي وبتمتم 🙊لكن ضحاك والله 😂 اخلي ليكم الاستديو و الطاقم والمشاهد كلو #يكتكت 😂
بعرف اضحك ضحك 😁
ما الدنيا اخرها كوم تراب مالو نضحك بدل وشوشنا الواقعه دي 😑
المهم مش مفروض الاعلامي يكون زول #بشوش صح؟ 
يلا انا البشاشه زاتها 😁
عليكم الله كيف ما بشوش؟ 😉
- صوتي عالي و مسموع لكن #بروح بسرعه ما بعرفو بجري مني وين 😅🙊
- ما لبيس شديد كده لكن عندي بدلة اشتريتها لعرس و لبستها مره واحده يعني ممكن اقشر  واقدكم بيها و اقطع نص وحركات 👞👔👖🕶
- ببتسم بين كل خمسه كلمات والتانيه عشان عارف #الشعب_الاسباني ملول 😉
- بعرف اتكلم بيديني ✌👌✋🙌👏💪✊👋☝👉👆☝🖕👇👈👍👎👋🖐 👊
طبعاً #لغة_الجسد لازم الواحد يكون ملم بيها عشان يخلي المستمع مركز معاو 😌 
هسه في اعلامي بعرف لغه الجسد؟ مااافي..
حدهم حركتين بس شبك الايادي و غز الكوع 😂
- ما بنزل #صوري واكتب جنبها مساء الخير 🌚
- بتسوك و بستحمى و بتريح و نضيف الحمدلله 😌✋
اها تاني فشنو! 🤔
ما اظن في شي 🤗
ايوا دقيقه دقيقه!!!
#خاشي_في_قروبات ما كتيره لكن مفيدة  😎✌
خلاص كده انتهيت 😊
.
بس عليكم الله!!النبي فيكم!! لو طلعت بنفع اعفوني من دعايات #الزيوت و #معاجين_الاسنان 🐸 و الحاجات الكيف كيف دي بالله 😷 ✋
.
"ملحوظة: #الإعلامي_الجيد_هو_الذي_يتقن_الفقه_والذكاء_في_انتقاء_الكلام_واحترام_عقل_المتلقي."
.
اها كيف بالله ما انفع؟! 🌚
ولا امشي اشوف لي هندي اخلعو؟! 🌚😂
.
.
كان معكم في التقديم
#إعلامي_الشعب 😌✋
محمد طارق | زول درويش.

حصل؟

#حصل؟! 🤔
حصل اكلت رز بالسكر !
طحنية بالجبنه !
عيشه بالموز !
مربي بالقشطة !
عيشه بالسكر والمويه !
حشيت الجبنه بالسكر !
رز بالطحنيه !
مكرونه بالعيش !
عدس بالجبنه وزيت السمسم !
كسره بالمويه وزيت السمسم !
اكلت داردمه!
اكلت مديده بالسبوسه!
جربت كستر بالبسكويت!
حصل شربت بلح باللبن!
حصل سفيت لبن بدرة !
لحست باقي اللبن الماسك في قعر كبايه الشاي !
لحست باقي الفته الفي صحن البوش !
جربت القنقليز بالدكوه والشطه !
اكلت التبش بالشطه!
حصل جربت البامبي بالشبس والشطه!
اكلت الهريسه الفي باقي صينية الباسطه !
اكلت الزلابية الحاااارة بالسكر!
جربت البيبسي بالكستر !
حصل جربت السفن آب بالزبادي !
😌😋😌😋😌😋😌😋😌
.
لو حصل أبلع ريقك ساااااي ! 😝
لو ما حصل كنت عايش وين انت ؟! 😒

.
.
محمد طارق | زول درويش.

التصوير الرياضي فن

#التصوير_الرياضي_فن 😌✋
.
المصورين بتاعننا في الكور المحليه
اول شي ما بختارو الزاوية المناسبة
يعني فجاة تلقي واحد قام منفعل غطا الكاميرا
و الزول ده #اب_راس ده نكرهو كره و محيرني كيف!!!
في اي كوره اساسي تقول بدفعو ليو عشان يعمل حركتو دي😡
اها المصور لمن يجيب الكاميرا علي جهة الجماهير #تخاف_عديل😱
و تجيك رعشه 😵
ناس هايجين 😤
وناس متشاكلين 👊💪
وناس داقين جرس ومعاها تيت تيت 😷
و لو خلاص اتفنن بصور ليك #باقه_طايره من المدرجات لحدي ما تصل لب راس اللاعب اصابة مباشرة وسقط ارضاً
ياخي والله ناشيونال جيوغرافيك بس 😂😂😂
.
اما مصورين برا
ياسلاااام ياخ 😍
بعرفو يختارو الزاويه
يجيب ليك الميدان ده طول وعرض
من كل الاتجاهات
و بعرف يختار الجماهير كويس 😎
يعني يجيب ليك الناس الرايقين النضاف
لابسين كلهم زي بعض
بشوشين 😁
#المشجعات ❤
#الطبيات ❤ وعلي خدودهم منقوش العلم 🙊
#فاتحات_الروح_سبعة_ضلفات 😍
تشوفهم تقول بس خلاص انا مشجع الفريق ده
وانت اسمو زاتو ما بتكون بتعرفو 😁
يعني بخلوك تستمتع بالكورة وكده يعني 🙈
و يدوك احساس انك جوه الاستاد..
.
لكن بس نقول الحمدلله
الحمدلله
الواحد يحاول قدر الامكان #ما_يوسخ_عيونو 👀
ركزو مع الشغل الخارجي و الدولي ده ناس كوبا أمريكا و اليورو ❤
خليكم من ناس التحكيم فاشل 😂😂😂
.
.
و #حقيقة_كده_التحكيم_فاشل 😌✋
.
.
محمد طارق | زول درويش.

سحور في الغربة

#سحور_في_الغربة 😌✌
.
أول رمضان لي في دوحة العرب كان عبارة عن نوم و سهر 😴😴فشنو اكتشفت فيو حاجات كتيره ما زي في السودان..
التراويح مافيها شي مختلف مع التكيف و البخور الفي الجامع بتكون مستعد تصلي للصباح 😍❤
و التهجد ببدا الساعه 12.. ساعة وحده ترجع البيت شغل ابو السريع 😁
الصبح باذن من تلاته ما عارف ديل مستعجلين لاحقين شنو 🤔
اها يوم قاعد بعد التراويح وما عندي موضوع قلت ابرمج بنفسي مدام متعطل كده بقيت افكر اعمل شنووووووو 🤔
بس جاااات 😎
قلت البلد دي مافيها ناس بطلعو #يدقو_للسحور عشان الناس تصحي تتسحر طيب ما انا اكسب فيهم اجر و اسحرهم 😍
يازول شلت ليك #قارورة كبيره بتاعت مويه الصحة ديك والله فيها ايقاع وصوت! النوبة ما فيها 😎
و شلت لي #مفراكه ادق بيها
و ربطت القاروره في رقبتي و اتوكلت 😎
بديت من الشارع الورانا
دق دق دق دق دق السحوور يازول
رمضان رمضان يازول 👏
شهر التوبه والغفران يا زول 👏
شويه كده شايف الناس بدت تمرق و مستغربة الزول ده جاني ولا شنو؟ 🌚
وانا اتكيفت قايل روحي عامل شغل و زدت حماس 😁💪
و شغال و ادقدق و الناس تمرق تتفرج وانا مبسوط
لمن وصلت راس شارع بيتنا جا مواطن مارق و هايج 😤
وش فيك يازول!!! ترانا نايمين!! وش تسوي عندك انت!!!
انا طوالي وقفت وبكل ثقة سودانيه ورافع راسي فخراً قلت ليو ده اسمو السحور عادة وتقاليد في السودان قلت اوريكم ليها 😌✋
قال لي اهاااا طيب وقف دقيقه احكيك شي! 
ودخل جوه بيتو
انا هنا قلبي اكلني لكن قلت اقيف احتمال داير يجيب لي سحور اتسحر بيو عندهم حلويات كده ظااابطه 😍😍😍
بعد شويه عاينت كده صحبك جا من هناااااااااك و جاري وراو اسد 🦁 اقصد نمر 🐯 كلب ياخ 😨
و دقيقة ما تمت لقيت روحي جاري و الاسد جاري وراي 🏃🏃🏃🏃🏃🏃🐕🐕🐕🐕
كراعي تدق في قفاي
فحطت فحيط
و الله كلب ممكن يتعشى بي عادي  😅
جاري وبقرا في قران ببدا بالإخلاص بتمها بالكوثر 🙈🙊
جاتني طاقة و لياقة من مافي
جري بس يازول
بعد مراوغات و تكتيك روحت الكلب 🐶
انتصرت اخيراً ✋
ياسلاااام ياخ 😍
و لقيت روحي في مكان ما عرفتو وين
ولا عارف الطريقه البترجعني بيتنا 😅
و عاينت لروحي لا #قارورة معلقه في رقبتي
ولا #مفراكه
ولا #سفنجات 😅😅😅
.
و اتعملت درس لن انساه ما حيت 😁
مش بقولو #بلدا_ما_بلدك_حوم_فيها_حفيان!
اها انا الليله وروني البجري فيها حفيان منو 😂😂😂
.
.
محمد طارق | زول درويش.

طقوس ما بعد صلاة التراويح

#طقوس_ما_بعد_صلاة_التراويح  😎✌

وقت كنا صغار يلا ما بنقدر نصلي التراويح بنصلي العشا و جري الميدان جاك زول 😎..
الميدان بكون ركبو الكشافات عشان الدوره الرمضانية و بكون منوووور
نقوم نلعب بالعجلات و #نفحط و #نشنق_اللستك بعداك ندفر..
الدافوري العجاجتو قايمه 👋
بتلقي الشفع ديل جارين بس لكن ما بتشوف الكورة نهائي
كتاحه و شفع جارين 😂
يلا لو مافي كوره تلقى اي واحد شايل معاو #الف_جنيه او #خمسية_جنيه عشان نشتري بيها #التسالي من عمك البكون حايم حول الميدان بالعجلة بتاعتو وببيع تسالي..
ياخي عمك ده عندو تسالي طاعم طعومية 😍
ليوم الليله ما لاقاني زيو..
ربنا يجزيو خير اينما كان 👐
و نقعد نحضر الدوره الرمضانية.. و كواريك  و صفافير
العجب لمن اللاعب يعمل ليو حركه
او #يجبد لاعب
او #يقيسو
او #يبيضو  لا حول ولا قوة الا بالله دي هنا الحلة كلها بتسمع الكواريك و بتعرف انو في زول طبقو فيو نظرية 😂😂😂
و مرات بنكون قاعدين جمب الجامع نكشف للهناي القدرنا 😍 الوقت داك حدنا نعاين بس 😞
لكن الكبار شويه امورهم واضحه 😉❤
اها يلا لو اليوم مافيو كورة بنكون قاعدين نتونس في امان الله
يقوم يجي واحد من ورا شايل #ليفة_سلك و مولعه نار وتعالو شوفو الجري 😂😂
تحلف تقول الناس دي شافت شيطان 👿
داك بكون ساكي الناس #بسلك_اللماع ده و يرش فيهم 😂😂
و دايما بركز علي الاولاد الما جرايين لانو المتعه هنا الود جاري و #يتشتش 😂😂😂
تش!
تش!
تش! دي تسمعها في ضهرك 😅
و تلقي باقي الاولاد ممردغين في الارض ضحك في صاحبنا #المرشوش 😂😂😂
و غالباً ما كانت بتنتهي بشكلة و طوب و فليق لكن تاني بتصالحو عادي 😁✌
و بعداك بنشيل أغطية حللنا و جرادلنا و باقاتنا و نطلع نزعج الناس اقصد نسحر الناس 😁👏👏
.
ياسلاااام ياخ 😍 زمن سمح والله ❤
ليته يعود يوماً 😞
.
.
محمد طارق | زول درويش.

برنامج #وطن_اب
"قال المشكله الاقتصادية دي ما السودان براو بعاني منها
و دول مثلنا تعاني
قال لدينا من الامكانيات ان نخرج من هذه المشكلة الاقتصادية
و لدينا الحلول لنخرج منها!!!"
قال سبب المشكلات دي مجموعة منظراتية انقسمت سوا كان في الحكومة او المعارضة ما قاعده تغوص في الشعب ولا عارفه عنو شي و نحن من الشعب و عارفين!!
.
واحد! حلولكم دي غير مرجعانا لورا وكاسره ضهر ام الوطن ما عامل شي!
اتنين!  مدام انتو من الشعب وعارفين و حاسين و عايشين المعاناة معاهو طيب البتسو فيو ده شنو؟!
تلاته!  الإحباط الحاصل الان سببو انتو
.
السودان غني الفقر في العقول الاداريه